Saltar al conteníu

Taijutsu

De Wikipedia
Taijutsu
(体術)
Tamién Taijitsu, Yawara, Koshi no Mawari, Kumiuchi, Jujutsu
Enfoque Golpes, proyeiciones, agarres, estrangulamientos, llaves a les articulaciones
Contautu/durez Non contautu o contautu plenu
País d'orixe Xapón
Paternidá Escueles antigües koryu
Artes descendientes Aikijutsu, Jujutsu, Kenpo, Ninjutsu, Ninpo Taijutsu, Budo Taijutsu
Deporte olímpicu Non
Cambiar los datos en Wikidata

Taijutsu (体術, "arte del cuerpu" or "téunica del cuerpu"), trescritu a veces Taijitsu o Tai-Jutsu, ye un tipu d'arte marcial d'orixe xaponés. En principiu ye una antigua denomación xenérica de los métodos de combate a mano vacía, conocíos allá una vegada como Koshi no Mawari y de los que va surdir el conceutu de Jujutsu (arte de la suavidá). Antaño’l Taijutsu, neto que’l Jujutsu, taben davezu asociaos, o veníen del Yawara. Sicasí usáronse al efeutu denomaciones pervariaes nos distintos periodos históricos de Xapón, estremaes según les rexones xeográfiques y los diferentes heriedes. Caúna d'estes denomaciones refierse a llixeres diferencies arreyaes a carauterístiques téuniques qu'implicaben la utilización de tol cuerpu o de solo una parte. Atópense asina nes distintes tradiciones nomes como: Hakuda, Jujutsu, Kenpo, Torite, Koppo, Goho, Kogusoku, Yawara Jutsu, Koshi no Mawari, Yoroi Kumiuchi, Kumiuchi, Shubaku, Tode, o Kowami.

Téuniques

[editar | editar la fonte]

Nel Taijutsu les téuniques estrémense bramente en dos grandes grupos:

  • Dakentaijutsu: téuniques formaes por bloqueos (“uke waza”) y golpes (“atemi waza”) a los puntos vitales del cuerpu humanu, yá sían óseos (“koppo jutsu”), musculares (“koshi jutsu”) o nerviosos (“kyusho”). Nesti sen, “Dakentaijutsu” aseméyase abondo al conceutu de “Kenpo”.
  • Jutaijutsu: téuniques de proyeición (“nage waza”), d'agarres, de llaves y de torciones articulares (“katame waza”). Nesti sen, “Jutaijutsu” aseméyase abondo al conceutu de “Jujutsu”.

Estos dos grupos principales complétense y rellaciónense ente ellos per aciu d'amesta-yos un elementu téunicu complementariu: el Taihenjutsu.

  • Taihenjutsu: consta de pasos (“tai sabaki”), rodamientos o cayíes (“ukemi waza”), escapes (“hakuda waza”), posiciones, etc.

Versiones actuales

[editar | editar la fonte]

Anguaño hai delles versiones de Taijutsu, a vegaes con bien poco que ver ente elles:

