Orania

Orania es la color entre roja e jala en la spetro de lus vidable. En depinta e la teoria de colores tradisional, lo es creada par combina roja e jala. Sua nom es derivada de la fruta orania. Lo es la color de carotas, abricocas, e la spesie de zucas usada comun per la vijila de tota santas. Longo sondas en Europa e la SUA, orania es la color la plu asosiada con diverti, noncostumales, estrovertis, caldia, foco, enerjia, ativia, peril, sabor e bon odor, autono, e protestantisme. Lo es la color nasional de Nederland e la Casa de Orania-Nassau. En Asia lo es un color simbolin importante de budisme e induisme.

Istoria e arte

En Egipte antica, artistes ia usa un pigmento mineral orania, nomida realgar, per depintas en tombas e per otra usas. Lo ia es ance usada a pos par artistes medieval per colori manoscritos. Pigmentos ia es ance creada en la eda antica de un mineral nomida orpimento. Orpimento ia es un ben importante en la Impero Roman e ia es usada como un medica en Xina, an si lo conteni arsenico e es multe nosiva. Lo ia es ance usada como un venena per moscas, e per veneni flexas. Par causa de sua color jala-orania, lo ia es ance un prefereda de alcimicistes ci ia xerca un modo de crea oro, en e Xina e en la mondo ueste.

Ante la tarda de la sentenio 15, la color orania ia esiste en Europa, ma sin la nom; lo ia es simple nomida jala-roja. Mercatores portuges ia trae la oranios prima a Europa de Asia en la tarda de la sentenio 15 e la temprana de la sentenio 16, con la parola sanscrito naranga, cual, par la parola arabi nāranj, ia deveni gradal un parte de alga linguas european: arancia en italian, naranja en espaniol, laranja en portuges, e orange en franses e engles.

Colores											cambia
Negra	Gris	Blanca	Ros	Purpur	Blu	Azul	Verde	Jala	Orania	Roja	Brun