Vikipediya:Stil kitabçası/Film

Aşağıda film ilə əlaqədar məqalələrin adlandırılması, redaktə edilməsi, məzmun quruluşu haqqında qaydalar və göstərişlər verilmişdir. Aşağıdakı qaydalar ancaq filmlər üçün nəzərdə tutulmuşdur. "Əsas məzmun" başlığı altında hər bir filmdə olması vacib olan bölmələr göstərilmişdir. "İkinci dərəcəli bölmələr" başlığı altında göstərilmiş bölmələr isə əlavə bölmələrdir. Bölmələrin ardıcıllığı müəyyən olunmamışdır. Filmlər haqqında yazılmış Seçilmiş və ya Yaxşı məqalələrə baxaraq uyğun ardıcıllığı gözləyin. Əgər qaydalar haqqında hər hansı bir çatışmazlıq ortaya çıxarsa, konsensus yolu ilə qaydalar dəyişdirilə və ya təkmilləşdirilə bilər. Daha ətraflı məlumat üçün bu səhifəyə baxın: Stil kitabçası

Məqalələr

Janrından (elmi fantastika, dram, romantika, triller, qorxu və s), uzunluğundan (qısametrajlı və ya tammetrajlı), istehsal olunduğu ölkədən (Azərbaycan, ABŞ, Fransa, Nigeriya, Hindistan, Yaponiya və s.), istehsal ilindən (1918-ci il filmi, 2018-ci il filmi və s.), dilindən (azərbaycanca, yaponca, türkçə və s.) asılı olmayaraq bütün filmlər bu qaydalara tabedir. Animasiya filmləri (anime filmləri üçün bəzi istisnalar olmaqla), sənədli filmlər və telefilmlər də buna daxildir. Teleseriallar isə bu qaydaya daxil deyildirlər.

Ensiklopediklik

Filmlər haqqında yaradılmış məqalələr ensiklopediklik kriteriyalarına uyğun gəlməlidir. Ensiklopediklik qaydası film məqalələri üçün də keçərlidir.

Adlandırma

Ümumi standart

Bütün filmlərin adları Azərbaycan dilinə uyğunlaşdırılmalıdır (bəzi istisnalar ola bilər. Məsələn, Anime və manqa məqalələrinə baxın). Filmin adlandırılması zamanı əvvəlcə onun Azərbaycanda lisenziyalaşdırılıb-lisenziyalaşdırılması nəzərə alınmalıdır:

1. Əgər film Azərbaycanda lisenziyalaşdırılıbsa, o zaman həmin addan istifadə olunmalıdır. Çünki ola bilər ki, lisenziyalaşdırılmış adla filmin orijinal adı uyğun gəlməsin.

• Nümunə: "Captain America: The Winter Soldier" filmi Azərbaycan dilinə "Kapitan Amerika: Qış əsgəri" kimi tərcümə olunsa da, kinoteatrlarda "Birinci qisasçı: Başqa müharibə" adı ilə göstərilmişdir. Buna görə də məqalənin adı "Birinci qisasçı: Başqa müharibə" olmalıdır.

2. Əgər film Azərbaycanda lisenziyalaşdırılmayıbsa, bu zaman filmin orijinal adı Azərbaycan dilinə tərcümə olunmalıdır.

• Nümunə: 1993-cü il istehsalı "Calendar" filmi heç vaxt lisenziyalaşdırılmayıb. Deməli, orijinal adın tərcüməsindən — "Təqvim" adından istifadə olunmalıdır.

Adlandırma qaydası

1. Bütün filmlərin standart adlandırma şəkli belədir: Əvvəlcə filmin adı yazılır, daha sonra mötərizə açılır, mötərizənin içində əvvəlcə film sözü yazılır, sonra boşluq buraxılaraq filmin istehsal ili qeyd olunur: Filmin adı (film, xxxx)

• Nümunələr: Troya (film, 2004); Qisasçılar: Altron dövrü (film, 2015); Şindlerin siyahısı (film, 1993)

Qeyd: Bu qaydaya animasiya filmləri və telefilmlər, eləcə də, qısa və ya tammetrajlı də tabedir. Yəni "film" sözü əvəzinə "animasiya filmi" və ya "telefilm" sözü yazılmamalıdır.

