Centra Oficejo de UEA
La Centra Oficejo de UEA (aŭ mallonga: CO) estas la precipa sidejo de Universala Esperanto-Asocio. Ekde 1955 ĝi situas en Roterdamo, Nederlando. En aŭgusto 2021 la UEA-estrarano esprimis la volon vendi la ĉefan domon; restu nur eta buroo en la volontula domo. La libroservon kaj la organizadon de la UK estonte prizorgos E@I en Slovakio. La altvaloraj libroj estos konservitaj en la Aŭstria Nacia Biblioteko.[1]
| Centra Oficejo de UEA | |||
|---|---|---|---|
 | |||
sidejo 
| |||
| Lando | Nederlando vd
| ||
| Situo | Roterdamo | ||
| Adreso | Nieuwe Binnenweg 176, 3015 BJ | ||
| Poŝtkodo | 3015 BJ | ||
| Situo | |||
| Geografia situo | 51° 54′ 50″ N, 4° 27′ 52″ O (mapo)51.9138888888894.4644444444444Koordinatoj: 51° 54′ 50″ N, 4° 27′ 52″ O (mapo) | ||
| |||
 Centra Oficejo de UEA | |||
| Retejo | https://uea.org/asocio/centra_oficejo | ||
Nieuwe Binnenweg 176 (2006)
Historio
redaktiSvisa epoko ĝis 1936/1947
redaktiDum longa tempo la Centra Oficejo troviĝis en Svislando, nome ekde la fondiĝo en 1908 en Ĝenevo. Ene de tiu urbo ĝi plurfoje translokiĝis. En 1919/20 ĝi troviĝis en Bern.
Post kiam la plej multaj membroj kaj aliĝintaj asocioj estis transirintaj en 1936 al Internacia Esperanto-Ligo, la "ĝeneva" UEA en 1937 translokiĝis oficiale al Palais Wilson en Ĝenevo. Tie Hans Jakob plulaboris post 1947 ("Serva Centro"), ĝis oni haltigis lian oficon en 1960.
Brita epoko 1936/1947-1955
redaktiIEL fine de 1936 gastis ankoraŭ en la oficejo de la brita asocio en Londono (adreso High Holborn), sed baldaŭ translokiĝis al donacita domo en Heronsgate iom nordokcidente de Londono. En 1955 oni serĉis novan domon en la urbego mem, ĉar Heronsgate estis malbone atingebla por oficistoj. Ĉar oni ne trovis ion taŭgan kaj pageblan, oni daŭrigis serĉi alilande kaj fine interkonsentis pri domo en Roterdamo, Nederlando.
Nederlanda epoko ekde 1955
redaktiLa unua adreso en Roterdamo estis Eendrachtsweg 7, sed jam aĉetinte ĝin oni sciis ke ĝi estos malkonstruita pro la urborenovigaj planoj de la loka registaro.
En 1962 okazis la translokiĝo al la nuna domo de Nieuwe Binnenweg 176, (51° 54′ 49″ N 4° 27′ 52″ O / 51.91361 °N, 4.46444 °O (mapo)) domo konstruita en 1887, la saman jaron kiel la naskiĝo de Esperanto. En 1986 okazis rekonstruo, kun alkonstruo de alo apud la (malpligrandigita) ĝardeno. En 2006 okazis nova rekonstruo, interalie kun la transloko de la Biblioteko Hector Hodler el la ĉambro "Kanado" al la salono "Zamenhof", fine de la apudĝardena alo. En februaro 2022 la komitato de UEA per reta voĉdonado decidis pri la proponita vendo de tiu domo (37 komitatanoj voĉdonis por vendo, 13 kontraŭis vendon kaj 4 sin detenis)[2].
Post movo de pluraj fakoj (kongresoj, libroservo, arkivo, biblioteko Hektor Hodler) ekster Nederlandon, la CO (kun jura sidejo, administra kaj jura fakoj) moviĝos al la teretaĝo de la Volontula domo en Nieuwe Binnenweg 430.
Taskoj
redaktiLa Centra Oficejo enhavas la administran fakon de UEA, libroservon, Bibliotekon Hector Hodler, Konstantan Kongresan Sekretarion (kiu respondecas pri la organizado de la Universalaj Kongresoj) kaj eldonejon. En la domo funkcias ankaŭ la oficejo de TEJO, en kiu laboras TEJO-volontulo. Laŭ la statuto, la Centra Oficejo estas gvidata de la Direktoro de la Centra Oficejo, sed nun tiu posteno vakas, tial la CO-n estras la Ĝenerala Direktoro de UEA. Krom li restis nur du oficistoj (ambaŭ laborantaj duontempe) pro grava financa krizo.
Ĉambroj
redaktiEn la domo de la Centra Oficejo sur kvar etaĝoj troviĝas 21 ĉambroj kiuj havas proprajn nomojn, elektitajn de la personoj kiuj finance subtenis la renovigon de la domo post translokiĝo al Nieuwe Binnenweg 176 en Roterdamo.
