Barry McGuigan
.jpg)  | |
| Beathaisnéis | |
|---|---|
| Breith | 28 Feabhra 1961 63 bliana d'aois Muineachán, Éire |
| Faisnéis phearsanta | |
| Airde | 168 cm |
| Gníomhaíocht | |
| Gairm | dornálaí |
| Tír spóirt | Éire an Ríocht Aontaithe |
| Spórt | dornálaíocht |
| Disciplín spóirt | cleitmheáchan |
| Ghlac sé/sí páirt i | |
| 1980 | Cluichí Oilimpeacha an tSamhraidh 1980 |
| Teaghlach | |
| Páiste | Danika McGuigan, Shane McGuigan |
| Athair | Pat McGuigan |
Gradam a fuarthas | |
 | |
Dornálaí as Cluain Eois ba ea Barry McGuigan agus ina bhainisteoir agus ina phoiblitheoir ó shin.
Rinneadh curadh an domhain sa rannóg cleitmheáchan de i gCraobh Dornálaíochta an Domhain sa bhliain 1985.
Mar dhornálaí proifisiúnta bhuaigh McGuigan 32 troid as 35. Bhuaigh sé 28 acu le buillí scoir [1]. Bhain McGuigan go leor gradam aitheantais fosta. Rinneadh ball de i Halla Chlú na Dornálaíochta Idirnáisiúnta.
Is saoránach de chuid an Ríocht Aontaithe é McGuigan (tá saoránacht Éireannach air chomh maith). Mar sin throid McGuigan ar son na hÉireann agus ar son na Breataine chomh maith.
Óige
Rugadh Barry (Finbarr) McGuigan i gCluain Eois, Contae Mhuineacháin, ar 28 Feabhra 1961. Mar dhornálaí amaitéarach, throid McGuigan le clubanna éagsúla thuaidh agus theas.
Throid Barry McGuigan le foireann Thuaisceart Éireann sna Cluichí Comhlathais sa bhliain 1978. Throid sé le foireann na hÉireann sna cluichí Oilimpeacha i 1980.
Is i mBéal Feirste is mó a bhí a lucht leanúna ann. Bhí McGuigan ábalta a dhéanamh fosta tacaíocht mhór a fháil ó Phrotastúnaigh agus ó Chaitlicigh. Rugadh McGuigan ina Chaitliceach agus phós sé bean Phrotastúnach. Níor chaith sé dathanna ná bratacha a dhéanfadh Caitliceach ná Protastúnach de.
Dornálaí proifisiúnta
Thiontaigh McGuigan ina dhornálaí proifisiúnta i 1981 agus is i mBaile Átha Cliath a bhain sé a chéad troid phroifisiúnta.
Bhain sé troid eile ansin agus bhí sé ar an bhealach mar dhornálaí proifisiúnta mar is ceart. Ach cuireadh sin siar go mór nuair a chaill sé troid chonspóideach in éadan Peter Eubanks i Londain. Ach bhain sé cúpla troid eile ina dhiaidh sin in éadan daoine eile. Fuair sé troid eile in éadan Eubanks agus an t-am seo bhuail sé é. Díoltas!
Bás Young Ali
I rith na bliana 1982, throid Barry McGuigan dornálaí Nigéireach darbh ainm Young Ali. Leag fear Chluain Eois amach a chéile comhraic sa 6ú babhta,[2] thit Ali i laige le buille scoir agus níor tháinig sé chuige féin arís. Bhásaigh Young Ali mhí dar gcionn. Go gairid ina dhiaidh sin ba é McGuigan seaimpín an domhain.
Chuaigh an bás go mór i bhfeidhm ar McGuigan. Deir sé fós nach bhfuil lá dá dtagann nach smaoiníonn sé ar Young Ali agus ar a mhuintir.
Craobh an domhain
Sa bhliain 1983 bhain McGuigan craobh na Breataine. I 1984 throid sé in éadan Valerio Nati i mBéal Feirste i gcraobh na hEorpa (EBU) cleitmheáchan. Bhain sé sin fosta.
Sa bhliain 1985 fuair sé an iarraidh ar an gcraobh an domhan chun troid in éadan churadh an domhain Eusebio Pedroza i Londain ar 8 Meitheamh 1985. Troid fhíochmhar a bhí ann a mhair 15 bhabhta. Bhain McGuigan an troid le cinneadh na mbreitheamh. Rinneadh ‘duine spórtúil na bliana’ de chuid an BBC de.
Crios caillte ag McGuigan
Rinne McGuigan cúpla cosaint ina dhiaidh sin. Ansin, b’éigean dó dul go Las Vegas le troid in éadan Stevie Cruz as Texas. Tharla an troid faoi theas bocht agus ní raibh McGuigan ábalta cur suas leis. Choinnigh McGuigan dul go dtí an babhta deireanach.
Chaill McGuigan an cinneadh. Bhí McGuigan chomh lag sin i ndiaidh na troda go raibh air dul chuig an ospidéal tamall le díhiodráitriú.
Lean McGuigan ag troid idir 1988 – 1989. Bhain sé cúpla troid ach chaill sé in éadan Jim McDonnell sa deireadh agus d’éirigh sé as dornálaíocht go deo ansin.
Tagairtí
- ↑ NIcurriculum.org.uk
- ↑ "An spórt féin anois ar aghaidh na bpiléar…" (ga-IE). Tuairisc.ie. Dáta rochtana: 2019-06-08.