2. Ola bilər ki, iki eyniadlı film eyni ildə istehsal olunsun. Bu zaman filmin adında onun istehsal olunduğu ölkənin adı əlavə olunmalıdır: Filmin adı (Ölkə filmi, xxxx)

• Nümunələr: Qəhrəman (Yaponiya filmi, 2015) və Qəhrəman (Hindistan filmi, 2015); Dövlət xəyanəti (Almaniya filmi, 1929) və Dövlət xəyanəti (Böyük Britaniya filmi, 1929)

3. Ola bilər ki, eyni ildə və eyni ölkə tərəfindən müxtəlif dillərdə bir neçə film istehsal olunsun. Bu zaman filmin adında dili qeyd olunur: Filmin adı (Dil-ca² film, xxxx)

• Nümunə: Gözəl macəra (almanca film, 1932) və Gözəl macəra (fransızca film, 1932);

Əsas məzmun

Film haqqında məqalədə aşağıda göstərilmiş bölmələrin olması tövsiyə olunur. Məqalələrin mövzusu, müxtəlifliyi və həcmi dəyişilə bildiyi üçün aşağıdakı bölmələrlə bağlı ("Giriş" hissəsi istisnadır) qaydalarda istisnalar yarana bilər.

Başlıq

Məqalənin başlıq hissəsinə məqalənin əsas hissəsində yer alan ən əhəmiyyətli aspektlər daxil edilməlidir. İlk cümlədə minimum filmin azərbaycanca və orijinal adı, istehsal ili və janrı göstərilməlidir. Məqalənin içində adlandırma qaydasına riayət edin. Filmin ilk cümləsi belə standarta malik olmalıdır:

'''Qisasçılar''' ({{lang-en|Avengers}}) – 2015-ci il istehsalı ABŞ superqəhrəman və elmi fantastika filmi.

Əgər film bir ölkə tərəfindən istehsal olunubsa, bu ilk cümlədə qeyd olunmalıdır. Əgər bir neçə ölkə tərəfindən istehsal olunubsa, növbəti cümlələrdə bu bildirilə bilər. Başlıq hissəsinin ilk paraqrafında filmin rejissoru və filmin əsas rollarında çıxış etmiş aktyor və aktrisalar göstərilməlidir. Əgər film üzərində məşhur prodüserlər və ssenaristlər işləyibsə, onların adları ilk paraqrafda qeyd oluna bilər. Əgər film hər hansı bir əsər əsasında (məsələn, roman və ya komiks) çəkilibsə, həmin əsər və əsərin müəllifi də ilk paraqrafda göstərilməlidir.

Başlıq hissəsinin sonrakı paraqraflarında məqalənin əsas hissəsində yer alan və ilk paraqrafda qeyd olunmayan əhəmiyyətli aspektlər yazılmalıdır. Bu cür əhəmiyyətli məlumatlara filmin istehsalındakı əsas hadisələr, filmin əsas mövzuları, tənqidçilərin rəyi, əldə olunmuş gəlir, filmlə əlaqədar yaranmış mübahisələr, mükafat və nominasiyaların xülasəsi, spin-offlar (davam filmləri, düzəlişlər, digər media və s.) və cəmiyyətə təsiri aid ola bilər. İlk cümlədə "mükafatın qalibi" və buna bənzər ifadələrdən istifadə etməkdən çəkinin, məqalənin tərəfsiz olmasına diqqət yetirin və mükafatların xülasəsi haqqında başlıq hissənin növbəti paraqraflarında məlumat verin.

Başlıq hissədə çox istinad yerləşdirmək lazım deyil, istinadlar növbəti bölmələr üçün saxlanmalıdır.

Məzmun

Filmdə yer alan "Məzmun" bölməsində filmdə baş verən hadisələr göstərilməlidir. Film məqalənin əsas mənbəyi olduğundan, bu bölmədə istinad qoymağa ehtiyac yoxdur. Lakin istisna hallar da vardır: "İtmiş" və ya hələ çıxmamış film məqalələrinin bu bölməsində istifadəçilər istinadlar göstərməlidirlər.

