Mont d’an endalc’had

Eduardo Rodríguez-Losada Rebellón

Eus Wikipedia
Eduardo
Rodríguez-Losada

Bez Eduardo Rodríguez-Losada
Anv klok Eduardo Rodríguez-Losada
Rebellón
Ganedigezh 2 a viz Meurzh 1886
A Coruña Banniel Galiza Galiza
Marv 2 a viz Du 1973
A Coruña Banniel Galiza Galiza
Micherioù Savour
Sonaozour

Eduardo Rodríguez-Losada Rebellón, bet ganet en A Coruña d'an 2 a viz Meurzh 1886 hag aet d'an Anaon en hevelep kêr d'an 2 a viz Du 1973, a oa ur savour hag ur sonaozour Galizat.
Ur sonaozour c'hoarieller e voe ivez dre c'halvidigezh, petra bennak ma oa ar savouriezh e vicher.

Treuz

[kemmañ | kemmañ ar vammenn]

Mab e oa d'ar c'horonal kanolier Camilo Rodríguez-Lozada y Ozores, anezhañ diazezer ar skolioù poblek digoust en A Coruña, ha da Felipa Rebellón y Vázquez[1],[2].

E Villagarcia (proviñs Pontevedra) e timezas gant María Trulock Bertorini d'ar 15 a viz Here 1913 ; daou vugel o devoe.

Savour etreadegat proviñs A Coruña e voe[3] kent bout entitlet d'ar 4 a viz Meurzh 1914, gant ur gopr a 3 000 pesetas.[4]
Bez' e voe ivez teñzorer ar Sociedade Filharmónica da Coruña[5],[6], ezel eus an Orfeón El Eco[7] ha kadoriad an Asociación de Arquitectos de Galicia[8].
E 1918 e savas ur raktres evit "adaozañ ha brasaat" kêr Vuxía[9].
Dek vloaz diwezhatoc'h, e 1928, e voe anvet da gadoriad an EMDEN Foot-ball Club, a oa eil brasañ klub mell-droad A Coruña[10].

D'an 2 a viz Mae 1941 e voe anvet da ezel eus Rann ar Savouriezh er Real Academia de Nosa Señora do Rosario en A Coruña ha, d'an 28 a viz Du 1954, da Akademiad a Enor[11].

E vugale a brofas skridoù orin oberennoù Eduardo Rodríguez-Losada Rebellón d'an Akademiezh. Skouerennoù a c'heller kavout ivez er Fundación Juan March[12], er Sociedade de Autores[13] hag er Rexistro da Propriedade Intelectual[14].

Oberennoù sonerezhel

[kemmañ | kemmañ ar vammenn]

Dre ma voe hir e vuhez e talc'has ar sonaozour d'un dibaberezh dibar a glever en e labour a-bezh, ma 'z eo heverk mentrezh an orkestra meur, gant oberennoù evel El gnomo hag a zegas da soñj ar varzhoneg sinfoniek Los gnomos de la Alhambra gant ar sonaouzour spagnol Ruperto Chapí (1851-1909).

Heverkoc'h c'hoazh eo e beder sinfonienn hag e Gengerzad evit piano hag orkestra. A-fed doare sonerezhel avat ez eo brudet Eduardo Rodríguez-Losada evit e bezhioù c'hoarigan awenet gant mojennoù hag istor Galiza, evel O Mariscal (1926) hag a zo diazezet war buhez ar marichal Pardo de Cela (1425-1483), gant pozioù digant ar skrivagnerien ha politikerien c'halizat Antón Villar Ponte ha Ramón Cabanillas ; e Teatro Tamberlick Vigo e voe ar gentaenn, e 1929.

