閏年

  「閏日」跳轉到呢度。想搵法國共和曆每年最後幾日，請睇「閏日 (法國共和曆)」。

閏年（粵拼：jeon6 nin4）係為咗追返天文或者季節時間，而有補返日數嘅年。而無補日數嘅年叫做平年。

西曆嘅閏年

西暦額我畧曆係基於地球繞太陽公轉一週嘅時間作為一年，再畫分為12個月。

以一日24小時計（小時嘅最小單位秒由銫-133原子嘅一種特定躍遷定義），公轉周期實際上為365日又四份之一，四年加埋嘅誤差有差唔多一日，所以每四年補一日，即係呢一年有366日，而呢一年就叫做閏年（但係如果年份係100嘅倍數，就要俾400除得盡，先至係閏年，否則就係平年。所以1800年、1900年、2100年、2200年、2300年都係平年，而2000年、2400年，就係閏年）。

唐曆嘅閏年

唐曆係陰陽曆，即係同時考慮太陰（月亮嘅別稱）同太陽嘅運行來制定。

月球繞地球公轉周期為一個「月」，呢個係中文「月」呢個時間單位嘅由來。月球繞地球公轉嘅周期為29日到30日之間，一「年」有十二或者十三個月。同時，地球繞太陽公轉周期為之一「歲」，以每年冬至為一歲嘅第一日。所以傳統上，冬至嗰日會做節慶祝，甚至有話：「冬至大過年」。

留意：「歲」同「年」係唔同嘅單位，歲嘅長度係固定嘅，大約係365.24日；而年嘅長度就唔固定，平年得十二個月，所以會短啲，而閏年就有十三個月，會長啲。設置閏年，係為咗令「年」嘅平均長度符合「歲」嘅長短而引入嘅誤差補值。閏年多出來嗰個月叫閏月。

重有：唐曆係個天文曆，月、年、歲、節氣呢啲事項，係跟住天文觀測而定，無固定嘅方程式來斷定，只可以根據最新嘅天文觀測數據來推斷未來嘅事項，而且會時不時跟住新收集嘅數據而更新。