Bədii filmlər haqqındakı məqalələrdə bu bölmənin uzunluğu 400-700 söz arasında olmalıdır. Bu bölmədə lazımsız məlumatlar yer almamalıdır, bu, məzmun bölməsini mürəkkəbləşdirə bilər (əgər məzmunla bağlı bu cür problem varsa, digər istifadəçilərlə bunu müzakirə edin). Mürəkkəb məzmunlar bəzən ikinci dərəcəli istinadlara ehtiyacı olur ki, bu da bu bölmədə istinadların istifadəsinə gətirib çıxarır. Əgər ikinci dərəcəli istinadlarda göstərilən məlumatlarla filmdə baş verən hadisələr arasında fərqlənmə varsa, filmin məzmununu sadəcə olaraq göstərilmiş filmə əsasən təsvir edin və məqalənin başqa bölməsində bu haqda aydınlaşdırma və ya izah verin. Nəhayət, filmdə baş verən hadisələr ekranlarda göründüyü kimi yazılmamalıdır. Əgər lazımdırsa, filmin məzmununu daha aydın başa düşülən etmək üçün bölmədə əsaslı dəyişikliklər edilə bilər.

"Məzmun" bölməsində sadəcə filmdə baş verən əsas hadisələr göstərilməlidir. Buna görə də dialoqlar, filmin təhlili, fərdi zarafatlar və texniki detallar kimi məlumatları bölməyə daxil etməkdən qaçınmaq lazımdır.

Filmin məzmunu onun orjinal versiyasına əsasən yazılmalıdır. Alternativ versiyaları (məsələn, teatr) haqqında digər bölmələrdə məlumat verilə bilər.

Spoylerlər

Vikipediyada məzmun məsuliyyətinin rəddi və spoylerlərə tətbiq olunan qaydalar nəzərə alındıqda filmlərin hamısında spoyler hesab olunan mətnlər göstərildiyi halda belə xəbərdarlıq şablonları yerləşdirməyin. Qısaca, Vikipediya özündə spoylerlər saxlayır və bu göstərişə hörmətlə yanaşın.

Rollarda

Filmdə rol almış aktyorlar və aktrisalar müxtəlif formalarda göstərilə bilər. Amma bu zaman 3 "açar element"ini nəzərə almaq lazımdır: 1) filmin ancaq əsas rolları və bu rollarda çıxış etmiş şəxslər; 2) hər aktyor/rol üçün qısa məlumat; 3) məqalənin strukturu. İstifadəçilər mövzu ilə bağlı məlumatı istifadəçiyə daha dəqiq çatdırmaqdan ötrü bu bölmə bağlı göstərilmiş "açar element"ləri poza bilərlər. Əgər mümkündürsə, bunu müzakirə yolu ilə edin. "Açar element"lər haqqında:

1. Filmin aktyor heyəti əhəmiyyətinə və genişliyinə görə dəyişə bilər. Filmin ansambl aktyor heyəti və ya çox az aktyoru ola bilər. Vikipediya dolaşıq məlumatlar yığını deyildir, buna görə də ancaq əsas aktyorları göstərmək lazımdır, filmdə kiçik rolları olan şəxsləri göstərmək lazım deyil. Lakin əgər filmdə kiçik rol almış şəxslər əhəmiyyətli və tanınmış şəxslərdirsə (məsələn, əsasında film çəkilmiş əsərin müəllifi), bu haqda axırda kiçik qeyd vermək olar. Əgər bu siyahı çox uzundursa, iki çıxı yolu var: Ya siyahını 2-3 sütun şəklində göstərmək, ya da nisbətən daha əhəmiyyətli olmayanları axırda nəsirlə göstərmək.
2. Filmin hər aktyoru və rolu haqqında məlumat verilə bilər. Lakin bu məlumatın ölçüsü filmlərə görə dəyişə bilər. Əsasən, rolun yazılması, aktyorun bu rola necə seçilməsi və bu rol/aktyor üçün görülən hazırlıqlar barədə məlumat verə bilərsiz. Film məqaləsinin genişləndirilməsi zamanı hər aktyor zamanı bir neçə cümlə yazmaq olar.
3. Məqalənin strukturu məqalənin görünüşünə təsir göstərə bilər. "Rollarda" bölməsində sadə aktyor siyahısı əsasən qaralama məqalələr üçün uyğundur. Əgər məqalə genişləndirilirsə, rollarda çıxış etmiş şəxslər başqa yollarla təqdim oluna bilər. "Rollarda" bölməsi saxlanıla bilər, amma rollar cədvəllə göstərilməlidir. Bundan başqa aktyorları və rollarını "Məzmun" bölməsində göstərmək mümkündür. Cədvəlləri onların mürəkkəbliyinə uyğun şəkildə istifadə edin. Onlar daha çox stabil, geniş məqalələr üçün uyğundurlar (tövsiyyə olunur ki, cədvəllər filmdə müxtəlif aktyor siyahıları olduqda istifadə olunsun. Məsələn, yapon animasiya filmində yapondilli aktyor heyəti ilə ingilisdilli aktyor heyətini ayırmaq üçün).

