Ann Nosworthy

Ann Margareta Nosworthy (1927 – 17 April 2016) was 'n Suid-Afrikaanse Impressionistiese skilder wat in Constantia, Kaapstad, gewoon het. Sy is twee keer deur die Suid-Afrikaanse Kunstenaarsvereniging as olieverfskilder van die jaar genomineer.

Ann Nosworthy in 2008

In 1936 was sy die sewende leerling ingeskryf op die dag wat die Laerskool Groote Schuur in Rondebosch, Kaapstad, gestig is, nadat haar moeder, wat 'n lidmaat van die NG gemeente Rondebosch was, te hore gekom het van die stigting van 'n Afrikaansmediumskooltjie in die onafrikaanse suidelike voorstede. Ná sy haar laerskoolopleiding eers in die NG kerksaal en daarna in die skool se tweede tuiste, die herehuis Forest Lodge, ontvang het, was sy 'n jaar lank 'n leerling aan die Hoërskool Jan van Riebeeck tot sy na die Hoër Meisieskool La Rochelle op Stellenbosch gegaan het.

Ann Nosworthy op Kersdag 2006 in Blouwaterbaai, Saldanha.

Sy het drie jaar lank studeer aan die Michaelis-kunsskool in Kaapstad, maar het lank nie geskilder nie, om 'n gesin groot te maak. Haar eerste solo-uitstalling was byna uitverkoop en dié wat daarop gevolg het, almal so te sê ook. Skilder was egter altyd in haar bloed en in haar vroeë vyftigerjare het sy opnuut met mening begin skilder. Dertig jaar later het Nosworthy steeds haar ryke ervaring en innerlike vrede op doek oorgedra. Sy skilder met olieverf en haar werk word dikwels met die Impressioniste vergelyk. Dit word beskryf as sagkens en mooi. Haar onderwerpe is wyd uiteenlopend en sy was altyd bereid om nuwe onderwerpe op die proef te stel.

Nosworthy het kursusse in die Verenigde Koninkryk sowel as in Provence en Spanje bygewoon. Talle skilderye beeld Griekse tonele uit, aangesien Griekeland haar gunstelingplek op aarde was en haar oneindig begeester het. Italië, waar sy al meermale vertoef het, was ook 'n inspirasie, sowel as plattelandse tonele en die see.

Eerbewyse

Nosworthy is tweekeer benoem as die Beste Olieskilder van die Jaar deur die Suid-Afrikaanse Kunstenaarsvereniging. Haar werke is binnelands sowel as in die buiteland verkoop, en sy het op die TV-joernaalprogram Top Billing verskyn tydens 'n tentoonstelling in Johannesburg.

Benewens haar huis in Constantia, het sy ook jare lank 'n vakansiehuis op Blouwaterbaai, Saldanha, gehad waar sy baie van haar skilderwerk gedoen het.

Eksterne skakels

• Wikimedia Commons het meer media in die kategorie Ann Nosworthy.
• Voorbeelde van haar werk en 'n kort profiel. Geargiveer 27 September 2007 op Wayback Machine
• Die galery op haar webtuiste. Geargiveer 29 Julie 2012 op Wayback Machine