Vicipéid na Catalóinise

Baill de Amical Viquipèdia sa Mheitheamh, 2014 agus iad ag glacadh an Ghradam Náisiúnta Cultúir arna bhronnadh go bliantúil ag rialtas réigiúnda na Catalóine.

Leagan as Catalóinis den chiclipéid phoiblí ilteangach Vicipéid is ea Vicipéid na Catalóinise (Catalóinis: Viquipèdia en català). Viquipèdia en valencià a thugtar uithi freisin mar aitheantas ar an leagan den teanga a labhraítear i ndeisceart na gcríoch Catalónach. Tháinig sí ar an bhfód ar 16 Márta 2001, roinnt nóiméad i ndiaidh Vicipéid na Gearmáinise. Is iad sin an chéad dá Vicipéid a cuireadh ar siúl i ndiaidh do Jimmy Wales a fhógairt go raibh cead leaganacha den Vicipéid a bhunú i dteangacha eile seachas an Béarla. Ar feadh cúpla mí, ba í Vicipéid na Catalóinise an t-aon cheann seachas Vicipéid an Bhéarla a raibh ailt le léamh ann: “l’ábac” (an t-abacas) an chéad alt. Ar 24 Deireadh Fómhair na bliana 2014, bhí 439.869 alt agus 180,405 úsáideoirí cláraithe inti.