Anne-Marie Beukes

Anne-Marie Beukes (gebore op 15 Augustus 1950) was 'n hoogleraar in Toegepaste Linguistiek aan die Universiteit van Johannesburg. Sy het van 2019 tot 2024 as die hoof- uitvoerende beampte van die Suid-Afrikaanse Akademie vir Wetenskap en Kuns gedien.

Anne-Marie Beukes
Anne-Marie Beukes
Gebore	15 Augustus 1950 (1950-08-15)
Nasionaliteit	Suid-Afrika
Beroep	Akademikus
Titel	Professor

Lewe en Werk

Sy matrikuleer aan die Hoërskool John Vorster in Nigel. Hierna behaal sy ’n B.A.-graad in Tale aan die destydse Randse Afrikaanse Universiteit (RAU), ’n honneurs- en magistergraad in Afrikaans aan die Universiteit van Pretoria en ’n D.Litt. et Phil.-graad in Toegepaste Linguistiek aan die RAU.

Sy begin haar loopbaan as vertaler by die Transvaalse Provinsiale Administrasie, waarna sy na ’n jaar begin om Spraakwetenskap te doseer aan die Departement Spraakheelkunde aan die Universiteit van Pretoria. In 1986 word sy dosent in die Departement Linguistiek en Literatuurwetenskap aan die RAU. Tussen 1993 en 2003 is sy hoof van die Taalbeplanningsafdeling van die Nasionale Taaldiens in die Departement van Kuns en Kultuur. Hier is sy ten nouste betrokke by grootskaalse regeringsprojekte ten opsigte van taalbestuur, soos die Language Plan Task Group (LANGTAG), die loodsprojek van die Telephone Interpreting Service for South Africa (TISSA), die Mensliketaaltegnologieprojek en die ontwikkeling van die Nasionale Taalbeleidsraamwerk. Hierna keer sy terug na die RAU (later die Universiteit van Johannesburg) waar sy ’n professor is in Toegepaste Linguistiek en tot 2015 hoof van die Departement Linguistiek. Sy doseer Vertaalstudie, Taalbeplanning, Sosiolinguistiek, Kruiskulturele kommunikasie en ’n aantal ander taalpraktykkursusse. Sy dien ook as Raadslid van die Pan-Suid-Afrikaanse Taalraad (sedert 1996/7).

Sedert 1986 is sy betrokke by die Suid-Afrikaanse Vertalersinstituut en word hier in 2005 tot voorsitter verkies, ’n pos wat sy tot 2013 beklee, waarna sy as ondervoorsitter van die instituut dien. Sy verteenwoordig hierdie instituut ook vanaf 1996 tot 2005 vir nege jaar by die International Federation of Translators (FIT) en dien as adjunkpresident van FIT vanaf 2003 tot 2005. Vanaf 2005 tot 2012 dien sy op die Opleidingskomitee van FIT. Sy is ’n geakkrediteerde vertaler van Engels en Afrikaans. In 2014 word sy verkies tot voorsitter van die Afrikaanse Taalraad (ATR). Sy is die ondervoorsitter van die Minister van Kuns en Kultuur se Deskundige-adviespaneel oor Mensliketaaltegnologie en dien ook op die Minister van Kuns en Kultuur se verwysingspaneel vir die hersiening en opstel van die Witskrif oor Kuns en Kultuur. Sy het van 2015 tot vroeg 2024 op die Raad van die Suid-Afrikaanse Akademie vir Wetenskap en Kuns gedien en is in 2019 tot H.U.B. verkies. Sy het in April 2024 uitgetree.

Beukes se navorsingsbelangstelling is die sosiologie van taal, taalpolitiek, taalbeleid- en beplanning, en –bestuur, asook die sosiologie van vertaling. Haar navorsing vind neerslag in referate gelewer by 28 internasionale en 23 plaaslike vakkongresse, asook 20 artikels in plaaslike en internasionale vaktydskrifte en elf hoofstukbydraes in boeke. Sy is ’n NNS-gegradeerde navorser en werk tans aan ’n NNS-befondsde projek oor “Identiteit en die Swart Afrikaners van Onverwacht”. Sy woon in Lynnwoodrif in Pretoria.

Skryfwerk

Sy is die outeur (saam met Marné Pienaar) van “Veeltalige Vertaalterminologie/Multilingual Translation Terminology”, ’n versameling van ongeveer 200 vertaalterme in Engels en Afrikaans met korresponderende definisies en praktiese voorbeelde, asook ekwivalente terme in Frans, Duits, Spaans en Nederlands. Verder skryf sy verskeie artikels wat in vakkundige boeke en tydskrifte verskyn. Haar artikel oor “Language policy incongruity and African languages in post-apartheid South Africa” wat in die Julie 2009 uitgawe van Language Matters: Studies in the Languages of Africa gepubliseer is, tel in 2010 onder die vyf mees aangehaalde artikels uit hierdie tydskrif.

Publikasies

• 2010 – Veeltalige Vertaalterminologie / Multilingual Translation Terminology (saam met Marné Pienaar)

Bronne

Tydskrifte en Koerante

• Nel, Carryn-Ann: “Taalraad-hoof wil voetspoor vergroot”. “Beeld”, 12 November 2014
• Nel, Carryn-Ann: “Vriendelike taal, maar Afrikaans het bagasie”. “Beeld”, 20 Desember 2014

Internet

• La Vita, Murray. Netwerk24: Anne-MarieBeukes – 'n Vriendelike gesig-van-taal Geargiveer 23 Julie 2016 op Wayback Machine
• South African Translator’s Institute