C'hoariganoù
  • El Monte de las ánimas (1927[15], diwar un oberenn gant G. A. Bécquer, komzoù gant Núñez de Cepeda ; leurennet ha renet gant an aozer d'ar 6 a viz Mae 1927 en Teatro Rosalía de Castro, ha kinniget e Teatro Principal Santiago de Compostela d'an 22 a viz Mae[16].
  • O Mariscal (1929), komzoù galizek gant Ramón Cabanillas hag Antón Vilar Ponte ; leurennet ha renet gant an aozer d'an 31 a viz Mae de 1929 e Teatro Tamberlick Vigo.
  • ¡Ultreya! (1935), komzoù gant Armando Cotarelo ; leurennet ha renet gant an aozer d'an 12 a viz Meurzh 1935 e Teatro de La Zarzuela Madrid.
  • El Gran Teatro del mundo, komzoù gant Calderón de la Barca ; ur brouilhed eo, biskoazh ne voe leurennet.
Barzhonegoù sinfoniek
  • El diablo mundo, barrezh ; korollel, diazornskrid[17].
  • El miserere, pozioù gant Gustavo Adolfo Bécquer ; diazornskrid.
  • Los Caneiros (1946), santad sinfoniek ; sonet d'an 17 a viz Du 1946 gant Orkestra Sinfoniek Bilbao dindan renerezh Jesús Arrámbarri e Teatro Buenos Aires Bilbao ; diazornskrid.
  • El Gnogmo (1925), diwar ur vojenn gant Gustavo Adolfo Bécquer ; sonet d'an 8 a viz Mae de 1925 gant Orkestra Sinfoniek Madrid, dindan renerezh Enrique Fernández Arbos e Teatro Rosalía de Castro A Coruña ; diazornskrid.
  • La Santa Compaña, pozioù gant Rey de Viana ; diazornskrid ; ur brouilhed zo evit un doare berroc'h evit ar piano.
Sinfoniennoù
  • Sinfonía en Sol menor ; diazornskrid ; bez' ez eus un treuzskrivadur dornskrivet evit daou biano.
  • Sinfonía en La menor (1949) ; diazornskrid ; sonet d'ar 4 a viz Kerzu 1949 gant Orkestra Kêr A Coruña dindan renerezh Rodrigo de Santiago en Teatro Rosalía de Castro.
  • Sinfonía en Do menor ; diazornskrid.
  • Sinfonía en Re menor ; diazornskrid.
  • Concierto para piano y orquesta en Si bemol ; diazornskrid ; sonet d'an 29 a viz Mae 1955 gant Orkestra Kêr A Coruña dindan renerezh Rodrigo de Santiago en Teatro Rosalía de Castro, gant Pilar Cruz ouzh ar piano.
Sonerezh kambr
  • Colección de 9 cuartetos
  • Coleccion de 3 tríos ; an niv. 1 a voe sonet d'ar 26 a viz Genver1948 en Escola Naval A Coruña ; biolín : Horacio Rodríguez Nache, gaoviolin : José Béjar, piano : Pilar Cruz Rodríguez Nache.
  • Preludio en Sol mayor para dos violines y piano, dediet d'e verc'h Carmen Losada-Trulock.
  • 4 sonatas para piano.
Enrolladurioù

Miret int e Dielloù sonel Radio Nacional de España.

Oberennoù savouriezhel

[kemmañ | kemmañ ar vammenn]

Kevret gant Pedro Mariño ha Leoncio Bescansa e krouas Eduardo Rodríguez-Losada Rebellón ur strollad savourien hag a ziorroas o dibaberezh e kêr A Coruña[18]. Ouzhpenn-se e kemeras perzh en embregerezh hag a grouas ar Geoded Liorzh (Cidade Xardín), enni ar Villa Felisa treset gantañ ha ma vevas gant e diegezh etre 1924 ha 1939.

A-douez an niver bras a savadurioù aozet gantañ en A Coruña ez eo herverk ar Chalé Escudero (1913), an ti Cortés (1918)[19], an ti Escariz war Leurgêr Pontevedra (1927)[19] ha Skolaj an Noterien (Colexio Notarial, 1927-1932)[20].
E miz Meurzh 1928 e kinnigas ur raktres evit sevel ospital nevez Proviñs A Coruña war douaroù Granxa Experimental ("Grañj Arnodel") A Coruña ; e miz Ebrel 1929 e voe dibabet gant Kuzul kêr evit kas al labourioù sevel un draezhenn ha leurioù e kouronklec'h Riazor[21].

