Schwerin

Schwerin
	; Kastell Schwerin
Lec'hiadur
Titouroù
Gorread	130, 46 km²
Poblañs	95 855 (12/2007)
Stankted	735 den/km²
Uhelder	38 m
Kod post	19053; 19055; 19057; 19059; 19061; 19063
Pellgomz	0385
Politikerezh
Bro	Alamagn
Land	Mecklenburg-Vorpommern
Karterioù	18 Ortsteile
Maerez	Angelika Gramkow, Die Linke
Lec'hienn	www.schwerin.de

Schwerin a zo ur gêr e norzh Alamagn, ha kêrbenn Land Mecklenburg-Pomerania ar C'hornaoueg. E dibenn 2007 e oa 95 855 annezad enni.

Istor

Tro-dro da Schwerin ez eus kalz lennoù, an hini vrasañ anezho, anvet Schweriner See, a zo 60km² gorread dezhañ. War inizi e-touez al lennoù e oa ar bobl abotrit o chom en XI^vet kantved. Anvet e oa al lec'h-se Zuarin, ha sed orin anv Schwerin. E 1160 e voe trec'het an Abotrided gant Herri al Leon hag a dapas Schwerin ivez. Azalek ar mare-se e teuas da vezañ ur gêr a-bouez : savet e voe ur c'hastell hag a voe kresket a-hed ar c'hantvedoù. Lavaret e vez e vefe ennañ un tasmant anvet Petermännchen.

Schwerin a-raok 1340

E 1358 e timezas Alberzh III Mecklenburg da Richardis von Schwerin, ha neuze e teuas Schwerin da vezañ ul lodenn eus dugelezh Mecklenburg, hag enni en em stalias an duged. War-dro 1500 e krogas chanters evel kastell Schwerin, m'edo an duged o chom. Goude ma vefe bet rannet Mecklenburg e 1621 e teuas Schwerin da vezañ kêrbenn Dugelezh Mecklenburg-Schwerin. Etre 1765 ha 1837 e voe lakaet Ludwigslust da gêrbenn, ha Schwerin en-dro goude-se.

Goude 1918 hag an dispac'h en Alamagn e voe diskaret ar roueelezh, hag and dug a roas e zilez. Dont a reas neuze Schwerin da vezañ kêrbenn stad dieub Mecklenburg-Pomerania ar C'hornaoueg. Da zibenn an Eil Brezel-Bed (d'an 2 a viz Mae 1945) e vo tapet Schwerin gant an arme amerikan. D'ar 1añ a viz Even e voe roet d'ar Vreizhveuriz, ha d'ar 1añ a viz Gouhere e voe roet d'ar Soviediz, peogwir e rankas an Amerikaned hag ar Vreizhveuriz distreiñ d'o zakadoù-aloubiñ. Aloubet e voe Schwerin gant ar Soviediz hag e teuas da vezañ ul lodenn eus DDR. Divodet e voe ar stadoù en DDR e 1952, ha dont a reas Schwerin da vezañ kêrbenn distrig Schwerin. Ur wech adunvanet Alamagn e 1990 e voe adsavet stad Mecklenburg-Pomerania ar C'hornaoueg. Da zibab a oa etre Rostock ha Schwerin, ha Schwerin eo a voe lakaet da gêrbenn.

Savadurioù dibar

Kastell Schwerin, war un enezenn el lenn Schweriner See. Sez Landtag Mecklenburg-Pomerania ar C'hornaoueg eo hiziv an deiz
Iliz-veur Schwerin, savet etre 1260 ha 1416
Park an Alter Garten (al Liorzh kozh) : tro-dro ez eus savadurioù eus an XVIII^vet kantved evel an Altes Palais (ar Palez kozh), ar Staatliches Museum Schwerin (Mirdi-stad an arzoù) savet etre 1877 ha 1882, hag ar Staatstheater (c'hoariva-kêr), savet e 1886
An ti-kêr bet savet en XVIII^vet kantved
Schelfkirche : un iliz bet savet e 1238, hag adsavet e 1713 goude ma vefe bet distrujet gant ur gorventenn
Television mast Schwerin-Zippendorf

Mirdioù

Ar Staatliches Museum Schwerin-Kunstsammlungen ma kaver ur dastumad arzoù alaman ha nederlandat eus ar XV^vet betek an XIX^vet kantved : oberennoù gant Rembrandt, Lucas Cranach gozh ha Rubens. Hag ivez arz alaman ar Grennamzer, porselen Dresden, livadurioù an XVIII^vet kantved, hag oberennoù modernoc'h evel livadurioù gant Max Liebermann.
An Technische Museum, staliet er Marstall (Krevier ar roue).