Jen la listo de la ĉambroj kun la indikoj pri la mecenatoj:
- Albert (arkivejo) – de s-ino Antonija Albert
- Arabio (TEJO) – de d-ro Nassif Isaac
- Aŭstralio (kunsidejo) – de Aŭstralia Esperanto-Asocio
- Edwin Burg (manĝoĉambro) – de s-ino Jenneke Dunnewold-Ehrmann
- Elfriede Ernst (grafikejo) – de s-ino Elfriede Ernst
- Epstein (ĝenerala administrejo) – de s-ino Felix Epstein
- Frank Netrval (volontula ĉambro) – de s-ro Frank Netrval
- J. Heetkamp-Senstius (kuirejo) – de s-rino J. Dunnewold-Ehrmann
- Hideo Shinoda (komputila ĉambro) – de s-ro Hideo Shinoda
- Kanado (kunsidejo) – de s-ino Dorothy M. Henderson
- Llech-Walter (librostokejo) – de s-ro René Llech-Walter
- Minnaja (ĝenerala direktoro) – de Familio Minnaja
- Monte Carlo (financa fako) – de ges-roj Jos Derks
- Nov-Zelando (ekspedejo) – de Nov-Zelanda Esperanto-Asocio
- Onisaburo Deguchi (libroservo) – de Oomoto
- Riichi Kawakami (stokejo) – de s-ino T. Kawakami-Nielsen
- Salberg (TEJO-oficejo) – de s-ro Erik Salberg
- Simon Saft (arkivejo) – de amikoj de Simon Saft
- Stefano la Colla (kongresa fako) – de s-ino Sforza la Colla
- Svedujo (volontula ĉambro) – de Sveda Esperanto-Federacio
- Zamenhof (Biblioteko Hector Hodler) – de s-ino G.B.J. Mantingh
Libroservo
redaktiEn la Centra Oficejo de UEA troviĝas la plej granda Esperanto-libroservo de la mondo. Ĝi ofertas nuntempe ĉirkaŭ 6000 titolojn de libroj pri kaj precipe en la lingvo Esperanto.
Malferma Tago
redakti
Pli detalaj informoj troveblas en artikolo Malferma Tago de UEA.Dufoje jare, kutime en aprilo kaj novembro, la Centra Oficejo de UEA organizas malferman tagon. Dum tiu tago novaj libroj estas lanĉataj kaj vendataj rabatpreze, kaj okazas prelegoj kaj aliaj kontribuoj.
Dum la pasintaj jaroj la malferma tago allogas pli kaj pli da homoj. Kutime ĉeestas ĉirkaŭ 100 homoj.
Volontula domo
redaktiSekve de Estrara decido el februaro 2016, UEA aĉetis en aŭtuno de 2016 loĝejon kun pluraj dormoĉambroj por volontuloj en Roterdamo. Ĝi situas en la sama strato kiel la Centra Oficejo, je proksimume 10 minutoj piedire. Ĝi estas nomita "Voluntula Domo" aŭ mallonge VolDom.
Tia spaco estas bezonata laŭ la tiama Ĝenerala Direktoro de UEA, Veronika Poór, ĉar kaj UEA kaj TEJO volas plimultigi la volontulojn en la Centra Oficejo: "La bonfarto de niaj volontuloj estas tre grava prioritato, kaj ni opinias ke la nova domo helpos krei taŭgajn kondiĉojn por ili".
La aĉeto de domo estas laŭ Martin Schäffer, tiama Ĝenerala Sekretario de UEA, ankaŭ prudenta financa investo. Per lupagoj UEA ricevos pli ol ĝi povus gajni per ordinara bankdepono.[3]
Bibliografio
redakti
- Ĉambroj de la Centra Oficejo (en:) Jarlibro 2011, Rotterdam 2011, p. 23
- Koffi, Gbeglo: La Centra Oficejo de UEA en vortoj Arkivigite je 2016-03-06 per la retarkivo Wayback Machine, Lomé 2002
- Tonkin, Humphrey: Tuj apude. Gvidilo tra la kvartalo de la Centra Oficejo de UEA, Rotterdam 2008
- van Dijk, Ziko: La Asocio. Skizoj kaj studoj pri la historio de UEA, Antverpeno 2008
- Vizito al la Centra Oficejo de UEA, Rotterdam 2006
Referencoj
redakti- ↑ "La estraro volas vendi la Centran Oficejon", ĉe liberafolio.org, 14.8.2021
- ↑ UEA decidis vendi la domon de la CO, la 13-a de februaro 2022 esperante
- ↑ Gazetara Komuniko de UEA, n-ro 638: UEA aĉetis loĝejon por volontuloj en Roterdamo, la 13-a de oktobro 2016 esperante
Eksteraj ligiloj
redakti- Oficiala retejo
- La Centra Oficejo en Wikimapia
- Gazetara komuniko de UEA pri la filmo pri la Centra Oficejo Arkivigite je 2010-06-13 per la retarkivo Wayback Machine realigita de Peter Baláž
- Vivo en la Centra Oficejo Arkivigite je 2016-03-05 per la retarkivo Wayback Machine – artikolo de Kjell Heggvold Ullestad