صدقيا (إسمه باللغة العبرية צִדְקִיָּהוּ ،معناه الله عادل) هو أخر ملك لمملكة يهوذا من سلالة داووِد، اسمه الحقيقى هو متنيا، تولى الحكم فى سنة 597 ق م بعد حصار القدس بعد السبيى البابلى الأول. و هو ابن الملك يوشيا من مراته حموطل، نصبه الملك البابلى نبوخذ نصر التانى ملك على يهوذا بعد ما سبى يهويا كين ابن اخوه اللى قاد عصيان يهوذا الاولانى على بابل بعد أبيه يهوياقيم. تولى صدقيا الحكم وعمره 21 سنة، وحسب ما يبدو أنه كان قليل الخبره بأمور الحكم لكونه ماكانش من ورثة العرش اليهوذى من البدايه. ومع أن نبوخذنصر هو اللى نصبه ملك على يهوذا فى 597 ق. م إلا أنه قرر العصيان على بابل مرة تانيه بسبب التحريض من شعبه من جهة وتشجيع من مصر من جهة تانيه. هُزم من البابليين فى سنة 587 ق. م فى حصار القدس التانى، وتم سبى معظم سكان يهوذا لبابل وتم تدمير معبد سليمان. وحسب ما ذكر فى سفر إرميا أن نبوخذنصر جلب صدقيا عنده و أمر بقتل أولاد صدقيا قدام عينيه، وبعدها أمر بقلع عينى صدقيا. بعد كده لم تذكر مصادر التوراة مصيره وكيفية وفاته. ومع أن مملكة يهوذا كانت قد وقعت تقريبا فى سنة 587 ق. م، لكن البابليين قرروا تعيين شألتيل ملك على اللى ابقوهم البابليين فى اورشليم خلف لصدقيا.[2]
