Moldovayı çipleştirmeyin dedilär

Moldovayı çipleştirmeyin dedilär

Bitki yıllarda industriya tehnologiyaları yaşamamıza pek hızlı girerlär. Etiştirämeersin gözünü kıpmaa – nesa eni peydalanmış. O tehnologiyaların çoyunu insannar bir lafsız kablederlär.

Ama kimilerini, dinä izmet edän insannar, “antihristän” gelmiş olduunu sayarak, tepkilerlär. Eni tehnologiyanın arasında “personal kod” hem “elektronik çip” adlı enilikleri “antihristän” gelmä sayêrlar.

Buna karşı da protest ederlär.Taa ileri olan protestlar “personal koduna” karşı oldular. Protestları esaba alarak, Moldova büükleri ozaman izin ettilär, ani kimi din insannarına o kodları vermemää. Şindi protestlar genä başladılar. Sebep - bu yılın başından beeri pasportlara hem saalık strahovkalarına “saabisi için bilgi dolu çip” eklenmesi.

Cumaa günü, Büük ayın (yanvar) 28-dä, Moldova prezidentinin binasının önündä üz kişiyä yakın popaz hem klisä adamnarı toplandılar. Onnarın ellerindä bulunan transporatlarda “Antihristsiz kanonnar isteeriz”, “Elektronikalı konţlagerlerä – yok!”, “Moldovayı çipleştirmeyin” yazılıydı.

Protestä katılan popazların birisi dedi, ani “insannar buradan daalmayaceklar bizi taa işitmeyincä hem çipları strahovkalara hem pasportlara eklemää vazgeçmeyincä”.

Sanmêêrız, ani devletin büükleri alınan kanonnarı diiştireceklär. Zerä o kanonnarın kabledilmesi Evropa tarafından istenildi. Moldova da, nicä kuvettä bulunannar açıkladılar, Evropaya dooru gider. Ama genä da bir kompromis bulunacek, sanêrız.