Rolların filmdə vəziyyətlərini (müsbət, mənfi, əsas) bu bölmədə göstərməkdən çəkinmək lazımdır. Yaxşı yazılmış məzmun özü bunu oxucuya çatdırmalıdır. Aktyorların rolları qalın şriftlə yazılmamalıdır.

Mövzular

Mövzular filmin ünsürlərində (dialoqlar, məzmun, şəkillər, musiqi) yer alan aparıcı ideya və motivlərdir. Mövzular həyat, cəmiyyət və ya insan təbiəti haqqında məlumatları ifadə edir. Bu bölmədə istinadlara geniş yer verilməlidir, şəxsi tədqiqatlardan istifadə etmək olmaz. "İstehsal" və ya "Qəbul" bölmələrində bu haqda ayrıca altbölmə açmaq lazım deyil.

İstehsal

Filmin istehsalını daha aydın başadüşülən göstərmək üçün bölməni 4 altbölməyə ayırmaq olar:

• İstehsaldan öncəki dövr: filmin çəkilməsi üçün ssenarilərin yazılması, filmin çəkilmə ideyasının nə vaxt ortaya çıxması.
• Çəkilişlərə hazırlıq: baş və əsas rolların seçilməsi, filmin çəkilməsinə görülən hazırlıqlar.
• Çəkilişlər: filmin əsas çəkilişi — tarixlər və yerlər, çəkilişlərin gedişi, çəkilişlər zamanı baş verən əhəmiyyətli hadisələr (gecikmələr, yenidən başladılan çəkilişlər, maliyyə problemləri və s.).
• İstehsaldan sonra: xüsusi effektlərin tətbiqi, musiqi və səslər, montaj.

Bölmə elə şəkildə strukturlaşdırılmalıdır ki, mövcud mətn uyğunlaşdırıla bilsin. Məsələn, əgər hər mövzu ilə bağlı kifayət qədər material varsa, bölmə mütləq altbölmələrə ayrılmalıdır.

Buraxılış

Məqalənin "açar" hissələrindən biri də filmin yayımlanması və necə yayımlanması haqqında olmalıdır. Bu bölmənin əhatə dairəsi filmdən filmə dəyişə bilər, istifadəçilər bölməni oxucuların rahat şəkildə başa düşəcəkləri vəziyyətə gətirə bilərlər. Filmin yayımlanması haqqındakı məlumat və qəbul sadəcə "Yayımlanması" bölməsi altında göstərilə bilər. Lazım gələrsə bölmə altbölmələrə ayrıla bilər. Filmin yayımlanması haqqındakı məlumatlara filmin film festivallarındakı diqqətəlayiq ekranlaşdırmaları, teatr paylanması, setuplar (IMAX, rəqəmsal), yayımlanma tarixlərinin dəyişdirilməsi aiddir. Lazımı yerlərə istinadlar yerləşdirilməlidir. Film müxtəlif ölkələr üçün yayımlana bilər. Buna görə də hər ölkə üçün filmin yayımlanması haqqında məlumat yerləşdirmək lazım deyil.

