Shorinji Kempo

Shorinji Kempo

Tamién	Shorinjikempo, 少林寺拳法
Enfoque	Defensa personal; poques armes. Filosofía Zen
Contautu/durez	Duru, suave, goju ittai (duru y suave al empar)
País d'orixe	Xapón
Fundador	Doshin So
Fecha de fundación	1947
Cabezaleru	Yuuki So, Shike Doshin So II
Antepasaos	Bailian Quan, Baji Quan, Chin Na y otres téuniques chines d'agarre, Yihe Quan, Lohan Quan, Wuhua Quan, Jujutsu, Yudu, Kárate, Kendo, Sumo
Deporte olímpicu	Non
Sitiu oficial	http://www.shorinjikempo.or.jp/wsko

El Shorinji Kempo (少林寺拳法) foi fundáu por Doshin So en Xapón en 1947, como un gyo (行: disciplina d'ameyoramientu recíprocu) o sistema pa entrenar y meyorar a les persones.

Los sos métodos d'entrenamientu básense na filosofía de que "l'espíritu y el cuerpu son lo mesmo" (shin shin ichinyo) y de que poro "l'entrenamientu mental y físicu nun puen dixebrase" (ken zen ichinyo). D'esta miente, el Shorinji Kempo carauterízase por apurrir los tres beneficios d'"entrenamientu pa la defensa personal", "entrenamientu de la mente" y "promoción de la salú".

Amás d'un verdaderu budo (武道), el Shorinji Kempo tamién ye un sistema d'educación enveredáu a la "formación de la propia personalidá" (jiko kakuritsu) y a la "promoción de la felicidá mutua" (jita kyoraku), qu'emplega pal so estudiu programes téunicos bien entamaos y un llibru de testu (Shorinji Kempo Tokuhon).

Les persones que prautiquen Shorinji Kempo llámense kenshi. Los kenshi nun saluden col típicu enclín a la xaponesa, sinón con "gassho rei", una forma de saludu d'orixe budista. Gassho rei (que tamién ye una guardia: "gassho gamae") faise con dambes palmes xuntes y llevantaes delantre la cara.

Orgánicamente, el Grupu Shorinji Kempo estrémase nes siguientes cinco estayes corporatives, que tienen por embargu una rellación perciñida:

• La entidá relixosa Kongo Zen Sohonzan Shorinji, que rixe'l Kongo Zen y los doin onde se prautica en Xapón.
• La Fundación de la Federación de Shorinji Kempo, que vien ser el nome que recibe l'antigua Federación Xaponesa de Shorinji Kempo desque camudara a fundación.
• La entidá educativa nomada Colexu Zenrin Gakuen, establecida como una academia que sigue los principios del Shorinji Kempo. El principal de los centros que tien alcuéntrase nel Hombu. Una vez al mes faen en cada rexón un seminariu pa los que nun pueden atender a les clases diaries del Hombu.
• La WSKO, Organización Mundial de Shorinji Kempo. Pertenecen a ella les seiciones y federaciones de fuera del Xapón.
• La entidá qu'alministra y protexe la propiedá inteleutual (Shorinji Kempo Unity).

Hai que se decatar de que la filosofía básica del Shorinji Kempo anicia nel budismu antiguu, y les sos téuniques básiques n'antigües formes o téuniques marciales chines que conociera y prauticara'l fundador nos sos años mozos, xunto a otres xaponeses. Sicasí les artes marciales chines vives, como'l Shaolin Kung Fu (少林拳) o'l Tai Chi Chuan, nun tienen que ver col Shorinji Kempo, que ye un arte xaponesa dafechu, un Gendai Budo.

Propósitos

Al fundar el Shorinji Kempo, Doshin So quixo facer non solo una organización qu'incorporara l'entrenamientu mental y el físicu, sinón que tamién quixo educar al pueblu xaponés que quedara desmoralizao dafechu pola Segunda Guerra Mundial. El so oxetivu yera aselar a los que perdieren l'aldu y reconstruyir Xapón pal futuru. De primeres tentó d'enseñar una filosofía basada nel budismu orixinal y el zen, pero naide lu siguió. Entós pensó en siguir l'exemplu de Bodhidharma, al que la tradición atribuyía la fundación del zen como entrenamientu mental y del ekkin-gyo pal entrenamientu físicu. Dambos serán col tiempu los métodos d'entrenamientu principales del Shorinji Kempo.