  • El Taijitsu o Karate Jutsu, y el Taijitsu clásicu: disciplina d'ámbitu fundamentalmente francés afiliada a la F.F.K.D.A. (Federación Francesa de Kárate y Disciplines Asociaes). Esta afiliación a la federación de kárate va venceyada a un camudamientu del xacer téunicu del "Tai-jitsu", orientándolu más haza la defensa personal per aciu amás d'amesta-y mui bien de téuniques sacaes del kárate. Por esto tamién esti estilu llámase dacuando Karate Jutsu. Ensin embargu, xunto a esta esviación al kárate, inda esiste una conceición más clásica del Taijitsu'. Al ser más recién esta orientación haza’l kárate, munchos maestros siguen insistiendo nun Taijitsu central y orixinal, nel que se combinen tres grandes principios biomecánicos y téunicos ensin que nengún venga dominar sobre los otros: "Ai" o "Wa" (harmonía), "Ju" (suavidá), y "Ken" (percusión). Acordies con esta conceición, habría dientro de les mesmes estructures federatives un Taijitsu más clásicu, proviniente de la enseñanza de los maestros Mochizuki, Alcheik y Hernaez, y un Taijitsu orientáu al kárate (Karate Jutsu).
  • El Nihon Taijitsu[1] o Taijitsu a cencielles: estilu del maestru Roland Hernaez, 9ᵘ Dan, cofundador del Tai-jitsu modernu en Francia a primeros de los años 1970. En Francia esti estilu ta tamién afiliáu a la F.F.K.D.A. N’España ta dixebráu n’estremaes federaciones y/o asociaciones.
  • El Taijitsu Do: estilu fundáu por Daniel Dubois, 7ᵘ Dan, cofundador del Tai-jitsu modernu en Francia a primeros de los años 1970. Esta disciplina ta afiliada a la F.E.K.A.M.T. (Federación Europea de Kárate y Artes Marciales Tradicionales). El Taijitsu Do pretende recobrar l'espíritu orixinal del arte.
  • Tai-jitsu/Seiki-jitsu. Esta escuela llévala en Suiza’l maestru Jean-Pierre Clément. Esti maestru, formáu sobre too nel Yudu, nel Tai-jitsu de Daniel Dubois y nel Seikido de Maxime Mazaltarim, fundó a finales de los años 1980 la so propia escuela de Tai-jitsu/Seiki-jitsu a orielles del llagu Leman. Dende los años 1990 enseña en Moudon (cantón de Vaud). Actualmente, por problemes de salú, el maestru Clément pasó’l testigu al maestru Alexandre Boulgak, ún de los sos alumnos más antiguos.
  • Taijutsu de la escuela Motobu Ryu de Kárate. Hai una seición de Taijutsu na Motobu Ryu[2], escuela creada en 1961 por Seikichi Uehara, 10ᵘ Dan, n’honor de Choyu Motobu y de la so familia. El Taijutsu de Kárate Motobu Ryu yera un métodu de combate guardáu nel más absolutu secretu polos Motobu, la familia real de les Islles Ryukyu. Esti métodu inclúise nun estilu de Ryukyu Kenpo[3] conocíu antaño col nome d'Udun Ti[4] o Undudi, y anguaño col de Motobu Ryu. Ye un estilu de llucha mui completu que tien nel Taijutsu una parte del deprendimientu, completáu con un programa téunicu de Kobujutsu, ello ye, de remanamientu d'armes como’l Bo, el Tanto, el Sai, el Kama, el Yari, el Nunchaku, etc.
  • Ninpo Taijutsu. El Taijutsu tamién ye’l principal métodu de combate a mano vacía que s’atopa nel Ninjutsu (Ninpo). Les siguientes escueles aprienden esti métodu de combate: la Bujinkan de Masaaki Hatsumi (Bujinkan Budo Taijutsu), la Genbukan de Shoto Tanemura y la Jinenkan d'Unsui Manaka. El Taijutsu enseñáu nestes escueles estrémase en Dakentaijutsu (que consta de Kosshijutsu y Koppojutsu) y Jutaijutsu (asemeyáu enforma al Jujutsu). Como estes escueles aprienden un Taijutsu con raigaños típicamente xaponeses, nun ye falso llamales Nihon Taijutsu (“Taijutsu xaponés”), pero reciben más davezu la denomación xenérica de Ninpo Taijutsu. De les escueles que s’enseñen anguaño, éstes son les que probablemente caltienen los raigaños más antiguos de Taijutsu.
  • Escueles de Nihon Taijutsu. El deprendimientu del Taijutsu tradicional xaponés (Nihon Taijutsu) caltiénse en munchos pequeños dojos independientes nel Xapón. Dalgunes d'estes escueles dan una enseñanza tradicional del llinax de Koryu bujutsu como la escuela Yagyu Shingan Ryu[5], fundada por Araki Mataemon (1584-1637) a primeros del Periodu Edo, y cola enseñanza dirixida güei pol Soke Yasushi Kajitsuka, 11ᵘ Gran Maestru. Delles otres escueles d'oríxenes más modernos dan una enseñanza tradicional pero más contemporánea; por casu la escuela de Fuji Ryu Taijutsu[6], fundada en 1952 por Sensei Fujito Koga (1908-1996) y que güei dirixe Sensei Ryutaro Oshima, 3ᵉʳ Gran Maestru.

Referencies

[editar | editar la fonte]
  1. ↑ «Nihon Taijitsu de Roland Hernaez». Archiváu dende l'orixinal, el 2010-12-03.
  2. ↑ «Nihon Denryu Heiho Motobu Kenpo/Motobu Udundi». Archiváu dende l'orixinal, el 2010-01-02.
  3. ↑ «About Nihon Denryu Heiho Motobu Kenpo». Archiváu dende l'orixinal, el 2009-08-05.
  4. ↑ «About Motobu Udundi Kobujutsu Kyokai». Archiváu dende l'orixinal, el 2010-01-01.
  5. ↑ «Yagyū Shingan Ryū Taijutsu». Archiváu dende l'orixinal, el 2011-07-23.
  6. ↑ Fuji Ryū Taijutsu

Enllaces esternos

[editar | editar la fonte]
Sacáu de «https://ast.wikipedia.org/w/index.php?title=Taijutsu&oldid=4224919»