Tənqidçilərin mövqeyi

Bu bölmədə film haqqındakı tənqidlər göstərilməlidir. Bölmə etibarlı mənbələrlə təchiz olunmalıdır. "Gəlincik" sözlərindən qaçınmaq lazımdır. Əgər tənqidlərlə bağlı müzakirə baş versə, birbaşa mənbə göstərin. Film üçün tənqidçilərin verdiyi ümumi rəy (mənbə ilə) göstərmək daha məqsədəuyğundur. Fərdi tənqidlər filmin müxtəlif aspektlərini göstərmək üçün istifadə oluna bilər. Peşəkar tənqidçilər etibarlı mənbələrə aid edilir, lakin filmlə və filmin uyğun gəldiyi mövzu ilə əlaqədar olan ekspertlər və şərhçilər də buna aid edilə bilər. Dərc edilmiş şərhlərdən istifadə etmək daha məqsədəuyğundur, geriyə baxdıqda bunlar daha etibarlı mənbələrdir. Rotten Tomatoes və Metacritic kimi tənqidçi saytların filmlə bağlı statistikalarını bölmədə göstərmək olar. Müsbət və mənfi şərhlərin nisbətinin statistikasına üstünlük vermək lazımdır. Tərəfsizliyi qoruyub saxlamaqdan ötrü bu şərhlərin məntiqə uyğun olaraq balanslaşdırılmış şəkildə göstərilməlidir. Bu, həmişə mümkün olmaya və ya arzu olunmayan ola bilər (məsələn, ola bilər ki, film hamı tərəfindən bəyənilsin və ya əksinə).

Məsləhət görülür ki, bölmədə göstərilmiş tənqidlər və şərhlər filmin istehsal olunduğu ölkə ilə bağlı olsun (məsələn, Çin filmi üçün çinlilərin verdiyi tənqidlər, Fransa filmi üçün fransızların verdiyi tənqidlər). Lakin bir neçə azərbaycandilli və ingilisdilli ölkədən tənqidlərin verilməsi arzuolunandır. Film haqqında səsləndirilmiş fikirlər və tənqidlər mütləq azərbaycan dilinə tərcümə olunmalıdır. Qədim filmlər üçün bu bölmənin quruluşuna gəldikdə isə, müasir dövrün tənqidləri ilə qədim dövrlərin tənqdiləri arasında fərq qoyulmalıdır. Əgər film üçün verilən ilk tənqidlər müasir gündəki ad-sanından fərqlənirsə, ikinci dərəcəli mənbələrdən istifadə edin.

Gəlir

Filmin maliyyə performansının xülasəsini (gəlir) də göstərin, əgər mümkündürsə, filmin istehsal olunduğu ölkənin milli valyutasından istifadə edin. "Ölkədaxili" kimi indeksal terminologiyadan istifadə etməkdən çəkinin. Məsələn, "Box Office Mojo" filmlərin əldə etdiyi gəlirlər haqqında məlumat verərkən ABŞ və Kanadada əldə olunmuş gəliri "ölkədaxili" gəlir, digər ölkələrdə əldə olunmuş gəliri isə "beynəlxalq" gəlir kimi qələmə verir. Halbuki, bu terminlərin mənası Vikipediya oxucuları tərəfindən müxtəlif cür başa düşülə bilər. Əvəzində, əsas ölkəni və ya ölkələri dəqiqləşdirin və ya rəqəmləri əsas ölkədən xaricdə olduğunu göstərin.

