Zum Inhalt springen

Retingsselskep fuar Seefaarers (DGzRS)

Faan Wikipedia
(Widjerfeerd faan DGzRS)
Söl'ring
Retingsselskep fuar Seefaarers
DGzRS-Logo
Kuurt Noom DGzRS
Deutsche Gesellschaft zur Rettung Schiffbrüchiger
Sen fan di Selskep Retingsaarber üp See
Grünlair 29. Mai 1865
Grünlair ön Kiel
Hauptkontoor 28199 Bremen
Ön't Nat http://www.seenotretter.de/
Noom aur Funk Bremen Rescue


Di Retingsselskep fuar Seefaarers es en hiilendal priwāti Foriining, wat aural bi di Dütsk Weeterkanten Retingsskeepen en di Lir diartö heer, wat help, wan jen üp See ön Nuar kumt.

Di kuurt Noom es DGzRS (Dütsk: Deutsche Gesellschaft zur Rettung Schiffbrüchiger). Di DGzRS es ön Dütsklön töstendig fuar di Tiinst SAR (Search and Rescue), wat et aural üp Wārel jeft.
Di Selskep fo höör Jil bluat fan dit, wat di Lir fan salev dö (Skeenkingen). Litjet wat kumt bitö, wan di Justiz jen fordonert en bitaali wat hentö di DGzRS.
Di Bundspresident es Skeremher aur di DGzRS. Prominenti Lir aarberi, ark fuar en Jaar, üs "Bootschafter" (Dit jit sa!). Dit jit, dat ja Reklāmi fuar di Selskep maaki en diar niin Jil fuar nem.

Skeepen

[Bewerke | Kweltekst bewerke]

Di DGzRS heer masi Skeepen en Buati, en di ken em jir ek ali weegi. Fuar't Miist sen di Skeepen üs Klasen iindiilt, wat jir tö biluki sen.
Nii sen ön di leest Jaaren di 36-Meeter- en di 20-Meeter-Klasi konstruiaret uuren. Fan di 20-Meeter Skeepen uur jüst (2012/13) en Seerie fan fjuur Stek becht. Ja sen lechter en en bet laangsemer uuren. Senerk di Elektrik es hiilendal nii.(Se uk öner "Foraneringen")

  • Di Hermann Marwede (46 m) ön Heliglön.
    Di Hermann Marwede (46 m) ön Heliglön.
  • SK 32 Harro Koebke, en Skep fan 36 m, bi di Fassmer-Werft, wat et becht heer.
    SK 32 Harro Koebke, en Skep fan 36 m, bi di Fassmer-Werft, wat et becht heer.
  • Di Berlin es 27,5 Meeter lüng. Jü faart fan Cuxhaven.
    Di Berlin es 27,5 Meeter lüng. Jü faart fan Cuxhaven.
  • Di Minden (23,3 Meeter-Klasi) ön di Haawen fan List (Söl').
    Di Minden (23,3 Meeter-Klasi) ön di Haawen fan List (Söl').
  • Di Theo Fischer (23,3 m) liit ön Darßer Ort bi di Uastersee.
    Di Theo Fischer (23,3 m) liit ön Darßer Ort bi di Uastersee.
  • Sent Nowember 2013 heer List üp Söl' en nii Retingsskep (SK 34), di Pidder Lüng, en 20-Meeter-Skep jüst sa üs des.
    Sent Nowember 2013 heer List üp Söl' en nii Retingsskep (SK 34), di Pidder Lüng, en 20-Meeter-Skep jüst sa üs des.
  • Dit 10,1-Meeter-Buat Hans Heiner Kneten liit ön Hörnem üp Söl'. Des Buat uur fan iarenamtlichi Helpers faart.
    Dit 10,1-Meeter-Buat Hans Heiner Kneten liit ön Hörnem üp Söl'.
    Des Buat uur fan iarenamtlichi Helpers faart.
  • Des Buat Neuharlingersiel (9,50 m) liit söner Liren ön di Haawen, en wan Help brükt uur, da giar en iarenamtlich Helper hen en faart üt.
    Des Buat Neuharlingersiel (9,50 m) liit söner Liren ön di Haawen, en wan Help brükt uur, da giar en iarenamtlich Helper hen en faart üt.
  • En Bibuat, di Marie Luise Rendte, 8,50 m, Kiel-Schilksee
    En Bibuat, di Marie Luise Rendte, 8,50 m, Kiel-Schilksee
  • Di Hecht faart üp en Bodden, hur dat Weeter ek olter diip es. Jü heer 7 Meeters en liit ön Zinnovitz (Mc Pom).
    Di Hecht faart üp en Bodden, hur dat Weeter ek olter diip es. Jü heer 7 Meeters en liit ön Zinnovitz (Mc Pom).
  • Ön di nii 20-Meeter-Skeepen faar lechter Buati me, sa üs di Dora (Ueckermünde). Ja haa en hart Kiil, en di Rest es fan Gumi maaket.
    Ön di nii 20-Meeter-Skeepen faar lechter Buati me, sa üs di Dora (Ueckermünde). Ja haa en hart Kiil, en di Rest es fan Gumi maaket.

