Sırbistandaki macarlar
Sırbistandaki macarlar (macarca Szerbiai magyarok, sırbca Mađari u Srbiji) — Sırbistanda yaşağan bir qavimdir, memleketniñ sayıca eñ büyük qavimleriniñ biridir. Sırbistannıñ Statistika İdaresi tarafından yayınlanğan ealini cedvelge aluv neticelerine binaen, 2011 senesi devletniñ Kosovodan tış territoriyasında 253 899 macar yaşağan[1]. Olarnıñ çoqusı (251 136 kişi) Voyvodina muhtar ülkesinde yaşay (ve şu ülke ealisiniñ 13%-ini teşkil ete), şu sebepten macar tili Voyvodinanıñ resmiy tilleriniñ biridir. Sırbistanda yaşağan macarlarnıñ çoqusı katolik dinindedir, bazıları kalvinciler ya da başqa protestantlardır.
Demografiya malümatı
[deñiştir | kodunı deñiştir]Voyvodinada yaşağan macarlarnıñ eñ çoqusı (57,17%) o vilâyetniñ ğarbiy qısmında, Şimaliy Baçka ve Şimaliy Banat regionlarında otura.[1] Vilâyetniñ beş munitsipalitetinde oturğanlarnıñ çoqusı macardır: Kanija (85,13%), Senta (79,09%), Ada (75,04%), Baçka Topola (57,94%) ve Küçük İdoş (53,91%). Daa üç munitsipalitette macarlar ealiniñ çoqusı olmasa da, onıñ müim bir parçası ola: Çoka (49,66%), Beçey (46,34%), Subotitsa (35,65%). Tamam Subotitsa şeeri Sırbistandaki macarlarnıñ "resmiy olmağan paytahtı" olaraq bellidir. Protestant macarlarnıñ çoqusı beş munitsipalitette yaşay: Eski Moravitsa, Paçir, Feketiç, Yañı İtebey ve Debelâça.[2].
| Sene | Macarlar sayısı | % |
|---|---|---|
| 1921 | 365 982 | 6,46% |
| 1931 | 413 000 | 7,27% |
| 1948 | 433 701 | 6,64% |
| 1953 | 441 907 | 6,33% |
| 1961 | 449 587 | 5,88% |
| 1971 | 430 314 | 5,09% |
| 1981 | 390 468 | 4,19% |
| 1991 | 343 942 | 4,24% |
| 2002 | 293 299 | 3,91% |
| 2011 | 253 899 | 3,53% |
Bağlantılar
[deñiştir | kodunı deñiştir]- ↑ 1,0 1,1 2011 Census of Population, Households and Dwellings in the Republic of Serbia. Statistical Office of the Republic of Seriba. 2013 martnıñ 8 teşkerilgen.
- ↑ http://pod2.stat.gov.rs/ObjavljenePublikacije/Popis2011/Nacionalna%20pripadnost-Ethnicity.pdf