Yəşəm

Yəşəm silisiumlu çökmə süxur. Kriptokristallik kvarsdan ibarətdir. Rəngi qırmızı, qırmızı-qonur, yaşıl, boz, sarı, narıncı, qonur, qara və ağ olur. Həm birrəngli, həm də müxtəlifrəngli (qarışıqrəngli, ləkəli və zolaqlı) növləri var. Yəşəmdə skeleti opaldan və ya əhəngdən olan dəniz heyvanlarının qalıqları rast gəlir. Yəşəm vulkanik süxurlarla bir yerdə tapılır; qiymətli məmulatların hazırlanmasında və zərgərlikdə istifadə edilir. Yataqları Cənubi Uralda və Altayda, Siciliyada, keçmiş Çexoslovakiyadadır. Azərbaycanda (Xanlar, İsmayıllı rayonlarında) təzahürləri var.