Hurfan dit bitaalet uur

[Bewerke | Kweltekst bewerke]

Ön di Birocht fan di DGzRS aur 2011[1] stuunt des:

En Saamlibuat ön en Breevmark.
Jil fan Saamlingen en Skeenkingen ön't Jaar 2011
Prozent Miljoonen € Fan
78,8 14,853 Friiweligi Bidrachen/Skeenkingen
5,6 1,053 Kondolens- of Jubileeums-Skeenkingen, forāreft Jil
8,3 1,554 Bidrachen fan di Reederiien
5,0 0,946 Saamlibuati
2,3 0,434 Breekjil (Justiz)
100 18,840 Töhop

Hiilendal her di Retingsselskep ön't Jaar 2011 ombi 34,3 Miljoonen € fuar höör Aarber.
Fan ark Euro uur 85 ct fuar di Retingsaarber brükt, ombi 5 ct fuar di Kontoorsaarber en 10 ct fuar Reklāmi.


Retingsaarber (Jaar 2012)

[Bewerke | Kweltekst bewerke]

Di Retingsselskep heer 61 Skeepen en Buati bi Nuurđ- en Uastersee, sa üs uk bi hok "Swet"-Weetern.
Des sen ön't Jaar 2012 2.117 maal ütfaart, wan Help brükt waar.

  • 60 Mensken wiar mal ön Nuar üp See en waar holpen
  • 1.075 Liren wiar ön Gifaar, hur di DGzRS jam wechhaali kür
  • 396 Mensken wiar kraank of her jam siir dönen en waar fan Ailönen en Haligen hentö't Fastlön faart

Wan di Aamringers Jungen fo skel, da uur jaa somtirs me't Retingsskep hentö't Kraankenhüs ön Wyk faart.

  • 72 Skeepen en Buati kür retet uur, dat di ek forleesen ging
  • 1.017 maal Help fuar forskelig Faartjüchen üp See (Surfbuurter esf.)
  • 492 maal iinset uuren fuar Liren üp See tö sjuk, Skeepen en Buati hentö di Haawen tö slipi of oftöseekeri
  • Ön't Jaar 2012 waar 2.999 Kontrolfaarten maaket.

Foraneringen

[Bewerke | Kweltekst bewerke]

Di Skeepen, wat nü jit faar (Ja uur bihölen, bit dat ja ombi 30 Jaaren ual sen), haa aaftinoch[2] Rümen, hur em ön uuni ken. Dit maaket di Skeepen swaar, en em brükt muar Diesel en gurter Maskiinen, dat di gau inoch önerwai sen.
En üđer swaari Diil es dat Buat, wat mefaart. Des wel em uk lechter haa, dat dat gurt Skep wat litjer becht uur ken.
Nü (2012/2013) skel fuar di 23,3-Meeter-Skeepen sok me 20 Meeter kum. Achtern faart da en Gumibuat me hart Kiil me, en fuar di Retings-Seelir uur Hüüsinger becht.
Di nii Skeepen fo uk en Bus-Systeem fuar jaar Elektrik. En Reekenmaskiin stjüürt diar bi ali Forbrükers en Funktsjoonen ön, sa dat em mener Kābel brükt en muar me di forskelig Giraaten bigen ken. Sawat es bi forskeligi Autos ombi sent 2005 iinbecht.

