金星

  呢篇文講八大行星之一。想搵第二個意思嘅話，請睇金星 (搞清楚)。

金星（粵拼：gam1 sing1；西洋名：Venus；天文符號：）係第二近太陽嘅行星，太陽系第六大行星，軌跡響水星同地球之間，用224.7日就可以圍住太陽行一個圈，太陽系中唯一一粒冇磁場嘅行星，冇衛星。夜晚嗰陣時，響地球天空，佢係除咗月亮之外，最光嘅天體，光等有成 -4.6。用地球角度來睇，因為佢係內行星，佢永遠都唔會離開太陽好多，所以分開角度都係頂盡 47.8°。金星最光係日落之前一陣或者日出無耐，所以人哋叫佢晨星（san4 sing1）或者昏星（fan1 sing1）。

金星

金星外觀
編號
發音	/ˈviːnəs/
軌道參數
曆元 J2000
遠日點	108,939,000km 0.728213 AU
近日點	107,477,000km 0.718440 AU
半長軸	108,208,000km 0.723327AU
離心率	0.0067
軌道週期	224.701天 0.615198 yr 1.92金星太陽日
會合週期	583.92天
平均速度	35.02km/s
平近點角	50.115°
軌道傾角	3.39458° 到黃道 3.86° 到太陽赤道 2.19° 到唔變平面
升交點黃經	76.678°
近日點參數	55.186°
衛星	無
物理特徵
平均半徑	6,051.8 ± 1.0km 0.9499個地球
扁率	0
表面積	4.60×108km2 0.902個地球
體積	9.28×1011km3 0.866個地球
質量	4.8676×1024 kg 0.815個地球
平均密度	5.243g/cm3
表面重力	8.87m/s2 0.904g
逃逸速度	10.36km/s
恒星自轉週期	−243.0185天(逆行)
赤道自轉速度	6.52 km/h（1.81 m/s）
轉軸傾角	177.36°
北極赤經	18時11分2秒 272.76°
北極赤緯	67.16°
反照率	0.67（幾何） 0.90（球面）
表面溫度 最低 平均 最高 開氏度 737K 攝氏度 464°C
視星等	最光 −4.9（新月） −3.8（滿月）
角直徑	9.7"–66.0"
大氣
表面氣壓	92bar（9.2MPa）
成分	~96.5% 二氧化碳 ~3.5% 氮 0.015% 二氧化硫 0.007% 氬 0.002% 水汽 0.0017% 一氧化碳 0.0012% 氦 0.0007% 氖 微量羰基硫 微量氯化氫 微量氟化氫

金星係太陽系四粒類地行星之一，因為佢嘅大細、質量、體積同太陽嘅距離，都同地球相似，所以佢經常被稱為地球嘅姊妹星。佢嘅直徑係12,092公里（只比地球少650公里），質量係地球嘅81.5%。

然而，佢喺其它方面就同地球唔同。佢嘅大氣層非常厚，係四粒類地行星入面最厚嗰個，其中超過96.5%都係二氧化碳，其餘嘅3.5%係氮氣，行星表面嘅大氣壓力係地球嘅92倍。表面平均溫度高達735開氏（462攝氏；863華氏），係太陽系最熱嘅行星，比最近太陽嘅水星更加熱。金星冇將碳吸收入岩石嘅碳循環，似乎冇任何有機生物來吸收生物量嘅碳。金星俾一層高反射、唔透明嘅硫酸雲覆蓋，擋住來自太空、可能抵達表面嘅可見光。佢之前可能有海洋，而且外觀同地球極為相似，但係隨住失控嘅溫室效應導致溫度上升而蒸發嗮。水最有可能因為缺乏行星磁場而受到光致蛻變分解成氫同氧，而自由氫一直俾太陽風掃入星際空間。金星表面係乾燥嘅荒漠景觀，重有定期被火山刷新嘅岩石。

特徵

地理

直到行星科學喺20世紀揭示佢啲秘密之前，金星表面一直都係人類猜測嘅話題。佢最後嘅影像來自麥哲倫號喺1990-91年間嘅探測，顯示表面有大量同廣泛嘅火山活動，大氣層中嘅硫顯示最近可能有過噴發。

金星八成表面俾光滑嘅火山平原覆蓋，七成嘅平原有皺褶脊，一成係平滑或有碎裂嘅平原。兩個高原構成其餘三成嘅表面地區，一個喺行星嘅北半球，另一個喺赤道嘅南邊。北方大陸嘅大細同澳洲差唔多，依據巴比倫嘅愛神，伊師塔（Ishtar）命名為伊師塔地。金星上最高嘅山峰就喺伊斯塔地，叫做馬克士威山，佢嘅高度係金星平均表面之上11公里。喺南半球嘅大陸係呢兩個高原中比較大嘅一個，依據希臘嘅愛神命名，稱為阿佛洛狄忒陸，大細同非洲大陸差唔多。呢個地區嘅部分被斷裂嘅網狀結構同斷層覆蓋。

由於缺乏熔岩流嘅伴隨，隨處可見嘅破火山口依然係一個謎。呢個行星只有好少撞擊坑，顯示呢個行星表面非常年輕，大概只有3-6億年嘅歷史。除咗撞擊坑、山脈、山谷等等喺岩石行星常見嘅地形，金星表面有一啲獨特嘅特徵。平頂嘅火山地形叫做Farra，睇起嚟似薄煎餅，大細範圍介乎20至50公里，高度介乎100至1000公尺；輻射狀、星形嘅地形系統，叫做novae；如果有類似蜘蛛網嘅輻射狀同埋同心斷裂外觀嘅，就叫做蛛網膜地形（arachnoid）；如果有同心圓環嘅凹地就叫coronae；呢啲都係火山地形。

