আনিছুল হক (ৰাজনীতিবিদ)

আনিছুল হক বাংলাদেশৰ এজন প্ৰখ্যাত ৰাজনীতিবিদ আৰু অধিবক্তা। তেওঁ বাংলাদেশৰ ৰাষ্ট্ৰীয় সংসদৰ (নেচনেল এচেম্বলী) ২৪৬ খন আসনৰ (ব্ৰাহ্মণবাৰিয়া-৪: কচবা-আখাউৰা) পৰা বৰ্তমানৰ সংসদৰ সদস্য। তেওঁ বৰ্তমান বাংলাদেশ চৰকাৰৰ আইন, ন্যায় আৰু সংসদীয় পৰিক্ৰমা মন্ত্ৰী (আইন মন্ত্ৰী) হিচাপে কাৰ্যনিৰ্বাহ কৰি আছে। ২০১৪ চনৰ ৫ জানুৱাৰীত অনুষ্ঠিত বাংলাদেশৰ দশম সংসদীয় নিৰ্বাচনত তেওঁ বিনা প্ৰতিদ্বন্দিতাৰে সংসদ সদস্য (এমপি) হিচাপে নিৰ্বাচিত হৈছিল। তেওঁ পুনৰ ৩০ ডিচেম্বৰ ২০১৮ তাৰিখে ১১ তম সংসদীয় নিৰ্বাচনত জয়ী হৈছিল।

জন্ম

আনিছুল হকৰ জন্ম ১৯৫৬ চনৰ ৩০ মাৰ্চত তদানীন্তন কুমিল্লা জিলাৰ (বৰ্তমানৰ ব্ৰাহ্মণবাৰিয়া জিলা) কচবাৰ পানিয়াৰূপ গাঁৱত হৈছিল। তেওঁৰ দেউতাকৰ নাম চিৰাজুল হক (বাচ্চু মিয়া) আৰু মাতৃ জাহানাৰা হক। তেওঁৰ পিতৃ চিৰাজুল হক বাংলাদেশৰ উচ্চতম ন্যায়ালয়ৰ এজন জ্যেষ্ঠ অধিবক্তা আছিল।

শিক্ষা জীৱন

আনিছুল হকে কেমব্ৰিজ বিশ্ববিদ্যালয়ৰ অধীনত ঢাকাৰ ছেইণ্ট জোচেফ হাই স্কুলৰ পৰা ও-লেভেল উত্তীৰ্ণ হৈছিল। তাৰ পিছত তেওঁ বাংলাদেশৰ ব্ৰিটিছ পৰিষদৰ জৰিয়তে এ-লেভেল  সম্পূৰ্ণ কৰে আৰু ঢাকা বিশ্ববিদ্যালয়ৰ ইংৰাজী সাহিত্য বিভাগত যোগদান কৰে। এই ক্ষেত্ৰত তেওঁ স্নাতক ডিগ্ৰী (সন্মান) আৰু স্নাতকোত্তৰ ডিগ্ৰী অৰ্জন কৰে। তেওঁ একেখন বিশ্ববিদ্যালয়ৰ পৰা এলএলবি উত্তীৰ্ণ হৈছিল আৰু মেধা তালিকাত প্ৰথম স্থান লাভ কৰিছিল। তাৰ পিছত তেওঁ লণ্ডনৰ কিংছ কলেজৰ পৰা এলএলএম উত্তীৰ্ণ হৈছিল।

কেৰিয়াৰ

আইনী বৃত্তি

আনিছুল হকক ১৯৮৫ চনৰ নৱেম্বৰত ঢাকা জিলাৰ অধিবক্তা আৰু ১৯৮৭ চনৰ নৱেম্বৰত বাংলাদেশৰ উচ্চতম ন্যায়ালয়ৰ উচ্চ ন্যায়ালয় বিভাগত এজন অধিবক্তা হিচাপে তালিকাভুক্ত কৰা হৈছিল। ২০০১ চনত তেওঁ বাংলাদেশৰ উচ্চতম ন্যায়ালয়ৰ আপীল বিভাগত উকীল হিচাপে যোগদান কৰে আৰু ২০১০ চনত বাংলাদেশৰ উচ্চতম ন্যায়ালয়ৰ জ্যেষ্ঠ অধিবক্তা হয়। আনিছুল হক তেওঁৰ দেউতাকৰ মৃত্যুৰ পিছত বঙ্গবন্ধু হত্যাকাণ্ড আৰু জেল হত্যা গোচৰ দুয়োটাৰ মুখ্য অভিযোজক হৈছিল। তেওঁৰ আইনী পৰামৰ্শ অনুসৰি, বঙ্গবন্ধু হত্যাকাণ্ডৰ গোচৰ সমাপ্ত হয় আৰু বাংলাদেশৰ শীৰ্ষ আদালতে ৰায় দিয়ে। আনিছুল হক দুৰ্নীতি বিৰোধী আয়োগ বাংলাদেশৰ মুখ্য অধিবক্তা আৰু বিশেষ অধিবক্তাও আছিল। আনিছুল হক ২০০৯ চনত বাংলাদেশৰ বিডিআৰ বিদ্ৰোহৰ সৈতে জড়িত পিলখানা হত্যাকাণ্ডৰ মুখ্য অভিযোজক আছিল।

