Luger-P08

De Luger-P08 oda Pistoin 08 is a Pistoin (Sejbstloda), de wo vom Östareicha Georg J. Luger (1849–1923) konstruiat worn is.

Gschicht

Umd P08 gibts so manche Legendn. Und a echta Hollywoodfuim iwan Zwoatn Wejdkriag is ned authentisch, wenn ned a P08 afdaucht, mid der a "Kraut" umadum fuchtlt. Dass de Woff urspringli scho 1908 beim kaiserlichn Heer im Deanst gstejt worn is (drum de Bezoachnung Pistoin 08) is weniga bekannt. Und aa ned, dass da Luger de Pistoin aa ned aloa entwicklt ghobt hod sondan zamm mitm Hug Borchard.

Im letztn Joarzehnt vom 19. Joarhundat entwickeld da Konstruktör Hug Borchardt an Gniaglenk-Vaschluss, dea wo aa im Maschinagweah MG08 verwendt werd, und konstruiat draufhii in Grundtyp vo dera Woff. 1899 bringt de Firma DWM a duachn Georg Luger vabessate Woff aussa, aus dea duach Weidaentwicklung de P08 entstandn is. Oane vo dene Variantn wor schliaßle 1908 de "Pistoin08", wo ins kaiserliche Heer eigfiat worn is. De hod de Revolver Modej 79 und 83 vadrengt. Anno 1913 is no a Version vo da P08 mid langa Lauf (203mm) bei da Atillerie und den Festungsbesatzungan eigfiat worn. Bis zum Ausbruch vom Easchdn Wejdkriag hod de Firma DWM aloa 250.000 Stuck ans Kaiserliche Militea ausgliefat, wobei ma insgsamt vo na Produktion vo iwa 1,5 Milliona bis zum End vom Easchdn Wejdkriag ausgeht.

Ois Foige vom Friednsvatrog vo Versaille is de Produktion vo Faustfeiawoffn iwa an Kaliba vo 8 mm vaboudn worn. Desweng is nua no de Version vo da P08 midm Kaliba 7,65 mm produziat worn. Nua a oanzige Firma, de Simson & Co. in Suhl, hod fia' Reichswehr und d Polizei 9 mm Parabellum heagstejt. Olladings sand in dera Zeit an Haufa Pistoin fian Export produziat worn, z. B. fia: USA, Holland, Finnland, Lettland, Portugal, Persien, Spanien, Peru, Brasilien, Buigarien und Tiakei. 1930 is de Produktion af Oberndorf zua Mauser AG verlogat und vo dort aus weida gfiaht worn. De Mauser P08 hod fiad Wehrmacht nacha a wichtige Roin gspuit.

Technik

De P08 is a Ruckstoßloda mid kuaz zruckgloadtn Lauf und an noch om aufknickdn Gniaglenk-Vaschluss. Im Griffstuck is a Stangamagazin mid a Kapazität vo 8 Patrona 9x19 mm. De Visiarung bsteht aus an festn V-Kimme und an Dachkoan, de Sicheaung wead iwa an Sichaheitshebe an da linkn hintan Gehaiseseitn betätigt. Im Gegensotz zum Nochfoiga, da P38, bsitzt de P08 koa Spannozoag. Zwor wor de Waff vom Prinzip her a recht zavalassige Pistoin, olladings ois Dianstwoff oafoch zu empfindli und zu kompliziat. Da Gniaglenk-Vaschluss eafoadat in da Heastejung a präzise Beorbatung und reagiat empfindle af Staub und Dreeg. Aussadem eafoadat de Verriegelung duach de Oart Vaschluss a genau af de Trägheit und Bewegung vom Vaschluss obgstimmte Pulvameng in da Patron, wei wenn de steaka laboriate Munition vawendt wead, ko des dazua fiahn, dass duach en hechan Gasdruck se da Vaschluss scho dann entrieglt, bevoa da Gasdruck ned af a vaninftigs Maß gsunka is. Oiss gringstes Problem san nacha Vaklemmunga und Lodehemmunga oftmois ned z vameidn.

Im Netz

Commons: P08 Parabellum – Oibum mit Buidl, Videos und Audiodateien

Pistoin P 08 af WaffenHQ.de
Kniaglenkvaschluss
Luger 08
Dokumentation des History Channel (45min., engl.): http://www.youtube.com/watch?v=ZJFm1x091rs