Лорд

Lorde
Lorde Roskilde фестивалын үеэр, 2017 он
Ерөнхий мэдээлэл
Төрсөн нэр	Ella Marija Lani Yelich-O'Connor
Төрсөн	1996 оны 11 сарын 7 (1996-11-07) Аукланд, Шинэ Зеланд
Харьяалал	Шинэ Зеланд
Хөгжмийн урсгал	арт поп инди поп электропоп алтернатив
Мэргэжил	дуучин дуу зохиогч
Идэвхтэй	2012 – одоог хүртэл
Студи	Universal Music Group Lava Republic
Хамтардаг уран бүтээлчид	Жоел Литтл Жек Антонофф Калид
Цахим хуудас	lorde.co.nz

Ella Marija Lani Yelich-O'Connor буюу Элла Мария Лени Елич-О'Коннор нь (1996 оны 11-р сарын 7-нд төрсөн), бидний сайн мэдэх Lorde (Лорд) хэмээх тайзны нэрээрээ дэлхийд танигдсан, Хорват/Шинэ Зеланд гаралтай дуучин/дуу зохиогч билээ. Тэрбээр багаасаа дуулах сонирхолтой байсан бөгөөд өсвөр насандаа Universal Music Group-д нэгдэж, түүний продьюсерээр Жоел Литтл ажиллахаар болжээ. Lorde дөнгөж 16 насандаа анхныхаа EP болох The Love Club EP (2012)-ийг цацсан нь Шинэ Зеланд болон Австрали улсуудын чартын хоёрдугаарт бичигдэж байв.

Түүний анхны сингл нь "Royals" байсан ба энэ сингл дэлхий даяар хит болж чадсанаас гадна Lorde АНУ-ын хөгжмийн чарт болох Billboard-ийг тэргүүлсэн 1987 оноос хойшх хамгийн залуу дуучин болж чаджээ. Түүний дебют цомог нь 2013 онд Pure Heroine нэртэйгээр цацагдаж байсан ба хөгжмийн шүүмжлэгчдээс онц сайн үнэлгээг авч байсан энэ цомог нь худалдаанд гарсан эхний долоо хоногтоо Шинэ Зеланд болон Aвстрали улсуудын чартыг тэргүүлж АНУ-д гуравдугаарт бичигдэж байсан аж. Тухайн жилдээ Lorde The Hunger Games киноны цомгийн ажилд оролцсон ба 2014 онд энэхүү цомог The Hunger Games: Mockingjay – Part 1 нэртэйгээр цацагдаж, тэргүүн сингл нь Lorde-ийн "Yellow Flicker Beat" байв. Гурван жилийн дараа буюу 2017 оны 6-р сарын 16-нд Lorde Melodrama нэртэй цомгоо гаргасан юм. Энэ цомгийн тэргүүн сингл "Green Light" нэртэйгээр 3-р сард цацагдаж байжээ. Melodrama цомгийн ерөнхий продьюсераар Жек Антонофф ажилласан ба энэ цомог худалдаалагдаж эхэлсэн эхний долоо хоногтоо л АНУ, Канад, Шинэ Зеланд, Австрали улсуудын чартыг тэргүүлэн, хөгжмийн шүүмжлэгчдээс Кендрик Ламар-ын DAMN. цомгийн хамтаар оны шилдэг цомог гэх цолыг хүртэж байв.

Lorde-ийн хөгжмийн стил нь альтернатив хөгжимтэй салшгүй холбоотой. Тэрбээр хоёр удаагийн Грэмми-ийн шагналт, нэг Brit Awards-ийн шагналт мөн 10 удаа Шинэ Зеландын хөгжмийн наадам-ын шагналтан билээ. 2013 онд тэрбээр Time сэтгүүлийн хамгийн нөлөө бүхий өвсөр настнуудын жагсаалтад багтаж чадсан ба мөн тухайн жилдээ Forbes сэтгүүлийн "30 Under 30" буюу "30-с доошхи насны 30 алдартан"-ы нэгээр тодорч байв.