বাংলাদেশৰ উচ্চতম ন্যায়ালয়ৰ জ্যেষ্ঠ অধিবক্তা স্বৰ্গীয় চিৰাজুল হক আৰু তেওঁৰ পুত্ৰ আনিছুল হক দুয়োজনে ১৯৮০-২০১৪ বৰ্ষত বাংলাদেশৰ আটাইতকৈ গুৰুত্বপূৰ্ণ, আগশাৰীৰ আৰু সংবেদনশীল অপৰাধমূলক গোচৰৰ পৰামৰ্শদাতা হিচাপে কাৰ্যনিৰ্বাহ কৰিছিল।

ৰাজনীতি

২০১৪ চনৰ ৫ জানুৱাৰীত অনুষ্ঠিত হোৱা সাধাৰণ নিৰ্বাচনত আনিছুল হক কচবা আৰু আখাউৰা উপজিলাক লৈ গঠিত ৰাষ্ট্ৰীয় সংসদৰ ব্ৰাহ্মণবাৰিয়া-৪ আসনৰ পৰা বাংলাদেশ আৱামী লীগৰ প্ৰাৰ্থী হিচাপে বিনা প্ৰতিদ্বন্দিতাৰে নিৰ্বাচিত হয়। তেওঁ ২০১৪ চনৰ ৯ জানুৱাৰীত সংসদৰ সদস্য হিচাপে শপত গ্ৰহণ কৰিছিল। তাৰ পিছত তেওঁক ২০১৪ চনৰ ১২ জানুৱাৰীত শ্বেখ হাছিনাৰ তৃতীয় মন্ত্ৰীসভাত অন্তৰ্ভুক্ত কৰা হৈছিল। তেওঁক আইন, ন্যায় আৰু সংসদীয় পৰিক্ৰমা মন্ত্ৰালয়ৰ মন্ত্ৰীৰ দায়িত্ব দিয়া হৈছিল।

আনিছুল হক ২০১৮ চনৰ ৩০ ডিচেম্বৰত ১১ তম সংসদীয় নিৰ্বাচনত একেখন আসনৰ পৰা বাংলাদেশ আৱামী লীগৰ প্ৰাৰ্থী হিচাপে পুনৰ নিৰ্বাচিত হৈছিল। তেওঁ ৩ জানুৱাৰী ২০১৯ ত সংসদ সদস্য হিচাপে শপত গ্ৰহণ কৰিছিল আৰু ৭ জানুৱাৰী ২০১৯ ত শ্বেখ হাছিনাৰ চতুৰ্থ মন্ত্ৰীসভাৰ সদস্য হিচাপে শপত গ্ৰহণ কৰিছিল। তেওঁক এই মন্ত্ৰীসভাত আইন, ন্যায় আৰু সংসদীয় পৰিক্ৰমা মন্ত্ৰালয়ৰ মন্ত্ৰী হিচাপে পুনৰ নিযুক্তি দিয়া হয়। আইন, ন্যায় আৰু সংসদীয় পৰিক্ৰমা মন্ত্ৰালয়ৰ মন্ত্ৰী হিচাপে একেৰাহে দুবাৰ কৈ সেৱা আগবঢ়োৱা তেওঁ বাংলাদেশৰ ইতিহাসৰ প্ৰথম ব্যক্তি।

ব্যক্তিগত জীৱন

আনিছুল হকে ১৯৮৭ চনৰ ১৮ ডিচেম্বৰত নুৰ আমাতুল্লা ৰীনা হকৰ সৈতে বিবাহপাশত আৱদ্ধ হয়। নুৰ আমাতুল্লা হক ১৯৯১ চনৰ ২ জানুৱাৰীত এক গাড়ী দুৰ্ঘটনাত মৃত্যু বৰণ কৰে।

বাহ্যিক সংযোগ

• মাননীয় সংসদ সদস্য আনিসুল হক (বঙালী) Archived 2021-11-17 at the Wayback Machine - বাংলাদেশ ৰাষ্ট্ৰীয় সংসদ সচিবালয়ৰ দ্বাৰা প্ৰকাশিত চমু জীৱনী
• দশম জাতীয় সংসদ সদস্যদেৰ তালিকা (বঙালী) Archived 2019-01-27 at the Wayback Machine - বাংলাদেশৰ ৰাষ্ট্ৰীয় সংসদৰ দ্বাৰা প্ৰকাশিত দশম ৰাষ্ট্ৰীয় সংসদ সদস্যসকলৰ সম্পূৰ্ণ তালিকা
• একাদশ জাতীয় সংসদ সদস্যদেৰ তালিকা (বঙালী) Archived 2020-05-09 at the Wayback Machine - বাংলাদেশৰ ৰাষ্ট্ৰীয় সংসদৰ দ্বাৰা প্ৰকাশিত একাদশ ৰাষ্ট্ৰীয় সংসদ সদস্যসকলৰ সম্পূৰ্ণ তালিকা