Gooj week
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
De Gooj week ies bie de Katholieke de week, die begint op Paumezóndig en die eindig op Paosjdaag. Ander name zint passieweek en Sjtil week. In dees week weurt speciaal aandach gegeve aan 't lieje van Jezus, veural op Goje vriedig.
Wiette dónderdig
De dónderdig in dees week weurt Wiette dónderdig geneump, vanwege de kleur wiet in de liturgie van daen daag. In de kèrkelike vieringe weurt dan o.a. 'n wiet kasuifel gedrage, in tegesjtèlling tot de 40 aafgeloupe vastedaag, die in 't paars plaatsvónge.
In de biebel vingk op dezen daag 't lètste aovendmaol plaats. 't Gezamelik ete van Jezus mèt zien apostele. In de liturgie weurt dan de insjtèlling van de Heilige Mès en van 't preestersjap gevierd.
Goje vriedig
De vriedig veur Paosje hèt Goje vriedig. Op deze daag weurt herdach, dat Jezus aan 't kruus ies gehange. Um drie oer in de mieddig vinge (boete)vieringe plaats in de kèrk. Op daen daag weurt de kruusweeg geloupe. Dat ies 'n wandeling mèt gebed langs de kruusweegsjtasies in 'n kèrkgeboew of langs 'ne boete-kruusweeg. Goje vriedig ies bie de katholieke 'ne verpliechde vastendaag.
Paosjzaoterdig
Paosjzaoterdig weurt ouch waal Goje zaoterdig geneump. Folklore: De kèrkklokke kière truuk van hun reis oet Roame en sjtruie eier oet veur de kinger, die dees dan maoge zeuke en rape.
Passiesjpel
't Leve van Jezus in zien lètste daag weurt oetgebeeld in de Passiesjpele, die o.a. in Tegele in Nederlands Limburg um de vief jaor weure opgeveurd.
Passiemuziek
Passiemuziek ies de gezónge teks, dèks instrumentaal begeleid, van gedeiltes oet de evangelies. De tekste höbbe betrèkking op 't lieje van Jezus Christus, dat veural in de passietied en de passieweek bie de Katholieke weurt herdach.
Versjillende componiste höbbe dat op muziek gezat, zoa-es Johann Sebastian Bach mèt de Johannes-Passion oet 1723 en de Mattheus-Passion oet 1729 en de passion van Schütz.