Карьер ба амьдрал

1996-2008: Бага насандаа

Тэрбээр 1996 оны 11-р сарын 7-нд Шинэ Зеланд улсын Такапуна дүүрэгт барилгын инженер Вик О'Коннор болон Хорват гаралтай зохиолч Сониа Елич нарын охин болон мэндэлжээ. Тэрбээр дээрээ Жерри, Индиа гэсэн 2 эгч болон Анжело нэртэй 1 ахтай ажээ.

5 настайдаа Lorde жүжгийн дугуйланд явж өөрийгөө нээх, илэрхийлэх чадварт суралцжээ. Түүний ээж түүнд үргэлж ном авч өгдөг байсан талаар Lorde хэлэхдээ "Миний ээж миний үг зохиох чадварыг нээж өгсөн гэж би боддог. Учир нь тэр үргэлж надад олон төрлийн ном худалдаж авч өгч байсанд би талархдаг" хэмээн хэлж байжээ.

Мөн тэрээр багадаа нетболл тоглодог байсан ба хожмоо түүний хамтрагч Элиса МкКартни өндрийн харайлтын төрөлд олимпын хүрэл медал хүртсэн байдаг.

2009-2011: Карьерын эхлэл

Lorde болон Луй МкДоналд 2010 онд The Vic Unplugged нэвтрүүлгийн үеэр

2009 оны 5-р сард Lorde болон түүний хамтрагч Луй МкДоналд нар Belmont Intermediate School-ийн урлагийн тэмцээний ялагч болж байжээ. 2009 оны 8-р сарын 13-нд, Lorde болон Луй нар Шинэ Зеландын радиогийн нэвтрүүлэгч Jim Mora-ийн өдрийн ярилцлагад орох урилга авч байв. Тэд энэ нэвтрүүлгийн үеэр Pixie Lott-ийн "Mama Do (Uh Oh, Uh Oh)" болон Kings of Leon хамтлагийн "Use Somebody" дууг коверлэж байв. МкДоналдын аав Иан тэдний гэртээ коверлож хийсэн дуунуудыг Universal Music Group-ийн агент МкЛаклан руу илгээж байсан ба 2009 онд тэд UMG-ийн академид элсэн оржээ. Мөн Lorde Belmont Intermediate School-ийн хамтлагт багтаж байсан ба тэд North Shore Battle of the Bands finals тэмцээнд гуравдугаар байр эзлэж байжээ.

2010 онд тэд "Элла & Луй" нэртэйгээр Шинэ Зеландын кафе болон нэвтрүүлгүүдэд дуулж байсан аж. Дурдвал, 8-р сарын 15-нд The Leigh Sawmill Cafe-д, 8-р сарын 20-нд Roasted Addiqtion Cafe in Kingsland-д, хамгийн том тоглолтоо Victoria Theatre-ийн The Vic Unplugged тайзан дээр хийж байжээ.

Lorde 2011 онд өөрийн зохиосон дуунуудаа The Vic Unplugged II хэвтрүүлгийн үеэр 15 настайдаа дуулж байв.

Lorde жилийн турш долоо хоногт хоёр удаа академидаа тогтмол явж байсан ба хожмоо 2011 онд UMG дасгалжуулагч Frances Dickinson-ийг халсан аж. Энэ хугацаанд тэр хэрхэн үг нийлүүлэх, дууны үг зохиох тал дээрээ анхаарч байв. Тэрээр анх удаа өөрийн зохиосон дуунуудаа олон нийтэд The Vic Unplugged II нэвтрүүлгээр цацжээ. Түүний агент МкЛаклан Lorde-г продьюсер, дуу зохиогч Joel Little-тэй танилцуулж өгснөөр түүний амжилтын гараа эхлэсэн юм. Тэд анх 5 дуутай EP-г гурван долоо хоногийн дотор зохиосон байдаг.

2012-2015: Pure Heroine ба The Hunger Games киноны дуунууд

2013 оны 9-р сард Decibel фестивалийн үеэр.

