Arnaldur Indriðason

Arnaldur Indriðason (fæddist þann 28. janúar 1961 í Reykjavík) er íslenskur spennusagnahöfundur og sagnfræðingur. Arnaldur lauk BA-prófi í sagnfræði frá Háskóla Íslands árið 1996 og starfaði við Morgunblaðið frá því hann útskrifaðist úr Menntaskólanum við Hamrahlíð árið 1981, ýmist í lausamennsku eða fullu starfi. Hann var kvikmyndagagnrýnandi blaðsins frá 1986–2001. Hann er sonur Þórunnar Ólafar Friðriksdóttur og Indriða G. Þorsteinssonar rithöfundar.

Arnaldur hefur sent frá sér tólf skáldsögur sem allar eru spennusögur. Skáldsögur hans hafa verið þýddar á nokkur tungumál og hlotið góðar viðtökur, sérstaklega í Þýskalandi. Hann hefur einnig unnið útvarpsleikrit upp úr nokkrum bóka sinna sem Leiklistardeild ríkisútvarpsins hefur flutt. Kvikmynd einnar skáldsögu hans, Mýrinnar, í leikstjórn Baltasars Kormáks var frumsýnd árið 2006.

Arnaldur hlaut Glerlykilinn, Norrænu glæpasagnaverðlaunin, fyrir Mýrina árið 2002 og aftur ári síðar fyrir Grafarþögn.

Árið 2005 hlaut hann Gullrýtinginn frá Samtökum glæpasagnahöfunda fyrir ensku útgáfuna af Grafarþögn.

Skáldsögur

• 1997 – Synir duftsins
• 1998 – Dauðarósir
• 1999 – Napóleonsskjölin
• 2000 – Leyndardómar Reykjavíkur 2000 (kafli í spennusögu eftir nokkra höfunda)
• 2000 – Mýrin
• 2001 – Grafarþögn
• 2002 – Röddin
• 2003 – Bettý
• 2004 – Kleifarvatn
• 2005 – Vetrarborgin
• 2006 – Konungsbók
• 2007 – Harðskafi
• 2008 – Myrká
• 2009 – Svörtu loft