Spasiefout

Een spelfout en drie spasiefoute opgemerk:
Sportskompleks* (sportkompleks), sportscomplex* (sports complex)
drank gebruik* (drankgebruik) en rommel strooi* (rommelstrooi).

Hierdie straatnaam is buite hoop.

Amptelik verkeerd: Landdroskantoor is die korrekte spelwyse.

Kry jou ry: Wegsleepsone is een woord; 'n koppelteken ontbreek.

'n Spasiefout by kontinentale Germaanse tale verwys na die verskynsel waar woorde wat deel is van 'n samestelling los van mekaar geskryf word (met 'n spasie tussenin), terwyl die spelreëls voorskryf dat hul vas of met 'n koppelteken geskryf moet word. Dit kom veral voor by samestellings wat uit lang woorddele bestaan, of waarvan een van die woorddele 'n eienaam of handelsnaam is.

Volgens die Afrikaanse woordelys en spelreëls word spasiefoute in Afrikaans gewoonlik gemaak weens voortdurende kontak met Engels, waar die los of vas skryf in baie gevalle nie so konsekwent soos in Afrikaans is nie.

Voorbeelde

Spasiefout	Regte spelling
Drank gebruik	Drankgebruik
Hoë spoed trein	Hoëspoedtrein
Hoop Straat	Hoopstraat
IBM rekenaar	IBM-rekenaar
Rommel strooi	Rommelstrooi
Spasie fout	Spasiefout
Sport kompleks	Sportkompleks
Web bladsy	Webbladsy

Bron

• Afrikaanse woordelys en spelreëls, 10de uitgawe. bl. 112-113