Amás la parte filosófica del Shorinji Kempo tien los oxetivos d'auto-meyora pa la persona y paz pal mundu pola creación d'un coraxe que nunca vence, personalidá armonioso y compasión polos demás. P'aidar a crear una sociedá pacífica ya ideal, el Shorinji Kempo vien aportunando en que caún sía un verdaderu cabezaleru nel so área respeutiva.

Historia

Doshin So (nacíu en 1911) echó los sos años más nuevos pal norte de China con cuenta de facer daqué polos intereses de la so patria. Xuntóse a l'Axencia d'Intelixencia del Exércitu Xaponés pa recoyer información militar mientres la guerra. Tando ellí conoció al maestru Chen Liang, que yera un antiguu shifu de Kita Shorin Byakuren Ken. Mientres aprendía les sos téuniques, Doshin So cumplía la so misión viaxando per Manchuria, y tamién siguía aprendiendo sobre les artes marciales chines que quedaben daquella. Entós el maestru Wen Taizong llevólu a visitar el Templu Shaolin na provincia de Henan, y ellí nomólu 21ᵉʳ maestru del Giwamon Ken (Yi He Men Quan).

El 9 d'agostu de 1945 l'Exércitu soviéticu dio en Manchuria y él viose obligáu a vivir un añu so la ocupación de los soviéticos. Acabó asina por reconocer y pescanciar la "naturaleza del ser humanu". Según el so llibru, esto ye perimportante darréu que la política, la llei y la mesma vida dependen toos ellos de los seres humanos.

Dempués de volver de China, pescudó que diba establecer una gran escuela pa la xente mozo. Daquella taba nuna pequeña ciudá llamada Tadotsu, na isla xaponesa de Shikoku, enseñando filosofía budista. Pero nun foi pa convencer a la xente al nun apurrir daqué nuevo o distinto. So fundó'l Shorinji Kempo pa lleva-yos el conceutu de ken zen ichinyo siguiendo a Bodhidharma y usando les téuniques qu'aprendiera en China. Taba seguru d'apurrir a la xente mozo coraxe moral y físicu y una oportunidá d'aprender la filosofía zen pa que llegaren a ser los líderes de la siguiente xeneración.

Asina esparció'l Shorinji Kempo per Xapón per aciu de los sos alumnos, y más tarde per tol mundu. Dempués de la so muerte en 1980, esti llabor acostinólu hasta güei la so fía Yuuki So. Llueu de la so muerte, Doshin So foi llamáu "Kaiso", o fundador y gran maestru.

Anguaño'l Shorinji Kempo prautícase en 33 países de tol mundu. Hai unes 2.900 seiciones que prautiquen en doin (organización del Kongo Zen) o dojo (federación xaponesa y WSKO). Gracies a Yuuki So, la presidenta actual del grupu, ésti ye un arte bien popular ente les muyeres y munches kenshi femenines tan xuniéndose a la organización. En Xapón el Shorinji Kempo ye prauticáu en doin (dojo con un altar pequeñu) que namái funcionen naquel país y tán abiertos pal públicu en xeneral, pero hai tamién dojo asitiaos en ximnasios privaos o públicos, sales de conferencies, campos de deportes, parques, etc. Como nel restu'l mundu, llamen a estos clubes seiciones o shibu.

Finxos

1947 fundóse'l Shorinji Kempo

1948 establecióse la sociedá "Nippon Hoppa Shorinji Kempo Kai"

1951 principió'l "Kongo zen Sohonzan Shorinji"

1956 establecióse la entidá educativa "Nihon Shorinji Bugei Semmon Gakko"

1957 establecióse la "Federación de Shorinji Kempo de Tou Xapón"

1958 la "Nihon Shorinji Bugei Semmon Gakko" pasa a llamase "Nihon Shorinji Budo Semmon Gakko" (Academia de Shorinji Budo de Xapón), en curtio Busen

1963 establecióse la "Federación de Shorinji Kempo de Xapón" como entidá corporativa

1972 8 países constituyeron la Federación Internacional de Shorinji Kempo (ISKF)

1974 la ISKF convirtióse n' Organización Mundial de Shorinji Kempo (WSKO), con 16 países afiliaos al entamu

1977 la Federación de Shorinji Kempo de Xapón xuntóse a les federaciones xaponeses de Yudu, Kendo, Kyudo, Sumo, Karatedo, Aikido, Naginata, Jukendo, y al Nippon Budokan, pa formar el Zaidan Hojin Nihon Taiiku Kyokai (Conseyu Xaponés del Budo)

1980 morrió Doshin So

1990 el Shorinji Kempo xunióse a la Nihon Budo Kyogikai (Asociación d'Educación Física de Xapón)

1992 establecióse la "Fundación de la Federación de Shorinji Kempo" como entidá de fundación

