Demidov (lidn)

Demidov
Демидов
	Lidnanznam;
Valdkund	Venäma
Eläjiden lugu (2021)	6,326 ristitud
Pind	33 km²
Pämez'	Vladimir Matveev; (sügüz'ku 2015—)
Telefonkod	+7−48 147-xx-xxx
Avtokod	67
Aigvö	UTC+3 (MSK+0)

Demidov (ven.: Деми́дов), edel vn 1918 tal'vkud Porečje (ven. Поречье), om Venäman lidn da lidnankund Smolenskan agjan lodehes. Se om Demidovan rajonan administrativine keskuz.

Istorii

Eländpunkt mainitaškanzihe vspäi 1499, Porečjen volostin mainitez om vn 1503 kožundaktas Litvanman i Moskvan valdkundan keskes. Porečje-žilo sai lidnan statusad Jekaterina II-imperatornaižen käskön mödhe vn 1776 26. päiväl uhokud. Lidn šingotihe vezitel Baltijan maihe 18. i 19. voz'sadoil. Udesnimitihe lidnad vn 1918 tal'vkus makundan partijan pölištunuden Jakov Demidov-ezimehen muštoks. Toižen mail'man sodan aigan lidn oli okkupiruidud (13. heinku 1941 — 22. sügüz'ku 1943).

Demidov šingotase omblendedheotandoil (pälembaižed trikosobad, specialižed sobad, naižiden alasobad) i sömtegimištol (leibtegim, mineralvedentegim, maidceh).

Geografijan andmused

Lidn sijadase rajonan suvipäivlaskmas, Kaspl'-jogen randoil (ven.: Каспля 136 km pitte, Päivlaskmaine Dvin-jogen hurapol'ne bassein), 160 m ü.m.t. keskmäižel korktusel. Gobz-jogi (ven. Гобза 95 km pitte) lankteb Kasplihe oiktalpäi lidnan keskuzpalas. Matkad Smolenskhasai om 63 km suvhe-suvipäivnouzmha orhal vai 77 km avtotel. Toižed lähembaižed lidnad oma Duhovščin 57 km päivnouzmha orhal vai 115 km avtotedme, Rudn' 45 km suvipäivlaskmha orhal vai 48 km avtotedme, i Veliž 43 km pohjoižhe-lodeheze orhal vai 46 km avtotedme. «Smolensk — Pskov»-avtote ümbärdab lidnad kahtes..koumes kilometras päivlaskmaspäi.

Kaik nell' küläd mülüdas lidnankundha Demidovan ližaks. Lidnankundan pind — 43,98 km².

Eläjad

Vl 1939 lidnan ristitišt oli 7 916 eläjad. Vl 2012 lidnan eläjiden lugu oli 7 079 ristitud, lidnankundan — 7 217 ristitud, rajonan koume videndest. Kaikiš suremb lidnan ristitišt oli 9 500 eläjad vl 1913 i 10 198 eläjad vl 1989. Kaik 6 289 ristitud elihe lidnas i 6 405 ristitud kaikes lidnankundas vl 2017.

Rahvahad (2010): venälaižed — 97,9 %, vaugedvenälaižed — 1,0 %, toižed rahvahad — 1,1 %.

Ortodoksižen hristanuskondan viž pühäpertid^[1] oma avaitud lidnas: Jumalanmaman Katken, Blagoveššenjan i Emäganpäivän jumalanpertid, ph. Panteleimon-spravitajan kodijumalanpert' läžundkodinno, Paraskevan videnz'päivän časoun'.

Saraktehnologijoiden tehnikuman (Smolenskan rajonan Avtoremzavod-žilo) Demidovan palakund^[2] (edel vn 2015 elokud Demidovan agrariž-tehnologine tehnikum) om lidnan professionaližen opendusen aluzkundaks.

Galerei

Demidovan rajonan tobmuden sauvuz (2022)
Jumalanmaman Emäganpäivän jumalanpert', vn 2012 nägu
Jumalanmaman Katken jumalanpert', vn 2018 nägu
Torguindan keskuz Sovetskai-irdal (2022)
Jurii Nikulin-akt'oran muštnik vl 2022

Homaičendad

Irdkosketused

Lidnankundan lehtpoled rajonan tobmuden aluzkundoiden demidov.admin-smolensk.ru-saital. (ven.)

Demidov (lidn) Vikiaitas

	Smolenskan agjan lidnad
	Demidov \| Desnogorsk \| Dorogobuž \| Duhovščin \| Gagarin \| Jarcevo \| Jel'n' \| Počinok \| Roslavl' \| Rudn' \| Safonovo \| Sičovk \| Smolensk \| Veliž \| Väz'm

[1] Demidovan pühäpertid sobory.ru-saital. (ven.)

[2] Demidovan palakundan istorii Saraktehnologijoiden tehnikuman smolenskteh.ru-saital. (ven.)

[1]

[2]