Dreesdje
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
![](http://upload.wikimedia.org/wikipedia/commons/thumb/2/22/Dresden_Frauenkirche.jpg/220px-Dresden_Frauenkirche.jpg)
Dreesdje (Duutsj: Dresden; Sorbisch: Drježdźany) is de houfstad vanne Duutsje deilstaot Vriestaot Sakse. Ze ligk in 't zuje van 't veurmaolig Oeas-Duutsjlandj in 't reveerdaal vannen Elbe, oppen euvergank vanne baoven- en middelloup vanne reveer en in 't euvergangsgebied tösse de Naord-Duutsje Lieëgvlaakdjes enne Middelberg.
Archeologisch vónjsten in 't hujig stadsgebied wieze d'rop det de ieëste miensjelike beweuning stamp oete steintied. De ieëste historische vermeljing vanne stad Dreesdje kump oet 1206. 't Waas de regeringszetel vanne Saksische keurvorstendómme, 't later Keuninkriek Sakse en dieëj ouch deens es de houfstad vanne Saksische Rippeblieke.
Allewiel is Dreesdje, naeve Leipzig, ein vanne twieë groeate kaerstej van Sakse. Väöl wichtige kultureel staotsinstèllinge zeen hie gevèstig, naeven e groeate deil óngerrichsinstèllinge. Wiejer is Dreesdje e wichtig industrieel en commercieel centrum.
Me verwies döks nao de stad es Elbflorenz, 'ne bienaam womit de stad wuuert vergeleke mitte Italiaanse stad Florence, waat 'n verwiezing is nao de barokke en rococo-arsjitektuur vanne stad.
Innen Twieëdje Werreldkrieg haet de stad zwaor gelejen ónger e controversieel massabómbardemènt van 13 en 15 fibberwarie 1945 dore Ingelse. Hiebie woort gebroekgemaak van brandjbómmen en zwaor explosieve; óngere slechoffers wore veural vróljen en kinjer en woort bao de ganse stad verinnerweerdj. Later haet me väöl bildjbepaolendje boewwerke trögkgeboedj.
In augustus 2002 haw de stad las van 'n erg euverstruiming dore raengeval in 't struimgebied vannen Elbe.