1997 celebróse'l 50ᵘ aniversariu

2000 organizóse'l Grupu Shorinji Kempo

2002 el Busen (Academia de Shorinji Budo) abrió l'institutu

2003 rebautizóse'l Busen pa ser "Semmon Gakko Zenrin Gakuen" (Colexu Zenrin Gakuen)

2003 diseñóse la nueva marca so-en y el nuevu logo del Shorinji Kempo

2005 migración del manji al so-en

2007 60ᵘ aniversariu

2008 establecióse l'Institutu Junior de Tou Xapón de la Federación de Shorinji Kempo

L'orixe del nome "Shorinji Kempo"

El nome "Shorinji" ye una llectura lliteral de la pallabra china "Templu Shaolin", referida al Monesteriu Shaolin nel distritu Song Shan (Suuzan Shorinji en xaponés) na provincia china de Henan. Doshin So heredó'l títulu de 21ᵉʳ maestru del sistema Giwamon Ken, que se crei qu'usaren los monxos budistes pa defendese cuando'l llevantamientu de la sociedá Yihetuan o Rebelión Boxer de 1900-1901. Cuando fundó'l so propiu sistema, quixo facer un homenaxe nel nome a esti fechu de la so biografía y a los sos maestros.

En 1936, na visita que fizo Doshin So col maestru Taizong al Templu Shaolin de Song Shan, vio na sala Byakueden (Baiyi Dian = Sala del Hábitu Blancu) el mural de los monxos de distintes races entrenándose nes artes marciales, y la so imaxinación quedó prindada del tenjiku nara no kaku, l'arte que la so tresmisión atribúyese a Bodhidharma y que se narraba nes pintures. L'estilu de los monxos budistes prauticando artes marciales abultába-y frescu y vital de manera, y atalantó qu'ehí taba l'orixe de les téuniques marciales qu'había per China. Tres la so repatriación, esa esperiencia foi determinante pa que concibiera'l Shorinji Kempo como un gyo (camín de práutica mutua), y tamién foi una de les razones de da-y esti nome al nuevu arte.

A mediaos de los años 1970 llevantóse un monumentu a Doshin So representando la rellación del Templu Shaolin y el Grupu Shorinji Kempo. La película china titulada "少林寺: Templu Shaolin" protagonizada pola estrella d'aición Jet Li filmóse nel mesmu templu col sofitu de miembros del Grupu Shorinji Kempo.

Al paecer la pallabra kempo (拳法) ye raramente utilizada en China. La pronunciación d'estos dos calteres en chinu mandarín ye "quan2 fa3" (les figures 2 y 3 indiquen cuál de los 4 tonos correspuende a estos estos dos calteres). Pero dicía Doshin So que quixo poner ho (法: dharma, verdá) dempués de ken (拳: puñu) porque inclusive'l poder de les téuniques precisa siguir el dharma y la verdá. El nome de Shorinji Kempo fórmase con Templu Shaolin, puñu (referíu a poder y téuniques) y dharma/verdá.

El nome “shorinji kempo” apaez munches vegaes en testos sobre karate, yudu o otres artes marciales, polo que'l públicu pasa a creer que ye un arte marcial llexendariu. Pero hai que se decatar de que'l Shorinji Kempo ye un arte marcial nuevu surdíu nel Xapón de posguerra. Fundólu Doshin So basándose nes téuniques qu'aprendiera de mozu, feches a les circunstancies modernes y arriquecíes coles sos propies aportaciones orixinales.

Filosofía

El Shorinji Kempo nun ye un budo al usu o una forma de deporte estremu. Ta dicho que ye un gyo pa los sos prauticantes, basáu nuna máxima: "la metá pa la felicidá propia y la metá pa la felicidá de los demás" . Nesta considerancia, dizse que'l Shorinji Kempo ye una enseñanza que forma'l calter de los seres humanos con basa nun espíritu y cuerpu sanos, empobinada a crear cabezaleros que contribuyan a la sociedá.

L'espíritu y la carne nun son entes dixebraos; por exemplu cuando unu tien malura na mente nun pue tener sanu'l cuerpu. Prauticando la téunica del Shorinji Kempo y aprendiendo la so filosofía, fórmase al empar un cuerpu firme y un espíritu que nunca vence. Persíguese ganar individualmente enfotu y llevar felicidá non yá a unu mesmu sinón tamién a les persones del arrodiu, cola idea de qu'al aidase mutuamente va ameyorando la capacidá coleutiva pa encarar les inxusticies na sociedá.

