Duro y suave (artes marciales)

Duro y suave son términos que nel contestu de les artes marciales denomen la manera, respeutivamente direuta o indireuta, topetando o cediendo, de contrarrestar la fuercia d'un ataque yá seya con armes o a mano vacía. Los caráuteres chinos que s’usen nes artes marciales pa téunica dura y téunica suave son 硬 (pinyin: yìng; xaponés: gō) y 柔 (pinyin: róu; xaponés: jū). Estos atópense en nomes como, ente otros, Jujutsu (柔術, jūjutsu:“arte de la suavidá”), Yudu (柔道, jūdō: “vía de la suavidá”) o Goju-ryu ((剛柔流: estilu duru y suave).

El taijitu del yin y yang representa, ente otres munches coses, lo “duro” y lo “suave” nun arte marcial.

Téunica dura

Una téunica dura enfrenta fuercia con fuercia, topetando con una téunica de bloquéu o cortando diagonalmente’l golpe cola fuercia d'ún. Ye l'exemplu del defensor qu'usa a la escontra la fuercia y puxu del atacante. Anque les téuniques dures riquen de muncha fuercia pa les executar con eficacia, ye la mecánica de la téunica lo que lleva a cabu la defensa. Por casu:

• Un “low kick” (patada a les piernes) de kickboxing al envís de romper la pierna del atacante.
• Un bloquéu de kárate empobináu a romper o parar el brazu del atacante.

Téunica suave

El propósitu de la téunica suave ye tornar la fuercia del atacante na so desventaya, exerciendo’l defensor un mínimu de fuercia.Con una téunica suave, el defensor usa la fuercia y puxu del atacante contra él, llevando l'ataque haza onde’l defensor tea ventayosamente asitiáu (“tai sabaki”) y l'atacante desequilibráu; un movimientu fluyíu lleva a cabu nel intre la téunica suave acionada. En dellos estilos d'artes marciales, como’l Wing Chun, una recatafila d'exercicios d'entrenamientu a dos de dificultá progresiva, como manes qu'emburrien o manes pegañoses, enseñen a dominar les téuniques suaves. Poro:

(1) El defensor conduz l'ataque redirixendo les fuercies del atacante contra él, o alloñándoles del defensor, en vez d'enfrentar l'ataque con téuniques de bloquéu. Les mecániques de les defenses de téunica suave son circulares davezu: ceder ye enfrentar la fuercia ensin resistencia, como un proyeutil que rebota nuna superficie ensin dañala. Otru exemplu podía ser n’Aikido una parada del brazu del atacante, redirixendo la enerxía entrante del golpe.

Téunica “suave”: proyeición tomoe nage en sacrificiu contra un emburrión.

(2) La téunica suave aplícase de cutiu cuando l'atacante ta desequilibráu; entós el defensor llogra l'ideal d'“eficiencia máxima”” aproclamáu por Jigoro Kano (1860–1938), el fundador del yudu. Les cróniques del taijiquan falen de que “una fuercia de cuatro “taels” ye a mover mil “jins”” refiriéndose al principiu del Taiji (una masa en movimientu pue aparentar nun tener pesu). Les téuniques suaves —proyeiciones, llaves de brazu, etc.— pue que paezan téuniques dures, pero la diferencia ta en que la so aplicación rique d'una fuercia mínima:

• Na esgrima, el defensor guía o controla con una parada la espada del atacante lloñe de sí mesmu, en cuenta de resistir la fuercia d'un bloquéu direutu; a ello pue que-y siga una respuesta cola correspondiente contra-respuesta.

• Nel yudu, cuando “tori”, nesti casu l'atacante, ye emburriáu por “uke”, el defensor, tori déxase cayer embaxo uke al tiempu que lu llevanta perriba d'él, faciendo la proyeición “tomoe nage” (ver a la derecha) con una pierna. Esta téunica tien la categoría de “téunica de sacrificiu frontal” nos estilos de yudu y jujutsu. L’emburrión d'uke pue ser direutu, o bien ser una respuesta a un emburrión de tori.

Principiu “ju”

El principiu “ju” (柔: jū, yawara) ta presente en tolos métodos clásicos de Bujutsu y foi adoptáu polos promotores de les disciplines del Budo. Actuando acordies col principiu del “ju”, el guerreru clásicu podía interceutar y nel intre controlar la espada del so enemigu cuando ésti atacaba, y darréu podía contratacar con puxu bastante p'afuracar l'armadura del enemigu y matalu. El mesmu principiu de “ju” permitía a una persona non armada desequilibrar y arrefundir al suelu al so enemigu.

Términos como "Jujutsu" y "Yawara" fixeron que’l principiu “ju” calistrara dafechu los métodos catalogaos baxo estos términos. Tal principiu arraigonaba nel conceutu de flexibilidá, entendíu tanto nun sen físicu como mental. P’aplicar el principiu “ju”, la persona tenía que ser mental y físicamente quien a adautase a cualesquier situación que’l so adversariu-y impunxera.

Hai dos aspeutos del principiu “ju” que funcionen de contino, dambos intercambiables y inseparables. Un aspeutu ye’l de "ceder", manifestáu nes aiciones de la persona qu'aceuta la fuercia o ataque del enemigu, cuando ye ventayoso facelo, en vez d'oponese a él enfrentándose a la so fuercia direutamente con una fuercia igual o más grande. Ye económico en términos d'enerxía aceutar la fuercia del enemigu frenándola y esviándola ensin oponese direutamente a ella; pero la táctica pola que se gasta la fuercia del enemigu pue facese de forma tan enérxica como l'aición orixinal del enemigu.

El principiu de “ju” ta incompletu nesti puntu, porque esencialmente ceder ye solo neutralizar la fuercia del enemigu. Al mesmu tiempu que se cede a la fuercia o ataque del enemigu hai qu'aplicar una aición en forma de contrataque que saque ventaya del enemigu, ocupáu nel intre col so ataque.

Esti segundu aspeutu del principiu de “ju” tien en cuenta situaciones nes que ceder nun ye posible, porque lleva al desastre. En casos asina xustifícase la "resistencia". Pero tal oposición a les aiciones del enemigu ye solo momentánea y ye rápidamente siguida por una aición basada nel primer aspeutu del “ju”, el de ceder.

Distinción ente "esterno y interno"

Ver Artes marciales internes

Alderícase ente diferentes escueles de les artes marciales chines al rodiu de cómo s’apliquen a talos estilos los conceutos de "duro/suave" y "esterno/interno".

Ente los estilos qu'usen esta terminoloxía, el Taijiquan tradicional iguala los términos al tiempu que los estrema con dellos finos matices.

Referencies

• Datos: Q5655496