Yalu
| Yalu | |
|---|---|
 | |
 Die stroomgebied van die Yalu | |
| Oorsprong | suid van die Hemelmeer, Changbai-gebergtes, op die grens tussen Noord-Korea en die Volksrepubliek China |
| Monding | tussen Dandong, Volksrepubliek China, en Sinuiju, Noord-Korea Koreabaai, Geelsee |
| Stroomgebied | Noord-Korea, Volksrepubliek China |
| Lengte | 790 km (490 myl) |
| Oorspronghoogte | 2 500 m (8 202 voet) |
| Mondinghoogte | 0 m (0 voet) |
| Stroomgebiedopp. | 30 000 km² |
Die Yalu (Vereenvoudigde Chinees: 鸭绿江; Tradisionele Chinees: 鴨綠江; pinyin: Yālù Jiāng; Wade-Giles: Ya1-lu4 Chiang1; [jálû ʨi̯ɑ́ŋ]; Koreaans: 압록강, Amrokgang of Amrokkang, [amɾok̚k͈aŋ]; Mantsjoe: ᠶᠠᠯᡠ ᡠᠯᠠ; letterlik: "die grens tussen twee lande") is 'n suidwes-vloeiende rivier wat vir 790 km die grens tussen die Volksrepubliek China in die noorde en Noord-Korea in die suide vorm. Die rivier ontspring suid van die Hemelmeer in die Changbai-gebergtes op die grens tussen Noord-Korea en die Volksrepubliek China. Aansluitend vloei die Yalu in 'n suidwestelike rigting. Die Yalu mond tussen Dandong, Volksrepubliek China, en Sinuiju, Noord-Korea in die Koreabaai, 'n deel van die Geelsee, uit. Net wes van die Yalu se monding begin die Groot Muur van China.
As gevolg van sy strategiese ligging tussen die Chinese Keiserryk en Korea is die Yalu veral van geskiedkundige belang vanweë verskeie militêre konflikte wat aan dié rivier gevoer is. Van die oorloë wat onder ander aan die Yalu gevoer is, sluit in die Eerste Chinees-Japanse Oorlog, die Russies-Japanse Oorlog, die Tweede Wêreldoorlog en die Korea-oorlog. Vandag is die Yalu veral van politieke en ekonomiese belang weens die noue samewerking tussen die Volksrepubliek China en Noord-Korea. Die Yalu in die weste vorm saam met die Changbai-gebergtes in die middel en die Tumen in die ooste die grens tussen die lande Noord-Korea en die Volksrepubliek China, maar ook tussen die kulturele gebiede China en Korea. Soms word na die gebied noord van die Yalu en Tumen as Mantsjoerye verwys en dit sluit die Chinese provinsies Liaoning en Jilin in.
Eksterne skakels
[wysig | wysig bron]
Wikimedia Commons het meer media in die kategorie Yalu.- (en) "Yalu River". Encyclopædia Britannica. Besoek op 6 April 2019.
