Darren Fletcher
 | |||
| Informazzjoni personali | |||
|---|---|---|---|
| Isem sħiħ | Darren Barr Fletcher | ||
| Twelid | 1 ta' Frar 1984 Edinburgu, Skozja | ||
| Tul | 1.83 m | ||
| Rwol | Midfilder | ||
| Informazzjoni fuq il-klabb | |||
| Klabb attwali | Manchester United (direttur tekniku) | ||
| Mixtliet | |||
| 1995–2003 | Manchester United | ||
| Karriera professjonali | |||
| Snin | Klabb | ||
| 2003–2015 | Manchester United | ||
| 2015–2017 | West Bromwich Albion | ||
| 2017–2019 | Stoke City | ||
| Tim nazzjonali | |||
| 2003–2017 | Skozja | ||
Darren Barr Fletcher (twieled fl-1 ta' Frar 1984) huwa eks-plejer tal-futbol Skoċċiż li attwalment ikopri l-irwol ta' direttur tekniku ma' Manchester United, li magħhom qatta' l-maġġoranza tal-karriera tiegħu.
Karriera
[immodifika | immodifika s-sors]Fletcher ingħaqad ma' Manchester United f'Lulju tas-sena 2000 u ffirma l-ewwel kuntratt professjonali fi Frar tal-2001. Għall-bidu kien jilgħab fuq in-naħa leminija ta' nofs il-grawnd fl-istess pożizzjoni ta' David Beckham, u ħafna kienu dawk li raw li l-opportunitajiet ta' Fletcher mal-ewwel tim kienu se jiżdiedu u li se se jinfiltra faċilment mal-ewwel tim faċilment u jibqa' hemmhekk għal ħafna snin.[1] L-ewwel ftit staġuni mal-klabb, però, kienu deludenti fejn qatta' numru ta' żmien barra minħabba uġigħ li sofra, waqt li sadanittant beda jiżviluppa aktar bħala midfilder ċentrali.
Kien fl-istaġun 2003–04 li Fletcher żblokka mat-tim ta' Manchester United, fejn lagħab numru ta' partiti importanti, fost l-oħrajn fil-finali tal-FA Cup kontra Millwall f'Mejju tal-2004.[2]
Minkejja numru żgħir ta' dehriet kompetittivi fil-bidu tal-kampanja 2004–05, għal darb'oħra Fletcher sab ruħu mill-ġdid fiss mal-ewwel tim. Fl-1 ta' Jannar 2005, Fletcher skorja l-ewwel gowl tiegħu fuq livell ta' klabb, fir-rebħa ta' 2–0 fuq Middlesbrough.
Fletcher kien wieħed mill-plejers li ġew ikkritikati mill-kaptan tal-klabb Roy Keane wara t-telfa imbarazzanti ta' 4–1 li United sofrew kontra Middlesbrough f'Ottubru tal-2005[3] Fletcher irrisponda għal din il-kritika permezz ta' prestazzjoni tajba fil-partita vitali tal-kampjonat kontra Chelsea, fejn skorja l-unika gowl tal-konfront permezz ta' daqqa ta' ras. Dan il-gowl temm l-erbgħin logħba ta' imbattibilità li Chelsea għamlu fil-Premier League.
Fl-istaġun 2006–07, hu baqa' l-ewwel għażla mal-ewwel tim fil-bidu tal-istaġun u skorja fir-rebħa barra minn darhom kontra Charlton Athletic, kif ukoll gowl b'daqqa ta' ras kontra Middlesbrough f'Diċembru u gowl ieħor bir-ras kontra Charlton fi Frar, biex b'hekk skorja darbtejn kontra dan il-klabb f'dan l-istaġun. Hekk kif l-istaġun kompla, Alex Ferguson ipprefera il-kwartet ta' nofs il-grawnd ta' Cristiano Ronaldo, Paul Scholes, Michael Carrick u Ryan Giggs, fejn illimita lil Fletcher għal apparenzi bħala sostitut. Però, minħabba s-sospensjoni ta' Paul Scholes, hu beda mal-ewwel tim fir-rebħa kbira ta' 7–1 ta' United kontra Roma fil-kwarti tal-finali taċ-Champions League.
Fl-istaġun 2007–08, bil-wasla ta' Owen Hargreaves, Anderson u Nani li kollha jkopru l-irwol ta' nofs il-grawnd, Fletcher sabha bi tqila biex jilgħab iktar mill-istaġun preċedenti, u kien hemm għajdut li seta' jħalli lill-klabb minħabba li ma kienx qed jilgħab biżżejjed. Fil-fatt, bħall-qabel, Ferguson baqa' jippreferi lil Carrick, Scholes, Giggs u Ronaldo f'nofs il-grawnd, u hu wkoll lagħab inqas mill-plejers il-ġodda.