Sistema d'entrenamientu

Entrenamientu de la mente (3 métodos): Kiryoku/kisei/kiai

Entrenamientu del cuerpu
L'entrenamientu físicu o mesmamente marcial consta de tres categoríes que son goho (téuniques dures, como puñaes y pataes), juho (téuniques blandies, como controles o proyeiciones) y seiho (téuniques de correición corporal, como axustamientos del llombu). D'esta miente:
Goho (téuniques dures, 8 métodos y 3 tradiciones): Tsuki/uchi/kiri/keri/kari/fumi/taigi/bogi; y Dokko/nyoi/kongo (tradiciones de manexu d'armes qu'anguaño tan fuera de programa)
Juho (téuniques blandies, 10 métodos): Gyaku/nage/katame/shime/hogi/ouatsugi/nukite ho/nukimi ho/shuho/bakuho
Seiho(téuniques de correición corporal): Seikei/seimyaku/seikotsu/kappo

Conocencia: In-yo/kyojitu/tempo/chii/chijutsu/boryaku

Kamae (guardies)
Byakuren 8 guardies: gassho gamae, manji gamae, midare gamae, hasso gamae, taiki gamae, gyaku taiki gamae gamae, byakuren chudan gamae, llamada davezu kaisoku chudan gamae, aiki gamae
Giwa 9 guardies: kesshu gamae, ichiji gamae, nio gamae, chudan gamae, gedan gamae, gyaku gedan gamae, yoko muso gamae, tate muso gamae, fukko gamae

Fujin ho (posicionamientos del cuerpu): seitai gamae (dambos encaraos con Byakuren chudan gamae), tai gamae (tando ún allugáu cola pierna esquierda delantre, l'otru cueye la guardia de pierna esquierda delantre), hiraki gamae (tando ún allugáu cola pierna esquierda delantre, l'otru cueye la guardia de pierna derecha delantre)

Umpo ho (pasos)
Tai sabaki (formes de mover el cuerpu)
Ukemi (cayíes, rodamientos): mae ukemi, ushiro ukemi, oten yori okiagari, dai sharin, tombo gaeri

Embu

L' embu ye una combinación de hokei (patrones organizaos de téuniques goho y juho) que tien 6 seiciones. L' embu faise na cancha, nel ximnasiu, nel Taikai o n'otres ocasiones ceremonioses. Por exemplu execútase dacuando llevando un vistíu prietu (hoi) na ceremonia d'entamu del taikai o axuntanza anual.

Nestos patrones hokei un kenshi fai d'atacante (kosha) y otru de defensor (shusha), y llueu cambien los roles y pasen a otra téunica. Dempués de cada téunica fixa, el kenshi fai ren-han-ko (series d'ofienses que siguen a la defensa), que ye un ataque de contra de forma llibre que sigue hasta que l'atacante orixinal bloquia con ésitu y contraataca. Les téuniques juho, como les proyeiciones, van siguíes de katame (téuniques d'inmovilización o arrestu) o kime (téuniques d'acabación con variaos golpes de mano o pataes a puntos nerviosos).

Los embu entamen con gassho rei y fáense normalmente como kumi embu (fechos por kenshis en pareya), pero tamién como tandoku embu (fechos por un solu kenshi) y como dantai embu (fechos por 6 o 8 kenshis en grupu). L'embu de Shorinji Kempo ye famosu por cuenta de la so velocidá, fluidez y l'armonía de brenga y guapura.

Nun embukai o taikai d'embus (tornéu), l'embu valórenlu 5 (dacuando 3 n'escoyeta preliminar) xueces que disponen de 60 puntos caún pa les 6 seiciones y 40 puntos caún pa otres considerancies. Un total posible de 300 puntos ye'l máximu, desaniciando les puntuaciones cimeres y les más baxes cuándo xulguen 5 xueces. El kumi embu y el dantai embu execútense dientro d'un plazu máximu d'ente ún y mediu y dos minutos.

Antaño na hestoria del Shorinji Kempo nun había dengún reglamentu pa facer los embu. Nesta considerancia, l'embu yera bien potente y práuticu darréu que lu facíen de xemes en cuando, ad hoc y a querer.

La pareya de más sonadía na hestoria del embu foron Masuomi Nakano y Toshio Misaki, que'l so embu rúxese qu'ablucara a Doshin So.

