Alesia
Alesia isch ä keltischs oppidum und d Hauptstadt vo de Mandubier, emenä gallische Volksstamm, wo mit de mächtige Häduer in Verbindig gstanden isch, gsi. Noch der Eroberig vom Julius Caesar isch s ä römischi Stadt z Gallie gsi.
Archäologische Usgrabige sit der Ziit vom Napoléon III. in Alise Sainte-Reine an der Côte-d’Or bi Dijon löön dr Schluss zue, ass s historische Alesia dört gsi isch. D Erforschi vo dere galloromanische Siedlig uf der Hochebeni vom Mont-Auxois isch no lang nonig abgschlosse. Es Fundstück mit der Inschrift IN ALISIIA isch bi de jüngste Uusgrabige gmacht worde, wo jetzt erlaubt, d Zwiifel von ä baar Archäologe an der Identität vom Ort ändgültig z behebe. Früehner het es no anderi, wüsseschaftlig weniger abgsichereti Theorie ge, wo Alesia im Franche-Comté, wie zum Bispil z Salins-les-Bains lokalisiert hai.
Um 52 vor dr Ziitwändi isch Alesia der Schauplatz vo der Entscheidungsschlacht zwüsche de Römer unter em Julius Caesar und de Gallier unter em Vercingetorix gsi. D Eroberig vo dr Stadt het s Schicksal vom ganze Land bestimmt. In der Schlacht um Alesia hai d Römer im Gallische Chrieg d Oberherrschaft über Gallie gwunne. D Schlacht wird detailliert vom Caesar in sim De bello Gallico (7. Buch, 68–89) beschriibe. Dr Caesar brichtet au unverblüemt vo siiner Entscheidung, die gallische Ziviliste (Fraue, Alte und Chinder), wo wägem Nahrigsmangel noch der lange Belagerig vor d Festig gfüehrt worde si, nit dur siini Linie lo abzieh, so dass si vor den Auge vo allne langsam und qualvoll gstorbe si. Neusti Untersuchige bi Alise Sainte-Reine hai d Beschriibig vo dr Belagerig bis in Details chönne bestätige. D Usmass si gwaltig. In nume sächs Wuche hai d Römer ä 15 km lange Belagerigsring rund um Alesia baut und zuesätzlig än 21 km lange Verteidigungsring gege die vereinigte Armeä vo de Gallier, wo mit öbbe 70.000 Ma agruckt si. Das het dur d Luftbildarcheologii wüsseschaftlig chönne bewiise werde.
D Lage vom historische Alesia, wo langi Ziit unklar gsi isch, und d Niiderlag an däm Ort, wo vo de Gallier as Schand empfunde worden isch, wird im Band Asterix und der Arvernerschild dräffend parodiert, wenn de Gallier entsprechendi Dialog in s Muul gleit wärde ("Alesia? Mir wüsse nit, wo säll Alesia lit! Niemer weiss, wo Alesia lit!").
Weblink
[ändere | Quälltäxt bearbeite]
Commons: Alesia – Sammlig vo Multimediadateie
|
Dä Artikel basiert uff ere fräie Übersetzig vum Artikel „Alesia“ vu de dütsche Wikipedia. E Liste vu de Autore un Versione isch do z finde. |
Koordinate: 47° 32′ 14″ N, 4° 30′ 1″ O