Di Retingsselskep üp Söl'

[Bewerke | Kweltekst bewerke]

Üp Söl' heer di DGzRS tau Statsjoonen: List en Hörnem.
Ön List wiar bit Detsember 2013 bitaaleti Seefarers ön di Minden en teevti, dat wat pasiareti, hur ja help kür. Ön't Jaar 2013 waar dit Hüs fan di DGzRS man tö en uuning ombecht, en en nii Skep, di "Pidder Lüng" kām üp Stair fuar di Minden. Des Skep heer niin Uuning muar, en dit es uk en bet kuurter üs di Minden (20-Meeter-Klas). Fan List uur uk Kontrolfaarten maaket.
Ön Hörnem es dit en Ker fan aacht Hörnemer Borigers, hoken di DGzRS önrööpi ken, wan dat Buat, wat diar liit, üt faar skel en Help. Diarom staant ön di Statsjoon uk en Telefoonnumer fan Bremen, hur aliweegen jen sit en Önrööpen āpnemt.

  • Dit Hüs, hur di Retingsliren fan Hörnem raaki. Jir lii uk di Giraaten, wat fuar di Retingsaarber brükt uur.
    Dit Hüs, hur di Retingsliren fan Hörnem raaki. Jir lii uk di Giraaten, wat fuar di Retingsaarber brükt uur.
  • Dit 10,1 m-Retingsbuat ön di Haawen fan Hörnem.
    Dit 10,1 m-Retingsbuat ön di Haawen fan Hörnem.
  • Dit 23,3 Meeter-Skep Minden ön List.
    Dit 23,3 Meeter-Skep Minden ön List.
  • Di Lister Statsjoon fan Uasten. Jir skel di Skepsliren uuni, wan dit nii 20-Meeter-Skep klaar es.
    Di Lister Statsjoon fan Uasten. Jir skel di Skepsliren uuni, wan dit nii 20-Meeter-Skep klaar es.
  • Di Lister Hali fan di üđer Sir: En gurt Düür en masi Plaats fuar Giraaten.
    Di Lister Hali fan di üđer Sir: En gurt Düür en masi Plaats fuar Giraaten.

Ön dit 10,1 Meeter-Buat es dit Rööpteeken (DH 2306) fuarn üp dit Taak fan di Kabiini henmaalet, dat em dit uk fan di Lucht keen ken. Sa es dit bi di Retingsskeepen fuar't Miist maaket, aurdat SAR[3]-Aarber jaa me Skeepen en ön di Lucht (Me Hubskrüüwers) maaket uur. Boowen ön di Galerii fan di Skeepen es dit bi di Hecht gur tö keen.

Listi fan di Bootschafters

[Bewerke | Kweltekst bewerke]

Jir sen Noomen fan Lir, wat ark fuar en Jaar üs Iarenamt Reklāmi fuar di DGzRS maaket haa.

Jaar Noom Bruarwening
2000 Reinhard Mey Leedji-Skriiwer
2001 Jörg Kachelmann Moderātor, Journalist
2002 Carmen Nebel TV-Moderātor
2003 Godewind Ker fan Musikspölsters
2004 Otto Sander Film- en Theaaterspölster
2005 Achim Reichel Musiker, Komponist, Produzent
2006 Birgit Fischer Kanu-Sportler
2007 Jan Fedder Film- en Theaaterspölster
2008 Thomas Schaaf Footbaltrainer
2009 Bettina Tietjen TV-Moderātor
2010 Tim Mälzer TV-Smuutji
2011 Uwe Friedrichsen Film- en Theaaterspölster
2012 Frank Schätzing Bokerskriiwer
2013 Yared Dibaba TV-Moderātor
2014 Klaus Lage Musiiker
2015 Deutsche Kammerphilharmonie Bremen Orkester

Luki uk jir

[Bewerke | Kweltekst bewerke]

Futnooten

[Bewerke | Kweltekst bewerke]
  1. ↑ Jaaresbirocht fan di DGzRS. Archiwiaret faan det originool di 19. Maarts 2013. Ufrepen di 9. Maarts 2013.
  2. ↑ Rümen fuar di Manskep sen üp 23,3- en 46-Meeter-Skeepen iinbecht. Diarfuar kum nü di 36- en di 20-Meeter-Skeepen.
  3. ↑ Search And Rescue, Sjuk en reti
Diheer artiikel luanet det leesen.
Didiar artiikel as di 01.08.2013 uun det list faan gud artiikler, diar det leesen luane apnimen wurden. Uun uugenblak jaft at diar 73 faan.
Faan „https://frr.wikipedia.org/w/index.php?title=Retingsselskep_fuar_Seefaarers_(DGzRS)&oldid=245560“