Məlumatlar "Tənqidçilərin mövqeyi" bölməsinin altında göstərilməlidir. Amma kifayət qədər dolğun məlumat varsa, məsləhət olunur ki, "Gəlir" bölməsinin altında verilsin. Bütün dünyada əldə olunan gəlir statistikalarından əlavə, bölmə açılış həftələrinin nəticələri, ingilisdilli ölkələrdəki nəticələri, filmin göstərildiyi kinoteatrların sayı, tamaşaçıların demoqrafik göstəriciləri haqqında məlumat ehtiva etməlidir. Filmin istehsal olunmadığı, amma filmlə bağlı diqqətəlayiq rola sahib ölkədə filmin performansı haqqında da məlumat vermək olar (məsələn, Çində çəkilmiş ABŞ filminin Çindəki performansı haqqında məlumatın daxil edilməsi mümkündür). Filmin gəlir statistikaları etibarlı mənbələrlə təchiz olunmalıdır. Bu kimi mənbələrə "Box Office Mojo" kimi saytlar və "Variety" ilə "The Hollywood Reporter" kimi nəşrlər aid edilə bilər. Mənbələrlə bağlı müzakirə açıla bilər, amma istifadəçilər filmin uğuru və ya uğursuzluğu haqqındakı baxışlarının bölməyə təsir etməsindən çəkinməlidirlər.

Tamaşaçıların rəyi

Bu məzmunun məqalədə ayrıca bölmədə yerləşdirilməsinə ehtiyac yoxdur. Sadəcə CinemaScore və PostTrak kimi etibarlı film haqqında səsvermələr barədə məlumatlar həcmindən asılı olaraq uyğun bölmədə və ya tənqid bölməsində yerləşdirilə bilər. Əgər hansısa müəllif etibarlı ictimai komentariyadan sitat gətirirsə, ümumi ictimaiyyətin rəylərindən sitat gətirməyin (məsələn, Amazon.com, IMDb və şəxsi bloqlardakı istifadəçi rəyləri). Çünki həmin şəxslərin bu sahədəki mütəxəssisliyi və təcrübəsi məlum deyil. IMDb və Rotten Tomatoes kimi saytlardakı istifadəçi reytinqlərindən istifadə etməyin. Çünki onlar səsverməyə və demoqrafik baxış bucağına qarşı həssasdır.

Mükafatlar nominasiyalar

Mükafatlar və nominasiyalar ayrı bölmədə də göstərilə bilər. Bölmə filmin əldə etdiyi mükafatları, namizəd olduğu mükafatları, düşdüyü tənqidi siyahıları (məsələn, AFI-nin 100 ili... 100 film) əhatə etməlidir. Filmin əldə etdiyi mükafatların sayı və əlaqəli məlumatlar onu necə təqdim etməyi müəyyənləşdirməkdə kömək edə bilər. Əgər film çox az mükafat qazanıbsa, bunun üçün ayrı bölmə açmaq lazım deyil. Əksinə, əgər filmin qazandığı mükafatlar çoxdursa, o zaman onları cədvəldə vermək daha düzgündür. Cədvəl sütunları əsasən belə adlandırılmalıdır: "Mükafat", "Tarix", "Kateqoriya", "Qəbul edən və ya namizəd", "Nəticə" və "İstinad". Əgər filmin əldə etdiyi mükafatlar həddən artıq çoxdursa və ya bu bölmə məqalənin qalan hissəsinə nisbətən çox yer tutursa, filmin əldə etdiyi mükafatlar haqqında ayrıca məqalə yaratmaq olar (məsələn, O filminin qazandığı mükafatların siyahısı). Göstərilən mükafatların özləri də ensiklopedik şərtləri ödəməlidir. Əgər filmin əldə etdiyi mükafat Vikipediya standartlarına görə qeyri-ensiklopedikdirsə, məqalədə göstərilməməlidir. Sadəcə internet üzərindən təqdim olunan mükafatlar (veb-mükafatlar və ya realda mövcud olmayan mükafatlar) bölmədə göstərilməməlidir.

"Mükafatlar və nominasiyalar" bölməsində məlumatlar nəsrlə və cədvəllə verilə bilər. Bölmə cədvəl şəklində verilə bilər, mükafatlara ümumi baxış və onların verilməsinin arxaplanı haqqında məlumatlar nəsrlə verilməlidir. Filmin yer aldığı tənqidçilərin top-10 siyahıları burada göstərilməməlidir (istisnalar olarsa, əvvəlcə müzakirəsi aparılmalıdır).