Randori (Unyoho o aplicación en combate)

El randori ye un métodu d'entrenamientu p'aprender cómo aplicar (unyoho) los hokei o combinaciones téuniques. Los kenshi non solo precisen entrenase n'habilidaes básiques (kihon) y en hokei, sinón tamién entrenar les respuestes a un oponente pa dominar la distancia correuta y pa pasar fluidamente d'una téunica a otra, ye dicir dominar les téuniques hasta'l puntu de que surdan de forma natural entá nun conociendo de mano l'ataque. El randori enseña a movese acordies colos principios inclusive cuando unu ye sorprendíu. Tamién sirve pa comprobar el grau d'habilidá qu'unu algamó nel entrenamientu de kihon y hokei.

Endenantes nel Shorinji Kempo'l randori yera como una competición de llucha. Tres munchos accidentes nun randori ensin proteiciones, la organización pescudó y ameyoró proteutores qu'incluyíen proteición de cabeza, cuerpu y coquiya. Adoptóse tamién un sistema de dar a cada kenshi una función d'ofiensa o defensa pa la so seguranza. Sía que non, independientemente de si la práutica faise con o ensin equipu proteutor, evítase la competición y empréstase especial atención a les midíes de seguridá.

Graos marciales (bukai) y graos filosóficos (hokai)

A partir del 1ᵉʳ dan (cintu negru de primer grau) hai dos graduaciones pa cualificar los pasos de la formación física y filosófica.

Exemplos de dan y hokai correspondiente:

1ᵉʳ dan (shodan) -> Junkenshi

2ᵘ dan (nidan) -> Shokenshi

3ᵉʳ dan (sandan) -> Chukenshi

4ᵘ dan (yondan) -> Seikenshi

5ᵘ dan (godan) -> Daikenshi

Dempués d'algamar el 1ᵉʳ, 2ᵘ y 3ᵉʳ dan (graos bukai) y facer unos cursinos preceutivos, los kenshi saquen automáticamente'l Junkenshi, Shokenshi y Chukenshi respeutivamente (graos hokai).

De 1ᵉʳ a 3ᵉʳ dan los esámenes fáense nel sen de cada seición local o federación nacional. Pero pa los graos 4ᵘ dan y p'arriba hai que facer esámenes especiales entamaos por WSKO. Xeneralmente un kenshi con 4ᵘ dan (yondan) y p'arriba ye un profesor pero a los kenshi con 5ᵘ dan (godan) y p'arriba llámenlos oficialmente sensei. Amás el kenshi qu'algama'l 4ᵘ dan tamién algama automáticamente'l Seikenshi.

Oficina Central del Shorinji Kempo (hombu)

Les oficines centrales tan na ciudá de Tadotsu, prefeutura de Kagawa (na isla de Shikoku), en Xapón.

Edificios

Hondo (dojo/sala principal)

Kodo (sala de conferencies, tres de la que tan soterraos los güesos y cenices de Doshin So)

Rensei dojo (antiguu primer dojo)

Shokudo (comedor)

Daiganto (torre conmemorativa)

Zenrin Gakuen (colexu)

Del manji (卍: esvástica a dereches) al so-en (doble círculu)

El manji usárase como marca del Shorinji Kempo del mesmu mou que s'usó nel budismu per munchos sieglos. Les dos tribes de manji signifiquen respeutivamente amor (l' omote manji, que xira a dereches) y poder (l' ura manji, que xira a izquierdes), simbolizando asina la filosofía d'unidá del Shorinji Kempo.

Ensin embargu'l crecimientu de la Organización Mundial de Shorinji Kempo (WSKO) traxo un bon pilancu pal so usu, pol significáu venceyáu a la esvástica nel occidente contemporaneu. Nesta considerancia, la WSKO vieno usando l'ideograma 拳 (ken) nos emblemes, o en dellos casos el nagare-manji, que ye un manji arrondáu de forma que solo llexanamente asemeya una esvástica.

Nel 2005, el Grupu Shorinji Kempo emplegó la nueva marca como símbolu nuevu de xunión de les organizaciones de Shorinji Kempo de tol mundu.

La nueva marca llámenla so-en (doble círculu) y vien siendo la forma postrera d'un par de manji.

La marca so-en ta dirixida y los sos derechos acutaos por Shorinji Kempo Unity. Esta marca ponse como emblema nos dogi (ropa del Shorinji Kempo, chaquetes y pantalones), nos obi (cintos) y nos hoi (vistíu ceremoniosu negru).

Enllaces esternos

• Sitiu Oficial de la Organización Mundial de Shorinji Kempo
• Federación Española de Shorinji Kempo
• Seición Uviéu de Shorinji Kempo Archiváu 2010-07-03 en Wayback Machine
• Seición Las Palmas Branch de Shorinji Kempo - Canary Islands (Spain)

• Datos: Q933634
• Multimedia: Shōrin-ji kempō