金星表面嘅地形幾乎都係用歷史上同神話中嘅女性命名。少數例外嘅係以詹姆斯·克拉克·馬克士威個名命名嘅馬克士威山，同埋阿爾法區、貝塔區、奧瓦達區呢三個高原地區。前面嗰三個地區係喺國際天文學聯會嘅行星命名監督機構，通過現行嘅命名制度之前命名。

金星上天然嘅地形以相對於佢本初子午線嘅經度來表示。原本選擇嘅子午線係經過阿爾法區南部，喺雷達下呈現亮點嘅橢圓形Eve嘅中心。喺金星任務完成後，重新定義嘅本初子午線係經過阿喇阿德涅火山口中央峰嘅經線。

表面地質

内文：金星地質

垂直方向放大咗22.5倍嘅馬特山。

大部分嘅金星表面似乎都係由火山活動形成，金星嘅火山數量係地球嘅好幾倍，佢有167座直徑超過100公里嘅大型火山。地球上，得夏威夷大島嘅複雜火山嘅大細可以同金星比較。呢個唔係因為金星嘅火山比地球活躍，而是因為佢嘅地殼比地球古老。地球嘅海洋地殼喺板塊嘅邊界不斷咁俯衝而下，令到平均年齡細過一億年，而金星表面嘅年齡估計喺3至6億年之間。

有幾個線索指出金星上嘅火山重喺度活動。前蘇聯嘅金星計劃，金星11號同埋金星12號探測器偵測到好多閃電，金星12號降落之後冇幾耐，就記錄到強大嘅雷聲。歐洲太空總署嘅金星特快車記錄到高層大氣中豐富嘅閃電。雖然地球上嘅雷暴會產生降雨，但係金星表面唔會落雨（即使喺大氣層嘅上層會落硫酸雨，但喺25公里嘅高處就會因為高温而蒸發）。產生閃電嘅一種可能係嚟自火山灰嘅噴發。另一種證據嚟自大氣層中嘅二氧化硫濃度，喺1978年至1986年間嘅測量，濃度下降咗10倍。即係話，早啲嘅時候有大型嘅火山爆發進行。

金星上有近千個撞擊坑均勻咁分布喺其表面。喺其它天體上嘅撞擊坑，例如地球同埋月球，撞擊坑展現出一系列衰退嘅狀況。喺月球，衰退係嚟自後續嘅撞擊；喺地球，係因為風同埋雨水嘅侵蝕。喺金星，85%嘅撞擊坑保持住原始嘅狀態。撞擊坑嘅數量，同埋保存喺完好嘅狀態下，顯示呢個行星大約喺3億年前經歷咗一次全球性嘅事件，隨後火山活動開始衰減。地球嘅地殼係不斷咁運動，而金星就被認為冇得維持呢一個過程。冇板塊構造從地函散熱，金星反而經歷咗一個令地函溫度升高嘅迴圈，直到佢哋達到臨界嘅水準，削弱咗地殼。然後，大約喺一億年嘅期間，發生咗大規模嘅地殼俯衝，令到地殼完全重生。第一個火山活動持續嘅直接證據，出現喺格尼奇峽谷嘅盾狀火山馬特山嘅帶狀裂口，發現咗3個紅外線嘅閃光。呢啲閃光嘅溫度範圍係527-827℃，相信係氣體或者熔岩從火山口釋出嘅噴發現象。

星星凹面嘅坑穴大細由3公里至280公里。由於濃稠嘅大氣影響到進入嘅天體，所以冇細過3公里嘅坑穴。受到大氣層嘅減速，動能低過某一臨界值嘅天體，就無得碰撞出撞擊坑。進入嘅天體直徑如果細過50米，將喺墜落到表面之前就喺大氣層中燒毀。

1979年，先鋒金星軌道器以紫外線波段揭露咗金星大氣層嘅結構。

麥哲倫號從1990年至1994年嘅全球雷達影像（冇雲層）

喺金星表面嘅撞擊坑（影像由雷達數據重建）

內部結構

由於冇地震或者轉動慣量嘅資料，因此只有好少嘅直接資料可以解金星內部嘅結構同地質化學。同地球相似嘅大小同密度，顯示佢同地球有相似嘅共同內部構造：核、地幔同埋地殼。好似地球一樣，金星嘅核心有一部分係液體，因為呢兩個行星冷卻嘅速率係相同嘅。

金星顯示出內部深處嘅壓力會比地球嘅細一啲。呢兩個行星之間主要嘅區別喺金星缺乏板塊存在嘅證據，可能係因為佢嘅外殼太硬，隱沒帶缺乏水而令佢冇黏度。咁嘅結果令到行星嘅熱好難消散，阻止咗它嘅冷卻，並提供內部缺乏生成磁場機制嘅可能解釋。相反，金星可能以週期性嘅重鋪地殼嚟消散佢內部嘅熱。

古稱

中國古代稱之為太白、太白金星。係晨星嘅時候，黎明前響東方嘅天出現，稱之為「啟明」；係昏星嘅時候，黃昏後響西方嘅天出現，稱之為「長庚」 。

古希臘人叫金星做阿佛洛狄特（Aphrodite），係希臘神話裏面「愛與美」嘅女神。而古羅馬人叫金星做維納斯（Venus），係羅馬神話裏面嘅「美神」，因此金星嘅英文名叫 Venus。

• 
  波提且利畫嘅《維納斯出世》
• 
  唐朝《熾盛光佛並五星圖》入面代表金星嘅神靈