2012 оны намар Lorde нэгэн EP-г The Love Club гэсэн гарчигтайгаар өөрийн SoundCloud хаягаар үнэгүй татаж авах боломжтой байрлуулсан байна. Тус ЕР 60,000 үнэгүй таталт хийгдсэний дараагаар UMG 2013 оны 3-р сард худалдаанд гаргажээ. Худалдаанд гарсаар удаагүй тус ЕР Шинэ Зеланд болон Австрали улсуудын чартад хоёрдугаарт бичигдэж оргил амжилтаа үзүүлж байв. Тухайн жилийн 6-р сардаа Lorde тус ЕР-ээс "Royals"-ийг сингл болгон цацсан нь Австрали, Шинэ Зеланд төдийгүй дэлхий даяар хит болж, АНУ-ын Billboard чартыг 9 долоо хоног дараалан тэргүүлж байжээ. Энэ амжилт нь түүнийг Billboard чартыг тэргүүлсэн 1987 оноос хойшхи хамгийн залуу дуучин болгож чаджээ. Royals сингл нь 2014 оны Грэмми-ийн шагнал гардуурах ёслолын ажиллагаанд "Оны шилдэг дуу", "Оны шилдэг поп үзүүлбэр" гэсэн хоёр төрөлд ялалт байгуулсан билээ.

2013 оны 9-р сард тэрбээр өөрийн анхны студи цомог болох Pure Heroine цомгоо гаргажээ. Энэ цомог худалдаалагдаж эхэлсэн эхний долоо хоногтоо Австрали, Шинэ Зеланд улсуудын чартыг тэргүүлэхээс гадна, Их Британи, Канад, Ирланд, Норвеги гэх зэрэг орнуудын чартын эхний 5 байранд орсон байна. Харин АНУ-ын Billboard чартын хувьд гуравдугаар байранд бичигдсэнээс гадна дэлхий даяар 2013 онд 1.5 сая хувь, 2014 онд 1.33 сая хувь тус тус борлогджээ.

Pure Heroine цомгийн амжилтын хувьд гэвэл, тус цомгоос 4 сингл цацсан ба эхний сингл "Royals" дэлхий дахины хит болж, үүний дараах сингл "Tennis Court" нь Шинэ Зеланд улсын чартыг тэргүүлсэн бол гурав дахь сингл "Team" улс болгоны чартын эхний 10-т бичигдэж байв. "Glory And Gore" нь В-side дуу (зөвхөн цомгийн Extended Version дээр байрлаж буй) "No Better"-тэй хамт тус цомгийн сүүлийн сингл болон цацагджээ. Мөн оны 9-р сард Lorde Tears for Fears хамтлагийн "Everybody Wants To Rule The World" дууг коверлон дуулсан нь The Hunger Games: Catching Fire киноны дууны цомогт багтжээ. Мөн энэ онд тэрээр зурагчин Жеймс Лов-той үерхэж эхэлсэн байна.

Lorde 2014 оны Lollapalooza наадмын бүрэлдэхүүнд багтаж байжээ.

Мөн оны 12-р сард, Lorde 2 дахь цомгийнхоо ажилд орсон гэж мэдэгдсэн юм. Харин 2014 оны 6-р сард тэрээр хоёр дахь цомгийнхоо талаар хэлэхдээ яарахгүй байгаагаа, мөн дебют цомгоосоо шал өөр цомог болох байх гэж хэлсэн ажээ. 2014 оны эхний хагаст тэрбээр фестивалуудад оролцож эхэлсэн ба дурдвал, Сидней-н Laneway Festival, Хойд Америкийн Lollapalooza, мөн Калифорни мужид болсон Coachella наадмууд юм.

The Love Club EP болон Pure Heroine цомгуудын амжилтын дараа Lorde аялан тоглолт зарлаж эхэлжээ. Тухайлбал 2014 оны эхээр Хойд Америкт, зун Далайн орнуудаар, мөн 8-р сард дахин Хойд Америкт хийгджээ. Мөн 2014 оны 4-р сард тэрээр Нирвана хамтлагийн Рок-н-Ролл-ын алдрын танхимд бичигдэх ёслолд хамтлагийн хамтаар "All Apologies" дууг дуулсан байна.

