Teenpous Felix V
| Teenpous Felix V | |
|---|---|
.jpg) Teenpous Felix V
 | |
| Geboortenaam | Amadeus VIII, Hertog van Savoje |
| Geboorteplek | Chambéry |
| Geboortedatum | 4 September 1383 |
| Sterfdatum | 7 Januarie 1451 |
| Sterfplek | Ripaille |
| Teenpous van | Pous Eugenius IV en Pous Nicolaas V |
| Begin van pontifikaat | 5 November 1439 |
| Einde van pontifikaat | 7 April 1449 |
Teenpous Felix V[1] gebore hertog Amadeus VIII van Savoje is deur die konsilie van Basel aangestel as teenpous in 'n konflik met Pous Eugenius IV oor die pouslike mag. Pous Eugenius het gewen en teenpous Felix het hom uiteindelik aan Pous Nicolaas V onderwerp. Hoewel Felix as die laaste historiese teenpous gereken word, was daar in 1511 nog 'n kortstondige Teenpous Martinus IV.
Biografie
[wysig | wysig bron]Amadeus VIII van Savoje[2] gebore op 4 September 1383 was 'n Italiaanse adellike. Hy was die seun van Amadeus VII, graaf van Savoje en Bonne van Berry. Sy bynaam was die vreedsame. Hy was graaf van Savoje van 1391 tot 1416 en word hertog nadat keiser Sigismund Savoje as hertogdom verklaar het. Amadeus is deur die konsilie van Basel, in hulle geskil met pous Eugenius IV oor die pouslike mag, verkies as Teenpous Felix V en regeer van November 1439 tot April 1449.[3]
Na die dood van sy vader in 1391, regeer sy moeder as regent omdat hy nog te jonk was. In 1418 sterf sy agterneef Louis van Savoje-Achaea sonder manlike erfgename en Amadeus word die alleenheerser van die Huis van Savoje. Hy het sy grondgebied vergroot en verskeie keer probeer om die Honderdjarige oorlog te beëindig. Hy het getrou met Maria van Boergondië dogter van Philips die Stoute, hertog van Boergondië en kleindogter van die Franse koning Jean II. Hulle het nege kinders gehad. Na die dood van sy vrou, het hy as hertog afgetree en 'n kluisenaar geword in Ripaille. Die konsilie van Basel stel hom aan as Teenpous Felix V.[4] In April 1449 onderwerp Felix hom aan Pous Nicolaas V en word kardinaal-biskop van Sabina en pouslike gesant in Savoje.
Felix se reputasie as pous is geskend deur die kommentaar van Pous Pius II waarin beweer word dat hy behep was met geld en die bevoordeling van sy naasbestaandes. Daar is egter geen bewys daarvoor nie en ook nie vir die bewering dat sou hy die biskoppe van Savoje na Basel gestuur het om as pous verkies te word nie.
Verwysings
[wysig | wysig bron]- ↑ Amadeus VIII. (2008). Encyclopædia Britannica. Deluxe Edition. Chicago: Encyclopædia Britannica.
- ↑ Kirsch, J.P. (1909). Felix V. In The Catholic Encyclopedia. New York: Robert Appleton Company. Besoek Augustus 14, 2014 by New Advent: [1]
- ↑ Coulombe, Charles A.,(2003) Vicars of Christ: A History of the Popes, Kensington Pulishing Corp., p. 318
- ↑ Coulombe, p. 319
| Hierdie artikel is in sy geheel of gedeeltelik vanuit die Engelse Wikipedia vertaal. |
