Kayu manih

Kayu manih
Cinnamomum verum
Data
Sumber dari	kulik manih, ekstrak kulik kayu manih, minyak kulik manih jo kulik kayu manih
Tumbuahan
Jenis buah	Buah beri
Taksonomi
Divisi	Tracheophytes
Subdivisi	Spermatophytes
Klad	Angiosperms
Klad	magnoliids
Ordo	Laurales
Famili	Lauraceae
Genus	Cinnamomum
Spesies	Cinnamomum verum J.Presl, 1825
Tata namo
Sinonim takson	Cinnamomum zeylanicum

Cinnamomum verum, Cinnamomum zeylanicum, atau nan jo namo awam disabuik kayu manih sailan adolah spesies tumbuahan babatang kayu nan tamasuak dalam kaluarga Lauraceae. Dalam imbauan saari-ari tumbuhan iko cukuik diimbau kayu manih sajo, dek dalam padagangan internasional kayu manih jinih ko disabuik sabagai kayu manih nan sabananyo dibandiangkan jo spesies dari genus cinnamomum lainnyo. Sasuai jo namo ilmiahnyo, tumbuahan iko barasa dari Sailan (Sarilanka).

Salamo barabaik-abaik silam, kayu manih alah dibaok dari Sailan ka babagai wilayah untuak dibudidayokan. Bagiannyo nan dapek dipagunokan adolah kulik kayu nan disabuik kulik manih. Dari kulik manih iko dapek dijadian rampah untuak makanan, minyak atsiri, jo ubek.

Amo jo panyakik

Kanker barih

Kanker barih atau kanker baris adolah panyakik pado uret kayu manih. Panyakik ko acok muncual di parak kayu manih rakyaik di bukik nan baiklim lambok sapanjang taun. Panyakik iko disababkan dek virus Phytophthora cinnamomi nan manyarang malalui luko urek kayu. Panyakik iko manyarang tumbuahan nan barumua 2--3 taun. Salain itu, panyakik ko muncua jo pado tumbuahan nan baurek nan indak dalam sarato jo sistem buangan aia nan kurang rancak.

Gajalo jo tando panyakik nan muncua antaronyo pado kulik batang muncua garih garih itam saleba 5 cm. Garih-garih itu muncua dari kulik batang dakek lihia aka inggo manjala sampai 15 cm. Kudian kambium batang ka mangariang sarato kayu di bawahnyo mati. Pado tumbuahan nan masih mudo, tampak daun manguniang jo layua. Daun nan ka baru tumbuah manjadi indak normal sarato ukuran ketek nan bacabang kariang. Dampak dari sarangan iko mambuek kualitas kulik manih manurun.

Panagahan dapek dilakukan jo mambuek sistem pambuangan aia nan rancak sarato elok-elok katiko manyabik rumpuik atau samak di sakaliliang urek supayo urek indak taluko. Urang parak paralu managah tasebanyo panyakik katiko alah ado tumbuahan nan tapindah panyakik ko. Tumbuahn nan masih mudo dapek dicabuik sarato dibaka di lua parak untuak managahnyo. Samantaro tumbuahan nan alah cukuik umua untuak sagiro dipanen kuliknnyo sajo lalu ditabang. Kudian hasia potongannyo dibaka supayo panyakik indak tapindah ka batang nan lain. Pangandalian sacaro rutin paralu dilakukan untuk managah maluehnyo panyakik. Sacaro kimiawi dapek dibantu jo fungisida.

Cindawan upeh

Panyakik cindawan upeh atau jamur upas adolah panyakik nan acok manyarang rantiang jo cabang kayu manih pado iklim nan sangek lambok atau parak nan padek. Panyabab panyakik iko adolah cindawan Corticium yavanicum atau cindawan upeh.

Tando jo gajalo panyakik ko adolah tanaman tampak barono sirah mudo. Pado rantiang jo cabang tampak salampih cindawan nan kadang malingkuangi rantiang jo dahan. Kok ukuran rantiang jo dahan talmapau kete, mangko tumbuahn capek mati. Kok manyarang tanaman nan cukuik gadang, tanaman dapek cegak. Panyakik ko dapek lanyok pado iklim carah dan dapek dilawan jo mamotong rantiang satao cabang nan tajangkik.

Galeri

• 
  Daun kayu manih (Cinnamomum verum)
• 
  Daun kayu manih (Cinnamomum verum)
• 
  Kulik, bubuak, sarato bungo kariang dari kayu manih (Cinnamomum verum)