Civilización maya

Pa ver otros usos d'esti términu, Maya (dixebra).

Mapa de los territorios habitaos históricamente por pueblos falantes de llingües mayes.

Los mayes yeren un pueblu que vivió principalmente nel sur del que güéi ye Méxicu y n'América Central, afitando una de les cultures mesoamericanes más importantes (4.000 años de civilización) enantes de l'aportada de los españoles (1697). N'arróu de lo que se camienta, los mayes nun desapaecieren, sinón que millones viven entá na rexón, y munchos d'ellos falen dalgún de los idiomas del tueru mayense. Metantu estos miles d'años, faláronse cientos de llingües que xeneren les cerca de 31 llingües mayes d'anguaño. Falar de mayes, ye dirixise haza una llarga historia de les cultures mesoamericanes precolombines.

Historia

Los mayes construyeren les famoses ciudaes de Tikal, Palenque, Copán, Calakmul, Uaxactún, Altún Ha, y munches otres llocalizaciones nel área. Desendolcaren un imperiu basáu n'agricultura y el comerciu, y el país taba ensamáu por delles ciudaes-estáu independientes. Los sos monumentos más notables son les pirámides que ficieren nos sos centros relixosos, al llau de los palacios de los sos gobernantes. Otros restos arqueolóxicos foren les descomanaes llábanes tallaes (esteles, qu'ellos nomaben Tetún, tres piedres), nes que describen a los gobernantes, con testos xeroglíficos nos costaos, au se conseñen les sos xenealoxíes, victories militares, y otros fechos.

La evidencia arqueolóxica amuesa que los mayes entamaren a edificar una arquiteutura ceremonial hai unos 3.000 años. Hai un desacuerdu ente les llendes y la desemeyanza ente los mayes antiguos y una civilización mesoamericana preclásica vecina, la cultura olmeca. Los olmecas y los mayes antiguos paecen influyenciase ún al otru. Los monumentos más antiguos, son cenotafios, túmbanos, o mogotes de tumbes. Los precursores de les pirámides erixéronse bien sero.

Nos sieglos VIII y IX d.C. la cultura maya entamó a amenorgar, desdexando la mayoría de les ciudaes de les tierres baxes centrales. La guerra, l'escosamientu de les tierres de cultivu y la seca, o l'entemezu d'estos factores, suxérense davezu como los motivos del desaniciu. Hai vestixos arqueolóxicos de guerres, fames, y amarrazes en dellos llugares de les tierres baxes centrales. Cuando aportaren los españoles, el so primer contautu foi colos mayes. Nesta dómina los mayes pagaben tributu a los azteques, que conquistaren tola rexón.

Arte

Munchos consideren l'arte maya de la Dómina clásica (200 a 900 d.C.) como'l más sofisticáu y bellu del Antiguu Nuevu Mundu. Les talles y relieves d'estucu en Palenque y Copán son especialmente fines, amosando una gracia y observación precisa de la forma humana que recordaren a los primeros arqueólogos les formes de la civilización clásica del Vieyu Mundu. Les esteles más grandes alcuéntrense en Quiriguá. La mayor parte de les pieces que sobrevivieren son oxetos d'alfarería funeraria y de cerámiques d'usu cotidianu y ritual. Los Murales más antiguos y meyor conservaos son los de San Bartolo, en Petén.

En Bonampak foren descubiertos murales antiguos que sobrevivieren por un afortunáu accidente que los caltuvo intautos hasta'l día de güéi (magar que pasu ente pasu tán toyéndose pol turismu na rexón).

Col desciframientu de l'escritura maya, descubrióse qu'ésta yera una de les poques civilizaciones au los artistes escribíen el so nome nel so trabayu.

Arquiteutura

L'arquiteutura maya ye única ya espeutacular como l'arquiteutura griega o romana, con construcciones de varios miles d'años. Les más afamaes son les pirámides escalonaes, no cabero del periodu preclásicu. Demientres esta dómina de la cultura maya, los centros de poder relixosu, comercial y burocráticu medraren pa convertise en ciudaes pergrandes como : Chichén Itzá, Tikal y Uxmal. Dalgunes construcciones notables de les ciudaes mayes son:

Les Plataformes Ceremoniales: utilizaes pa ceremonies públiques y eventos relixosos, yeren feches davezu con figures tallaes y seique tzompantli, bárganos usaos p'amosar les tiestes de les víctimes.
Palacios: grandes y davezu abondo decoraos, taben xeneralmente metanes xunto al centru de la ciudá y aloxaben a les tribes altes de la población.
Pirámides y Templos: los templos relixosos más importantes allugábense no cimero de les pirámides mayes, supuestamente por ser el llugar más cercanu al cielu.
Pistes del Xuegu de pelota mesoamericana; éstes foren construyíes per tol imperiu maya, a gran escala. Taben arrodiaes pelos costaos por ramples escalonaes qu'empobinaben a unes plataformes ceremoniales o a templos pequeños.

La pista del xuegu de pelota tinía forma de I (i mayúscula) y alcontrábase en toles ciudaes mayes, sacante les más pequeñes. El xuegu orixinóse hacia'l 2.500 e.C.. na rexón de los Olmecas nel Golfu de Méxicu (los olmecas vivíen nuna faza de terrén nomada "Olman" o País del Hule). Dalgunos especialistes afiten que les descomaes tiestes de piedra olmecas, caltienen una mena de cascu na tiesta. El xuegu de Pelota, tuvo un calter ritual, políticu y dablemente económicu. Simboliza la llucha ente les fuercies opuestes del universu.

Matemátiques

Lo mesmo que otres civilizaciones mesoamericanes, los mayes usaben un sistema de numberación de base 20 (vixesimal) y de base 5. Tamién los mayes preclásicos (o los sos predecesores olmecas) desendolcaren independientemente el conceutu de "cero" alrodiu del añu 36 e.C.. Les inscripciones afayaes amuesen en delles ocasiones que remanaben sumes d'hasta cientos de millones, y feches tan estenses que tomaben delles llinies el poder representales. Ficieren observaciones astronómiques enforma precises, y los sos diagramas de movimientos de la Lluna y los planetes son iguales o superiores a los de cualesquier otra civilización que trabayare a simple vista. Asimesmo, como otres civilizaciones mesoamericanes, los mayes descubrieren una midida esauta de la duración del añu solar, mucho más esauta que l'usada n'Europa col calendariu gregorianu. Sicasí, nun lu usaren. Sofitaren l'añu nuna duración de 365 díes, lo que significa que'l calendariu tien un error d'un día cada cuatro años.

Nel calendariu Xulianu usáu n'Europa hasta'l sieglu XVI, l'error acumuláu ye d'un día por cada 128 años. El calendariu gregorianu d'anguaño acumula un error d'un día cada 3.257 años.

Asemeyances cola cultura oriental

Hai delles asemeyances ente la cultura Maya y la cultura del llonxanu Oriente, especialmente na China:

Escritura: Los ideogrames mayes aseméyense abondo a los sellos chinos.
Numberación: La numberación maya dase un aldéu a los simbolos del I-Ching y caltién dalguna semeyanza colos carácteres coreanos (hangul).
Mitoloxía: Na mitoloxía maya esisten lleendes sobro dragones paecíos a los de l'antigua China y Xapón, esto espéyase tamién nel so arte, yá que les representaciones d'estos dragones guarden munchu aldéu colos d'Oriente, particularmente na China.

Toes estes similitudes entá nun tienen esplicación concreta.

Referencies

Enllaces esternos

Wikimedia Commons tien conteníu multimedia tocante a Civilización maya.