Irina Allegrowa
Irina Aleksandrowna Allegrowa (Russies: Ирина Александровна Аллегрова, wetenskaplike transliterasie: Irina Allégrova) is 'n Russiese sangeres van Russies-Armeense afkoms.
Irina Aleksandrowna Allegrowa | |
|---|---|
 | |
| Agtergrondinligting | |
| Geboortenaam | Ирина Александровна Аллегрова |
| Gebore | 20 Januarie 1952 Rostof aan die Don, Sowjetunie, tans Rusland |
| Genres | Pop |
| Beroep(e) | Sangeres |
| Instrumente | Stem |
| Jare aktief | 1974 tot hede |
| Webwerf | irinaallegrova.com |
Biografie
wysigIrina Allegrowa is op 20 Januarie 1952 in Rostof aan die Don gebore. Haar Armeense voorouers het hulle Armeense van Sarkissian (Саркисян) gerussifiseer en na Sarkissof gewysig. Haar vader het sy geboortenaam Aleksander Sarkissof (Александр Саркисов) later verander na Aleksander Allegrof, volgens sy bynaam Allegris wat deur sy kollegas in die skouburg op die ouderdom van 17 aan hom gegee is. Haar Russiese moeder was Serafima Sosnofskaja.
Irina het in 'n gesin groot geword wat baie lief was vir toneelkuns en het reeds in haar kinderjare in aanraking met bekende toneelpersoonlikhede gekom. Sy het in Bakoe, Azerbeidjan opgegroei waar sy klaviermusiek en balletkuns gestudeer het. Sy was twee keer getroud, en uit die tweede huwelik is 'n dogter, Lala, gebore wat deur haar ouers grootgemaak is nadat Irina op die ouderdom van 22 jaar na Moskou verhuis het.
In die Russiese hoofstad het sy aanvanklik as kelnerin gewerk. Nadat sy kennis met die musiekvervaardiger Wladimir Doebowitski gemaak het, het sy op 26-jarige leeftyd saam met die sanger Igor Talkof en David Toechmanof se groep Elektroklub opgetree. In die laat 1980's het Oskar Feltsman haar die kans gegee om 'n solo-loopbaan te begin en 'n aantal liedjies vir haar geskryf.
Haar debuutalbum is deur haar destydse buurman en vriend Igor Nikolajef geskryf en vervaardig. Die enkelsnit Strannik ("Wandelaar") het 'n groot treffer geword, net soos die album wat nommer een op die trefferlys bereik en daar byna een jaar lank gebly het. Vir haar tweede album Oegonsjitsa (1994) het sy die Russiese toekenning Owatsija as beste vroulike popster ontvang en 'n konserttoer in die Verenigde State onderneem.
Irina het daarna met Igor Kroetoi begin saamwerk, in die huwelik getree en - nadat haar eerste kleinseun gebore is - 'n huis aan die stadsrand van Moskou gekoop. Irina en Igor het in 1996 en 1998 twee albums opgeneem. Ná haar egskeiding het Irina die langspeler Teatr ("Teater") opgeneem en haar slag met 'n wêreldkonserttoer gewys.
In 2005 het Irina haar samewerking met Aleksei Garnizof begin waaruit die album-trilogie "Po Lezwijoe Ljoebwi" sou voortspring. Daarnaas het die sangeres drie liefdesverhale geskryf en haar eie prystoekenningsplegtigheid in die lewe geroep waar sy saam met ander sterre die "Goue Eend"-prys aan joernaliste toeken wat die grootste leuens in die media verkondig het.
Irina Allegrowa het aangekondig dat sy haar musikale loopbaan in Maart 2012 met 'n laaste konsert sal beëindig waartydens ook al haar vriende sal optree.
Eksterne skakels
wysigMedia