Hans Bär dr Jünger

Dr Hans Bär (* vor 1484 z Baasel, † 14. September 1515 z Marignano) isch e Baasler Rootsher gsi und as dr Baasler Bannerdrääger in dr Schlacht vo Marignano umchoo.

Dialäkt: Baseldütsch

D Familie

D Bärs si mit meerere iiflussriche Baasler Familie verbandlet gsi. Dr Hans Bär dr Jünger isch dr Soon vom Chröömer und Wäggsler Hans Bär und vo dr Anna Eberler, gen. Grüenezwiig gsi, won e Dochder vom Schulthäiss vo Baade im Aargau gsi isch, vom Niklaus Grüenezwiig. Dr Humanist Ludwig Bär isch e Brueder gsi, isch Räkter vo dr Baasler Uniwersidäät worde und het wäge dr Reformazion d Stadt verloo. Dr Hans het e zwäite Brueder ghaa, dr Hieronymus, und zämme häi si 1504 zwäi Fänster in dr Gastkammere in dr Kartause im Chläibaasel gstifdet. E Schwöster, d Magdalena, isch mit em Jakob Meyer zum Haas verhürootet gsi, wo noch iirem Dood dr erst zümftig Bürgermäister vo Baasel worde isch, bis er im Bangsionesturm gstürzt worde isch.

Dr Bär isch mit dr Barbara Brunner verhürootet gsi und si häi säggs Chinder ghaa. Vo 1507 aa het d Familie im Huus «Zum Goldige Falk» an dr Freije Strooss 9 gwoont. Iiri Dochder Helena isch die ersti Frau vom Junker Bernhard Meyer zum Pfiil (*1488; † 1558) gsi, wo vo 1548 bis 1558 Bürgermäister vo Baasel gsi isch.

Karriere

Dr Hans Bär isch e Duechhändler gsi und Mitgliid in de Herezümft «Zu Safre» und «Zum Schlüssel», isch Zumftmäister vo dr «Safre» worde und Seckelmäister und isch im Baasler Root gsässe. Vo 1513 aa isch er au bi «Husgnosse» zümftig gsi.

Er het no vor em Baasler Biidritt zur Äidgenosseschaft as proäidgenössisch gulte. Er het an de Mailänderchrieg mitgmacht, zum erste Mol 1511 und in dr Schlacht bi Novara 1513 as Furier. 1515 isch er as dr Baasler Bannerdrääger in dr Schlacht vo Marignano gfalle.

Dä Artikel basiert uff ere fräie Übersetzig vum Artikel „Hans_Bär_(der_Jüngere)“ vu de dütsche Wikipedia. E Liste vu de Autore un Versione isch do z finde.