Aramón Panticosa

Aramón Panticosa ye una estazión d'esquí d'o grupo Aramón situata en o monezipio de Pandicosa, en o Perineu Aragonés (Aragón). Tamién ye conoxita como Panticosa - Los Lagos (Pandicosa - Os Ibons en aragonés) por os ibons de Sabocos e Asnos, situatos en a estazión. Bellas pistas d'ista estazión son situatas en a bal de Sabocos á 2220 metros, a redolada de más altaria d'a estazión.

Istoria

A estazión d'esquí prenzipia a funzionar en l'año 1970, anque ya s'eban feito estudios prebios á lo proyeuto dende os años 60. En ista añada se creya ya o primer d'os remuntes que encara güé esiste, a telesiella Santa Cruz que puya dende o mesmo lugar de Pandicosa dica la cota 1500. S'instaloron tamién o telesiella Petrosos, más tardis sustituyito, que ba dende a cota 1500 dica os 2000m d'altaria e o telesquí Fobas I, que güé ha estato sustituyito por una siella biplaza.

O siguient año se remató de construyir tamién o restaurant d'a cafetería situata en a cota 1500 e años más tardi o telesquí Fobas II.

Á la fin d'os años 70, cuan eba una epoca de crisis e sequero, a estazión de esquí de Formigal crompó Panticosa. S'instaló en ixa epoca o telesquí Mandilar. Mientres d'os años 80 a nieu estió escasa e a crisis economica s'azentugó dica o prenzipio d'os 90 cuan plegoron os primers cañons de nieu, d'os cualos güé bi'n ha más de 100.

En 1992 a gestión d'a estazión pasó á mans de Ibercaja e o Gubierno d'Aragón e en 1996 se fazió a mayor enamplazión d'a estazión por a Bal de Sabocos, construyendo-sen as telesiellas Sabocos e Petrosos de 4 plazas, a telesiella Javier Escartín de dos plazas e o telesquí O'fonil. En as siguients temporadas s'instalarban a telesiella Corona de Aragón e o telesquí Quebrantahuesos. Ya en l'año 1999 ye construyita la telecabina de 8 plazas que sustituyirba á l'antiga telesiella Santa Cruz e que puyarba dende o lugar, á 1150 m, dica os 1900 m d'altaria. Tamién se construye un edifizio con serbizios como restaurant e cafeteria en a cota 1900.

En 2001 Panticosa dentra en o grupo Aramón chunto con atras estazions d'Aragón con as cualas comparte forfait. Dende l'inte tamién se modernizan instalazions como los cañons de nieu u lo sistema de formait mans libres.

Serbizios

Ofrexe os serbizios d'una estazión d'esquí como remuntes, anfermería, escuela d'esquí, logadura de material, restaurans, etc.

Enrastres esternos

• Pachina d'a estazión d'esquí
• Lista d'estazions d'Infoaventura
• Lista d'estazions de Todonieve