Paranthropus aethiopicus
| Paranthropus aethiopicus | |
|---|---|
| |
| Die replika van die Paranthropus aethiopicus-skedel (die "Swart Skedel"). | |
| Wetenskaplike klassifikasie | |
| Koninkryk: | |
| Filum: | |
| Klas: | |
| Orde: | |
| Familie: | |
| Genus: | |
| Spesie: | P. aethiopicus
|
| Binomiale naam | |
| †Paranthropus aethiopicus (Olson, 1985)
| |
Paranthropus aethiopicus of Australopithecus aethiopicus is ’n uitgestorwe hominiedspesie.
Die eerste fossiel wat ontdek is, was bekend as Omo 18. Dit is in 1967 in Ethiopië ontdek deur die Franse argeoloë Camille Arambourg en Yves Coppens. In 1985 is die fossiel KNM-WT 17000 deur die antropoloog Alan Walker by die Turkanameer in Kenia ontdek. Dit is ook bekend as die "Swart Skedel" vanweë sy donker kleur.
Beskrywing
[wysig | wysig bron]P. aethiopicus is een van ’n groep "robuuste" Australopithecus wat in drie spesies vertak het: P. aethiopicus, P. robustus en P. boisei. P. aethiopicus het spesifieke eienskappe wat van die twee ander spesies verskil, soos ’n groter sigomatiese boog en kakebene wat verder vorentoe uitsteek. Die "Swart Skedel" se ouderdom word op sowat 2,5 miljoen jaar geraam; dit is ouer as die ander spesies van die genus. Hy het baie primitiewe eienskappe wat ooreenstem met dié van Australopithecus afarensis en is dus waarskynlik ’n direkte afstammeling. Dit het ook ’n klein brein gehad (410 cm3).[1]
Ander liggaamseienskappe is moeilik om te voorspel omdat net die een feitlik volledige skedel gevind is.
’n Eienskap wat daarop kan dui dat P. aethiopicus ’n moontlike voorsaat van P. boisei en P. robustus was, is die eenderse grootte van die kakebeen. Nie alle antropoloë stem egter saam met dié teorie nie omdat die skedel meer soos dié van A. afarensis lyk.[1] Daar word steeds gedebatteer oor die presiese afstamming van die spesie en daar is nog nie konsensus oor die klassifikasie daarvan nie.
Verwysings
[wysig | wysig bron]- ↑ 1,0 1,1 "Paranthropus aethiopicus". Archaeology.info. Geargiveer vanaf die oorspronklike op 16 Mei 2011. Besoek op 31 Maart 2011.
Eksterne skakels
[wysig | wysig bron]- Lys van Paranthropus aethiopicus-fossiele
Wikimedia Commons het meer media in die kategorie Paranthropus aethiopicus.
Wikispecies het meer inligting verwant aan Paranthropus aethiopicus
