Irene Brügger

d Irene Brügger

D Irene Brügger (* 11. Novämber 1979 z Willisau, Lozärn as Irene Hodel) isch e Schwyzer Muusikeri, Klumnischti un Schauspiileri. Syter anne 2007 duet si unter em Pseudonym Frölein Da Capo ufdrätte.

Lääbe

D Irene Brügger het no dr Schuel Chauffrau glehrt. Eerschti Bihnen-Erfahrige het si in dr lokaale Fäldmusik gmacht, in verschiidene Rockgruppe, im Juugedtheater un in ere A-cappella-Formazioon. Im Mai 2007 isch si zum eerschte Mool as Soolochinschtleri Frölein Da Capo ufdrätte. No im nämlige Johr het si dr Noowugsbryys Chlaine Prix Walo gwunne. Im Lauf vu dr Johr het si allmee effetligi Kunzärt ghaa.

Im April 2010 het si iri eerscht CD Frölein Da Capo und Bänd vereffetligt, e zwooti CD mit em Titel Gemischtes Plättli isch im Septämber 2012 uusechuu.

2009 het si ne Roll gspiilt im Schwyzer Spiilfilm Der Sandmann. Vu 2010 bis 2012 het si in dr Satiiresändig Giacobbo/Müller vum Schwyzer Fäärnseh mitgmacht.

As Frölein Da Capo singt d Irene Brügger aigeni, humoristischi Lieder uf Schwyzerdytsch un spiilt derzue Gitarre, Euphonium, Klavier oder Drumpete. Ire Maarkezaiche isch e Loop-Gräät, doodruf spiilt si dr Name Da Capo aa. Wel si eso ne Hufe Inschtrumänt spiilt, nännt si si sälber au ne Aifrauorcheschter. No dr Soolobrogramm Gemischtes Plättli un Nöies Zöigs isch anne 2018 s Brogramm Kämmerlimusik chuu, wu mit em Swiss Comedy Award in dr Spaarte Soolo uuszaichnet wooren isch. Syt 2022 isch s Frölein Da Capo mit em Brogramm Die Ein-Frau-Show unterwägs.

Iri Brogramm macht d Irene Brügger in Aigereschy, si isch Autoori, Kumpenischti, Reschiseeri, Bihnebildneri, Koschdiimdesaineri, Dramatuurgi, Illuschtratoori, Sängeri, Muusikeri un – vor allem – Kabarettischti.

Im Septämber 2015 isch s Buech Episödali mit ire Kolumne us dr Lozärner Zytig uusechuu. Syt 2015 schrybt d Irene Brügger, au unter em Pseudonym Frölein Da Capo, Kolumne fir d Familiezytschrift Schweizer Familie. S sin mittlerwyyli nomol drei Biecher mit gsammlete Kolumne uusechuu: Buntes Treiben (2017), Einmal um den Baum (2019) un Singlesocken (2022).

D Irene Brügger läbt mit irem Mann un ire zwai Chinder z Willisau.

Anderi Bihne-Brojäkt

• syt 2021: FREDDIE – Die Mundartshow. Interpretiert vom Secondhandorchestra (mit Frölein Da Capo, Adrian Stern, Roman Riklin, Daniel Schaub, FM François Mürner)
• 2017 bis 2020: Sgt. Pepper – Ein Mundartabend. Interpretiert vom Secondhandorchestra (mit Frölein Da Capo, Adrian Stern, Roman Riklin, Daniel Schaub, FM François Mürner)
• 2014: Perlen, Freaks & Special Guests. Von und mit Ursus & Nadeschkin

Filmografy

• 2011 Ein Sommersandtraum (Der Sandmann)

Literatur

• Episödali. Kolumnen. Knapp Verlag, Olten 2015, ISBN 978-3-906311-12-8.
• Buntes Treiben. Kolumnen. Knapp Verlag, Olten 2017, ISBN 978-3-906311-32-6.
• Einmal um den Baum. Kolumnen. Knapp Verlag, Olten 2019, ISBN 978-3-906311-56-2.
• SingleSocken. Kolumnen. Knapp Verlag, Olten 2022, ISBN 978-3-907334-04-1.

Uuszaichnige

• 2007: Chlaine Prix Walo (in dr Spaarte Comedy)
• 2019: Swiss Comedy Award (in dr Kategory Soolo fir s Brogramm Kämmerlimusik)
• 2022: Swiss Comedy Award (in dr Kategory Ensemble mit em Secondhand Orchestra fir s Brogramm FREDDIE – Die Mundartshow)

Weblink

• Websyte vum Frölein Da Capo
• Websyte zum Film Der Sandmann uf swissfilms.ch/
• 15 Jahre. Jubiläum, imfau! Jubiläums-Feschtschrift vum Frölein Da Capo, Mai 2022 (PDF; 1,9 MB)

Fueßnote

Dä Artikel basiert uff ere fräie Übersetzig vu dere Version vum Artikel „Irene_Brügger“ vu de dütsche Wikipedia. E Liste vu de Autore un Versione isch do z finde.