Barbara Petzold

Barbara Petzold
Statsborgarskap	Tyskland, Den tyske demokratiske republikken
Fødd	8. august 1955 (69 år) Oberwiesenthal
Yrke	politikar, langrennsløpar, advokat
Språk	tysk
Politisk parti	Sozialistische Einheitspartei Deutschlands

Barbara Petzold (fødd 8. august 1955) er ein tysk tidlegare langrennar frå Oberwiesenthal i Sachsen som vann OL-gull på 10 km og i 4 x 5 km stafett under Vinter-OL 1980. Ho tevla for Aust-Tyskland.

Petzold fekk sitt gjennombrot då ho tok sølvmedaljen på 10 km ved Ski-VM 1974 i Falun, slått av suverene Galina Kulakova frå Sovjetunionen, og var elles med på det austtyske laget som kom på sølvplassen i 4 x 5 km stafett. Under Vinter-OL 1976 i Innsbruck vart Petzold nummer sju på 10 km og gjekk ein etappe på Aust-Tyskland sitt bronselag i stafett. To år seinare vart det sølv i 4 x 5 km stafett då Ski-VM 1978 vart avvikla i Lahti.

Petzold sitt høgdepunkt kom då ho vann to gullmedaljer under Vinter-OL 1980 i Lake Placid. Etter å ha vore 0,18 sekund for seint ute til å få bronse på 5 km, vann ho 10-kilometeren med ein margin på 3,5 sekundar til finske Hilkka Riihivuori. Til sist i vinterleikane gjekk Petzold på ankeretappen Aust-Tyskland sitt stafettlag inn til ein suveren siger, over minuttet framom Sovjetunionen, og med Noreg på bronseplass. Under Ski-VM 1982 i Oslo avslutta Petzold medaljehausten med å gå Aust-Tyskland i mål til bronse i 4 x 5 km stafett, hennar femte rake stafettmedalje.

Frå 1974 til -81 vann Petzold individuelt ni austtyske meistertitlar i langrenn.

Kjelder

• Denne artikkelen bygger på «Barbara Petzold» frå Wikipedia på tysk, den 17. januar 2017.