苗族

苗族 Mèo（赫蒙族） แม้ว或ม้ง
貴州松桃苗族自治縣嘅苗族少女
總人口
984.76萬
分佈地區
中國	894萬
越南	78.76萬
美國	16萬
泰國	12萬
語言
苗語、「門」語（海南苗族所操嘅瑤語支語言）
宗教信仰
傳統信仰（如祖先信仰、蚩尤信仰，萬物有靈），道教，其它外來宗教

苗族（粵拼：miu4 zuk6；越南文：𠊛貓người Mèo；泰文：แม้ว / ม้ง；Maew / Mong；英文又叫Hmong；中國標準羅馬字：Miao，字母代碼：MH，數字代碼：06）係一個源自中國嘅跨國民族，主要聚居響中國華南同埋東南亞。中國有8,945,538苗族人（2000年人口普查），佔總人口嘅0.72%，係中國第五大民族。響越南，苗族叫做「H'mông」，有人口787,604人，排第八。

分佈

苗族嘅銀飾

苗族由中國散出來，如今大約有八成嘅苗族人響中國，集中響西南同埋中南省份；東南亞嗰邊，苗族有唔少人響越南、泰國、老撾、緬甸呢啲國家。1975年老撾人民民主共和國成立後，嗰處幾萬個苗族人變咗做難民，當中有一部分移咗民去美國同法國。

住響唔同地方嘅苗族人，有唔同嘅自稱，包括：「牡」、「蒙」、「毛」、「果雄」、「帶叟」。地方唔同，服飾都有唔同，會用服飾名稱加個「苗」字來稱呼，好似：「長裙苗」、「短裙苗」、「長角苗」、「紅苗」、「黑苗」、「白苗」、「青苗」、「花苗」、「小花苗」。苗族人多數信萬物有靈嘅原始宗教。

中國

中國境內嘅苗族人，分佈響貴州、湖南、雲南、重慶、廣西、湖北、四川同埋海南八個省分，一共有8,653,417人，佔咗苗族人口嘅96.73%。其中貴州有4,299,954苗族人，佔苗族人口嘅48.07%，唔計漢族，就佢貴州最大嘅民族。湖南嘅苗族人佔苗族人口21.48%，雲南嘅佔11.67%。

東南亞

響越南同老撾，苗族人係原居民族。

響泰國北部，亦都有苗族人聚居。根據2004年做嘅人口統計，當地苗族人口大約有12萬人，係嗰處第二大民族。佢哋大概響18至19世紀嗰陣時，由中國西南地區移居過去泰北地區。緬甸撣邦亦有苗族原居民。

美國

美國嘅苗族人，主要響加州、明尼蘇達州、威斯康星州，總共大概有17萬人。

名嘅爭拗

• 響國內，湘西嘅苗族自稱做「Xongb」（果雄）、黔東嘅苗族自稱做「Hmub」（牡）、雲南嘅叫做Hmaob（毛）……。除此之外，其他地方嘅苗人都自稱做「Hmong」（蒙）。
• 響國外，幾乎所有苗族都講川黔滇方言川黔滇次方言第一土語，所以海外人士多認為Hmong係嗰班講唔同語言嘅苗族人嘅共同自稱。而所謂嘅「唔同語言」，響中國都當做係第一土語嘅次土語（例如：Hmong Daw次土語、Hmong Njua次土語），但係ISO就當做兩種「語言」來看待。

語言

苗族人嘅語言，統稱做苗語，屬於苗瑤語族嘅苗語支。苗語曾經有過文字，但係就失傳咗。家陣中國嘅苗族用緊嗰套文字，係中國語言單位響1956年10月為中國嘅三大苗語方言釐定嘅拼音文字，用26個基本拉丁字母來標聲母、韻母同埋聲調。各地嘅苗語各有不同，情形都幾複雜下。簡單來講，受漢文化影響越大嘅地區，語言就越趨簡化，用嘅漢字詞亦越多。

人物

• 東丹甘：蘆笙演奏家 、作曲家
• 宋祖英（1966年8月13號－）：歌唱家
• 宋布蘭（布蘭達宋，Brenda Song，1988年－）：美國演員
• 王宝（Vang Pao，1931年－）：老撾將軍
• 王志明（1907年－1973年12月29號）
• 沈從文（1902年12月28號－1988年5月10號）：作家、中國鄉土文學之父、佢嗰句「照我思索 能理解我 照我思索 可認識人」刻咗響湘西古城鳳凰東郊聽濤山上做墓志銘
• 阿幼朵（1980年4月29號－）：當代歌唱家、中國國家一級演員

文化

• 招龍節

出面網頁

• 苗族網（貴州省苗學會）
• 中國苗族網（貴州省苗學會）
• 苗族在綫
• 三苗網
• 文山苗族網
• 中央研究院數位典藏資源網：村寨網‧中國西南少數民族