2014 оны намар, Lorde дахин Lollapalooza наадамд оролцсон нь Чикаго хотод болжээ. Түүнийг шүүмжлэгчид өндрөөр үнэлж байсан бөгөөд Billboard тухайн наадмын шилдэг таван үзүүлбэрийн нэг хэмээн тодотгожээ.

Түүний дараагийн сингл "Yellow Flicker Beat" 2014 оны 9-р сарын 24-нд The Hunger Games: Mockingjay — Part 1 цомгийн эхний сингл болж худалдаалагдаж эхэлжээ. Энэ цомогт түүний 4 дуу байдаг бөгөөд тэрбээр продьюсерээр ажилласан байна. 2014 оны 11-р сард буюу түүний төрсөн өдрөөр тэр 11 сая долларын орлоготой ажилласан гэсэн мэдээлэл гарчээ. 2015 онд Lorde Disclosure хамтлагийн "Magnets" дууг дуулсан бөгөөд энэ нь Disclosure хамтлагийн хоёр дахь цомог Caracal-ийн дөрөв дэхь сингл болон цацагдсан юм.

2016-одоог хүртэл: Melodrama

2016 оны Brit Awards-ын үеэр, Lorde дуучин Девид Боуи-д хүндлэл үзүүлэхээр "Life on Mars" дууг дуулсан байна. Энэ нь Billboard сэтгүүлийн дурдсанаар Lorde 2013 оны өвөл шинэ цомгийн ажил эхэлсэн гэж хэлсэнтэй холбоотой гэж үзжээ. Харин 2016 оны 8-р сард өөрийн Instagram хаягаар шинэ цомгийн тухайд гэвэл дуунууд бичигдсэн, одоо продьюсерлэлтийн шатандаа явж байгааг дуулгажээ. 11-р сард нь тэрбээр өөрийн Facebook аккаунтдаа "Pure Heroine цомог бол миний өсвөр насны амьдрал, ялалт, гутрал, баясал бүгдийг илтгэж чадсан. Амьдралд олдох боломж бүрийг ашиглаж чадвал бид хэзээ ч үхэхгүйг би ойлгосон. Харин хэн ч үүнийг хийж чадахгүй учраас би та нарт шинэ ертөнцийг харуулахыг хүссэн" хэмээн бичжээ.

Үүнээс ердөө 3 сарын дараа түүний лабел Republic Records 3-р сарын 7-нд түүний шинэ дууг "Гарчиг тодорхойгүй" хэмээн биччихээд дараа нь устгажээ. 2017 оны 2-р сарын 26-нд Lorde өөрийн шинэ дууг Шинэ Зеландад удахгүй (3-р сарын 3-нд) цацагдана хэмээн зарлажээ. Хоёр өдрийн дараа тэрээр түүний хоёр дахь цомгийн эхний сингл "Green Light" болохыг зарласан байна. 3-р сарын 3-нд тэр дараагийн цомгийнх нь нэр Melodrama болохыг, 2017 оны 6-р сарын 16-нд худалдаалагдаж эхлэхийг мэдэгдсэн байна. Долоо хоногийн дараа Lorde Melodrama цомгийн эхний промо сингл "Liability" -г сонсогчиддоо хүргэсэн аж. Lorde "Green Light" болон "Liability" дуунуудыг 3-р сарын 11-нд Saturday Night Live нэвтрүүлэгт анх удаа олон нийтийн өмнө амьдаар дуулжээ. Мөн тэрээр цомгийнхоо 11 дууны нэрийг 5-р сард зарласан бол цомгийн хоёр дахь сингл, "Perfect Places" 2017 оны 6-р сарын 1-нд худалдаалагдаж эхэлсэн байна. Харин сүүлийн промо сингл "Sober" 6-р сарын 9-нд цацагджээ. Одоогоор цомгоос "Green Light", "Perfect Places", "Homemade Dynamite" гэсэн гурван сингл цацагдаад байна. Гурав дахь сингл "Homemade Dynamite" нь соло хуилбараас гадна дуучин Khalid, Post Malone, SZA нартай хамтарсан remix хувилбараар цацагдсан билээ.