Ev buraxılışı

Mümkündürsə, filmin ev buraxılışı haqqında məlumatlar verin: buraxılış tarixləri, gəlirlər və s. DVD və BD əlavələr haqqında xülasə vermək olar, lakin həddən artıq xırdaçılıqdan qaçının. Əgər filmin istehsalçısı tərəfindən dəstəklənərsə, buraxılışa daxil edilən silinmiş səhnələr "İstehsal" bölməsində göstərilməlidir. Səhnənin silinmə səbəbi daha vacib elementdir, buna görə də media bölməsində yerləşdirilməməlidir.

Məqalənin infoqutusundakı şəkil kover-art funksiyasını daşıyır və mövzunu xarakterizə edir.

İstinadlar

Oxucular film haqqında verilən məlumatların doğruluğunu təsdiqləyə bilməlidirlər, buna görə də istinadlar etibarlı mənbələrə söykənməlidir. Əgər məqalədə dayaq istinad sistemindən istifadə edilibsə, elə bu sistemdən istifadə etməyə davam edin. İstinadların düzgün və yaxşı şəkildə vermək üçün seçilmiş və yaxşı məqalələri nəzərdən keçirin.

• Vikipediya:Etibarlı mənbələr
• Vikipediya:İstinad şablonları
• Vikipediya:VikiLayihə Film/Mənbələr

Məqalənin içərisində veb səhifələrə istinadlar verirsinizsə, çalışın ki, son istifadə tarixini də qeyd edəsiz. Bəzən elə olur ki, veb mənbələri əlçatmaz olur. Buna görə də həmin istinadları Wayback Machine kimi vasitələrlə arxivləşdirin, orijinal URL-ni də qeyd etməyi unutmayın.

Xarici keçidlər

Film məqalələrində əgər bir dənə rəsmi sayt varsa, onu "Xarici keçidlər" bölməsində göstərmək lazımdır. Vikipediya xarici keçidlər yığını deyil. Buna görə də mümkünsə, xarici keçidlər hər nə zamansa məqalənin içərisində istinadlara çevrilməlidir. Vikipediya məqaləsi istifadəçini tam təmin etmirsə xarici keçidlər ona kömək edə bilər. Məsələn, Metacritic və Rotten Tomatoes kimi saytlar məqalədə göstəriləndən daha çox tənqid siyahıları təqdim edə bilir. İndividual tənqidlər üçün verilən keçidlərin əvəzinə onlar xarici keçid kimi verilə bilər. Digər yararlı keçidlər cəmiyyətin baxışını əks etdirən Internet Movie Database və filmin əldə etdiyi gəlir haqqında statistika təqdim edən Box Office Mojo-dur. Bu yararlı saytlar üçün şablonlar aşağıda göstərilmişdir, amma hər xarici keçidi öz xüsusiyyətlərinə görə dəyərləndirin. Məsələn, film Rotten Tomatoes və ya Metacritic saytlarında çox tənqidə malik olmayacaq qədər tanınmamış və ya Box Office Mojo saytında gəlir statistikaları olmayacaq qədər köhnə ola bilər. TCM Movie Database əsasən klassik filmlər üçün yararlı xarici keçid ola bilər (buraya əsasən ən yeni filmlər üçün heç nə əlavə etmirlər). Tanınmış müəlliflərin saytları istisna olmaqla, fansaytları göstərməkdən çəkinmək lazımdır. Yadda saxlayın ki, bu bölmədə hansısa saytı reklam etmək spam hesab olunur. Filmin hansısa platformadakı versiyasına (məsələn, YouTube) keçid vermək lazım deyil.

• {{IMDb title|id=0088247|title=The Terminator}} verir:
  • The Terminator — Internet Movie Database saytında

• {{tcmdb title|id=92566|title=The Terminator}} verir:
  • The Terminator TCM Movie Database saytında
• {{Amg title|id=49101|title=The Terminator}} verir:
  • The Terminator AllMovie saytında
• {{rotten-tomatoes|id=terminator|title=The Terminator}} verir:
  • The Terminator Rotten Tomatoes saytında  (ing.)
• {{metacritic|id=the-terminator|title=The Terminator}} verir:
  • The Terminator Metacritic-də
• {{mojo title|id=terminator|title=The Terminator}} verir:
  • The Terminator Box Office Mojo-da