Alþingiskosningar 1995

Alþingiskosningar 1995 voru kosningar til Alþingis Íslendinga sem fóru fram 8. apríl 1995. Á kjörskrá voru 191.973 manns. Kosningaþátttaka var 87,4%. Í þessum kosningum bauð fram nýtt stjórnmálaafl, Þjóðvaki, klofningsframboð úr Alþýðuflokknum undir stjórn Jóhönnu Sigurðardóttur og Ágústs Guðmundssonar, fékk fjóra þingmenn en Alþýðuflokkurinn missti þrjá. Þrír þessara Þjóðvakaþingmanna gengu síðar á kjörtímabilinu í „þingflokk jafnaðarmanna“ ásamt þingmönnum Alþýðuflokksins. Kvennalistinn fékk ekki nema þrjár þingkonur - missti tvær frá fyrra kjörtímabili.

Stjórnarmyndun

Sjálfstæðisflokkurinn og Alþýðuflokkurinn fengu samanlagt nægilegan fjölda þingsæta til þess að Viðeyjarstjórnin hefði haldið velli, en aðeins með eins manns mun. Eftir kosningarnar fór Davíð Oddsson með stjórnarmyndunarumboð fyrir Sjálfstæðisflokkinn og myndaði ríkisstjórn með Framsóknarflokknum undir forystu Halldórs Ásgrímssonar. Nýja ríkisstjórnin hafði þannig 40 þingmanna meirihluta.

Sameining á vinstri vængnum

Eftir kosningarnar fóru viðræður um sameiningu flokkanna fjögurra á vinstri vængnum í eina Samfylkingu á fullt skrið og lauk með því að þessir flokkar gerðu með sér kosningabandalag í kosningunum 1999. Í sveitarstjórnarkosningunum árið 1994 höfðu þrír þessara flokka, auk Framsóknarflokksins, gert með sér kosningabandalag í Reykjavík og haft sigur undir merkjum Reykjavíkurlistans.

Flokkur		Atkvæði	%	Þingmenn
Alþýðu­flokkurinn		18.846	11,4	7
Framsóknar­flokkurinn		38.485	23,3	15
Sjálfstæðis­flokkurinn		61.183	37,1	25
Alþýðu­bandalagið (og óháðir)		23.597	14,3	9
Kvennalistinn		8.031	4,9	3
Þjóðvaki		11.806	7,2	4
Aðrir og utan flokka		3.095	1,9	0
Alls		152.722	100	63

Forseti Alþingis var kjörinn Ólafur G. Einarsson, Sjálfstæðisflokki

Fyrir: Alþingiskosningar 1991

Alþingiskosningar

Eftir: Alþingiskosningar 1999

Önnur minni framboð

Náttúrulagaflokkurinn

Heimildir

• Hagstofa Íslands

Tenglar

• Alþingiskosningar 1995 - úrslit; grein í Morgunblaðinu 1995
• Kosningahandbók; birtist í Morgunblaðinu 1995