Уран бүтээлийн хэв маяг

Түүнд нөлөөлсөн уран бүтээлчид

Lorde-д хамгийн ихээр нөлөөлсөн уран бүтээлчид. Grimes (зүүн), Fleetwood Mac (баруун)

Lorde багаасаа америк жазз урсгалын Billie Holiday, соул хөгжмийн Sam Cooke, Etta James болон Otis Redding нарыг сонсож өсчээ. тэрээр эцэг эхчүүдийнхээ дуртай дуучид буюу Cat Stevens, Neil Young мөн Fleetwood Mac нарыг сонсдог байжээ. Lorde Fleetwood Mac хамтлагийн Rumours цомгийг "төгс цомог" хэмээж байв.  Тэр мөн реппер J.Cole, электроник хөгжмийн гайхалтай продьюсеруудыг хүндэлдэг. Тэрээр хэдий альтернатив, инди, поп дуучин ч гэсэн реп дуунд дуртай. Lorde 2014 онд BBC Radio 1-ийн Live Lounge-д уригдан оролцохдоо Jeremih-ийн Don't Tell Em дууг коверлосон төдийгүй Канье Вест, Ники Минаж нарт дуртай аж.

Түүний хэв маяг

Lorde-ийн хөгжмийн хэв маяг поп, дрим поп, инди поп, электропоп, инди-электро, альтернатив урсгалтай салшгүй холбоотой. The Guardian сэтгүүлийн Пол Лестер Lorde-ийн хэв маягийг Скай Феррейра, Лана Дел Рей, Grimes нартай адилтгажээ.

"Royals" дуунд тэрбээр өөрийн хоолойгоо меццо-сопрано урсгалаар хүргэж байв. Тэр өөрийнхөө дуунуудаас дуунуудынхаа аяыг бус өөрийнхөө хоолойг хүргэхийг хичээдэг ажээ. Тэрээр нэгэнтээ өөрийн хоолойны тусгалын талаар ярихдаа, "Би аяз нэг их хэрэглэдэггүй учир миний дуунууд миний хоолойн дээр тулгуурлагддаг. Тийм учраас надад миний хоолойны эффект маг чухал" хэмээж байужээ. PopMatters сэтгүүлийн Эван Севди түүний хоолойг тодорхойлохдоо "онцгой, зөөлөн гэвч хүчирхэг" хэмээн хэлсэн байдаг. Billboard-ийн Жесон Липшүйц түүний хоолойг "тэсрэмтгий, эффектив" хэмээж тодорхойлсон байдаг. Түүний хоолойг шүүмжлэгчид "электро, чихэрлэг, давс нь таарсан хоол мэт" хэмээн онцгойлж байжээ.

Нэр дэвшсэн шагналууд

Түүний амжилтын хажуугаар түүнд очих шагналууд ч ихэссэн юм. 2013 оны Шинэ Зеландын хөгжмийн наадмаар тэрээр 4 шагнал хүртсэн байдаг. "Royals" дуу нь 2013 онд Шинэ Зеланд улсын тухайн жилийнхээ хамгийн шилдэг дуунд олгодог ARPA Silver Scroll Awards-ыг хүртсэн байна. Тэрээр мөн Грэмми, Brit Awards, MTV Video Music Awards гэх мэт шагналуудыг хүртэж байжээ.. Тэрээр 2013 онд 2 төрлөөр Грэммийн шагнал хүртсэн байдгаас "Оны шилдэг дуу", "Оны шилдэг поп соло үзүүлбэр" номинацуудыг өөрийн болгосон байна. Мөн тэрээр 2017 онд дахин нэг ARPA Silver Scroll Awards хүртсэн нь Жек Антонофф, Жоел Литтл нартай хамтран зохиосон "Green Light" дуу юм. 2017 оны ARPA Silver Scroll Awards-д эхний шатанд 20 дуу нэрлэгдэж, түүнээс шилдэг 5 дуу шалгарсны ялагч нь "Green Light" юм.

Бүтээлүүд

• The Love Club EP (2013)
• Pure Heroine (2013)
• Melodrama (2017)

Аялан тоглолтууд

• Pure Heroine Tour (2013-2014)
• Melodrama World Tour (2017-2018)

Цахим холбоос

• Албан ёсны цахим хуудас