Er-maez eus kêr A Coruña e tresas ar savadur José Carrera e Corcubión (1924).

  • Niv. 18 Rúa de San Andrés (A Coruña, 1917)
    Niv. 18 Rúa de San Andrés
    (A Coruña, 1917)
  • Casa Cortés (A Coruña, 1918)
    Casa Cortés (A Coruña, 1918)
  • Villa Felisa, e Cidade Xardín A Coruña (1924)
    Villa Felisa, e Cidade Xardín A Coruña (1924)
  • Sez an Anglo-South American Bank (A Coruña, 1925)
    Sez an Anglo-South American Bank
    (A Coruña, 1925)
  • Casa Ameixeiras (A Coruña, 1925)
    Casa Ameixeiras (A Coruña, 1925)
  • Savadur e Rúa de Francisco Mariño (A Coruña, 1926)
    Savadur e Rúa de Francisco Mariño
    (A Coruña, 1926)
  • Casa Escariz (A Coruña, 1925-1930)
    Casa Escariz (A Coruña, 1925-1930)
  • Niv. 158-160 Rúa de santo André (A Coruña, 1930)
    Niv. 158-160 Rúa de santo André
    (A Coruña, 1930)
  • Niv. 38 Rúa de santo André (A Coruña, 1944)
    Niv. 38 Rúa de santo André
    (A Coruña, 1944)

Levrlennadur

[kemmañ | kemmañ ar vammenn]

Notennoù

[kemmañ | kemmañ ar vammenn]
  1. ↑ (es) TARRÍO, José M., Casamientos en la vieja Coruña, en Anuarion brigantino, 1998
  2. ↑ (gl) Arquivo do Reino de Galicia
  3. ↑ (es) Comisión provincial, en El Eco de Santiago (Santiago de Compostela), 05/03/1914, p. 2.
  4. ↑ (es) Crónica regional – Coruña, en El Correo de Galicia (Santiago de Compostela), 20/03/1914, p. 2.
  5. ↑ (es)Sociedad Filarmónica, en El Noroeste (A Coruña), 21/03/1916, p. 2.
  6. ↑ (es) Centros y Sociedades – La Filarmónica, en El Orzán (A Coruña), 18/03/1918, p. 1.
  7. ↑ (es) El Orfeon « El Eco », en El Orzán, 30/03/1927, p. 2.
  8. ↑ (es) Comunicado, en El Noroeste (A Coruña), 27/02/1917, p. 2.
  9. ↑ (es) Crónica local, en El Orzán, 21/07/1918, p. 2.
  10. ↑ (es) La nueva directiva del EMDEN, en El Orzán, 29/02/1928, p. 2 & La directiva del EMDEN F. C., 03/03/1928, p. 2.
  11. ↑ (es) Real Academia Gallega
  12. ↑ (es) Lec'hienn ofisiel
  13. ↑ (es) Lec'hienn ofisiel
  14. ↑ Lec'hienn ofisiel
  15. ↑ (es) « El monte de las ánimas », una ópera de Rodríguez Losada, en El Orzán, 06/03/1927, p. 1.
  16. ↑ (es) Excursión a Santiago – « El Monte de las Ánimas », en El Orzán, 21/05/1927, p. 1.
  17. ↑ "Diazornskrid" a reer eus moulladur un dornskrid a zo bet aozet gant ul liv arbennik evit ar moullañ.
  18. ↑ (es) Eduardo Rodríguez-Losada Rebellón, Arquitecto
  19. ↑ 19,0 ha19,1 (es) Anuario Brigantino
  20. ↑ (es) Colegio Notarial de Galicia
  21. ↑ (es) En el Ayuntamiento – Una sesión interesante – Orden del día, en El Orzán, 30/04/1929, p. 1.
Adtapet diwar « https://br.wikipedia.org/w/index.php?title=Eduardo_Rodríguez-Losada_Rebellón&oldid=2033759 »