Fi Frar tal-2008, Fletcher beda mal-ewwel ħdax fil-partita kontra Arsenal, fil-ħames rawnd tal-FA Cup, fejn hu skorja darbtejn biex United eliminaw lil Arsenal mill-kompetizzjoni. Fl-istaġun il-ġdid 2008–09, hu skorja kontra Newcastle United fil-partita tal-ftuħ tal-kampjonat biex kiseb pari importanti ta' 1–1 għal United. Fletcher skorja t-tieni gowl tiegħu fil-partita suċċessiva kontra Portsmouth. Dan il-gowl kien il-gowl tar-rebħa għal Manchester United. Fit-3 ta' Ottubru 2008, Fletcher iffirma estenzjoni tal-kuntratt ma' United, fejn b'hekk se jżommu mal-klabb sal-2012.[4] It-tielet gowl tal-istaġun wasal kontra Everton fil-25 ta' Ottubru, waqt li fit-Tazza tad-Dinja tal-Klabbs 2008 daħal bħala sostitut fis-semifinali kontra Gamba Osaka u skorja r-raba' gowl fir-rebħa ta' 5–3. Fit-tieni leg tas-semifinali tal-UEFA Champions League kontra l-Arsenal ta' nhar il-5 ta' Mejju 2009, Fletcher ġie muri l-karta l-ħamra u b'hekk se jitlef il-finali tal-kompetizzjoni. Minkejja li m'hemm l-ebda proċedura biex wieħed jappella għal karti ħomor fiċ-Champions League,[5] Manchester United bagħtu nhar is-7 ta' Mejju 2009, appell lill-UEFA biex il-karta l-ħamra tiġi mneħħija,[6] liema appell ġie sussegwentament miċħud mill-UEFA.[7]
L-istaġun 2009–10 ra lil Fletcher jikkonsolida postu qalb nofs il-grawnd tal-United, fejn beda fi kważi kull partita. L-ewwel gowls tal-istaġun waslu fl-ewwel derby ta' Manchester tal-istaġun, fir-rebħa memorabbli ta' 4–3, fejn ħalla l-marka tiegħu b'permezz ta' doppjetta. Għal din il-prestazzjoni, hu ngħata l-Plejer tal-Partita tal-Barclays.[8]
Internazzjonali
[immodifika | immodifika s-sors]Fletcher stabilixxa ruħu bħala plejer regulari mat-tim Skoċċiż u l-ewwel gowl nazzjonali wasal fi-rrebħa ta' 1–0 kontra l-Litwanja wara li kien għadu kif daħal bħala sostitut waqt it-tieni apparenza tiegħu. Fis-26 ta' Mejju 2004, hu kien kaptan tal-Iskozja fir-rebħa ta' 1–0 waqt logħba ta' ħbiberija kontra l-Estonja f'Tallinn. Din għamlitu l-iżgħar kaptan tal-Iskozja minn meta John Lambie ta' Queen's Park mexxa lit-tim li rebaħ lill-Irlanda 7–2 fl-20 ta' Marzu 1886. Lambie kien biss 17-il sena u 92 ġurnata.[9]
Il-progress ta' Fletcher mat-tim nazzjonali kien immarkat permezz ta' gowl f'Ottubru tal-2005 minn 25 metru fil-fażi ta' kwalifikazzjoni tat-Tazza tad-Dinja kontra l-Islovenja. Fletcher hu preżentament il-viċi-kaptan tal-Iskozja, fejn jieħu post tal-kaptan regulari Barry Ferguson meta jkun assenti. Hu kien kaptan tat-tim għal tliet darbiet.
Unuri
[immodifika | immodifika s-sors]Klabb
[immodifika | immodifika s-sors]- Manchester United
- Premier League: 2006–07, 2007–08, 2008–09, 2010–11
- FA Cup: 2003–04
- League Cup: 2005–06, 2009–10
- Community Shield: 2003, 2007, 2008, 2010
- UEFA Champions League: 2007–08
- Tazza tad-Dinja tal-Futbol tal-Klabbs: 2008
Nazzjonal
[immodifika | immodifika s-sors]- Kirin Cup: 2006
Referenzi
[immodifika | immodifika s-sors]- ^ "Fletcher is ready to fill Beckham's boots" (bl-Ingliż). ESPN Soccernet. 2000-07-27. Arkivjat minn l-oriġinal fl-2008-10-06. Miġbur 2008-04-13.
- ^ "Man Utd win FA Cup" (bl-Ingliż). BBC. 2004-05-22.
- ^ "Keane gagged by United after TV attack on players" (bl-Ingliż). Guardian. 2005-11-01.
- ^ "Scholes & Fletcher sign new deals" (bl-Ingliż). BBC Sports. 2008-10-03. Miġbur 2008-10-27.
- ^ "UEFA rule out reprieve for heart-broken Fletcher" (bl-Ingliż). Times of Malta. 2009-05-07. Miġbur 2009-05-07.
- ^ "United Lodge Fletcher Appeal" (bl-Ingliż). Sky Sports. 2009-05-07. Miġbur 2009-05-07.
- ^ "Fletcher appeal rejected" (bl-Ingliż). BBC Sport. 2009-05-11. Miġbur 2009-05-11.
- ^ "Man Utd 4-3 Man City" (bl-Ingliż). BBC Sport. 2009-09-20. Miġbur 2009-09-20.
- ^ "Sat 20 Mar 1886 Ireland 2 Scotland 7" (bl-Ingliż). Miġbur 2006-11-27.
Ħoloq esterni
[immodifika | immodifika s-sors]- Darren Fletcher fuq Soccerbase
- Profil fuq l-Assoċjazzjoni tal-Futbol Skoċċiża
