Pablo Iglesias Posse

Para o político de Podemos véxase: Pablo Iglesias Turrión.

Pablo Iglesias Posse, nado en Ferrol o 18 de outubro de 1850 e finado en Madrid o 9 de decembro de 1925, foi un político galego, fundador do Partido Socialista Obrero Español (PSOE) e da Unión General de Trabajadores (UXT).

Pablo Iglesias Posse

Biografía
Nacemento	18 de outubro de 1850 Ferrol, España
Morte	9 de decembro de 1925 (75 anos) Madrid, España
Lugar de sepultura	mausoleo de Pablo Iglesias 40°25′18″N 3°38′09″O Cemiterio Civil de Madrid
1º Presidente do Partido Socialista Obreiro Español
25 de agosto de 2888 – 9 de decembro de 1925 ← sen valor – Julián Besteiro →
Deputado das Cortes
10 de xuño de 1910 – 15 de setembro de 1923 Circunscrición electoral: Madrid Electo en: Eleccións Xerais 1910 en España, Eleccións Xerais 1914 en España, Eleccións Xerais 1916 en España, Eleccións Xerais 1918 en España, Eleccións Xerais 1919 en España, Eleccións Xerais 1920 en España, Eleccións Xerais 1923 en España
Concelleiro de Madrid
1905 – 1910
Datos persoais
Ideoloxía política	Marxismo
Actividade
Lugar de traballo	Madrid
Ocupación	político, sindicalista
Empregador	Acción Socialista
Partido político	Partido Socialista Obrero Español
Membro de	Unión Xeral de Traballadores
Familia
Cónxuxe	Amparo Meliá (1921–1925)
Sinatura
Descrito pola fonte	Svensk Uppslagsbok (pt) Grande Enciclopedia Soviética 1969-1978, (sec:Иглесиас Пабло) Ensayo de un catálogo de periodistas españoles del siglo XIX (1903-1904), (sec:Iglesias Posse (Pablo), p.206)

Traxectoria

Formación e primeiros anos

Fillo de Juana Posse, Pablo Iglesias naceu nunha familia humilde. Frecuentou a escola entre os seis e os nove anos, cando o seu pai, funcionario público, morre. Ós 9 anos emigrou xunto á súa nai e ó seu irmán máis novo Manuel (que máis tarde morrería de tuberculose) a Madrid. Alí a súa nai vivía pedindo esmola, polo que debido á falta de fondos foi ingresado no hospicio de San Fernando, que abandonou ós 12 anos. Acabados os seus estudos primarios e de tipógrafo, entrou a traballar nunha imprenta á vez que asistía a clases nocturnas de francés pagadas por el mesmo.

Fundación do PSOE

Durante o Sexenio Revolucionario (1869-1875) asistíu a unha serie de charlas en Madrid, entrando a formar parte da sección de tipógrafos en 1870. Tras isto, comezou a sufrir persecucións e despedimentos por parte de distintas imprentas até que en 1874 conseguiu acceder á presidencia da Asociación Xeral da Arte de Imprimir. Dende este posto comezou a preparar, na clandestinidade, un novo partido político de corte obreiro-socialista, que culminou o 2 de maio de 1879 coa fundación clandestina do PSOE na Casa Labra xunto a 16 tipógrafos, 4 médicos, un doutor, dous xoieiros, un marmorista e un zapateiro.

Pablo Iglesias en Vigo, con Heraclio Botana, nunha visita do fundador do PSOE e a UGT.

En 1885, tras abandonar a presidencia da Asociación Xeral da Arte de Imprimir conseguiu o máximo posto na Federación Tipográfica Española.

O 12 de maio de 1886 sae á luz o primeiro número d’El Socialista, revista de corte obreiro-sindicalista fundada por el mesmo e que se continúa editando na actualidade. Entre os seus traballos coma xornalista cómpre destacar a súa colaboración nos xornais La Solidaridad e La Emancipación.

Fundación de UXT

En 1888 fundou a Unión Xeral de Traballadores (UXT), accedendo á súa presidencia en 1889. Este mesmo ano acudiu ao Congreso fundacional da II Internacional como representante portavoz do PSOE.

En 1890 encabezou a primeira manifestación do 1 de Maio en España, na que se esixía a xornada laboral de 8 horas e o cesamento do emprego de nenos en actividades laborais. Tamén nese ano celebrou o II Congreso do PSOE, no que se decidiu participar nas eleccións como partido republicano de corte obreiro-socialista. De feito nas eleccións de 1905 Pablo Iglesias, Largo Caballero e Rafael García Ormaechea saíron elixidos concelleiros por Madrid.

Monólito na honra de Pablo Iglesias no Cantón de Molíns (Ferrol).

Primeiro deputado da historia do PSOE

En 1908 fundou a Casa do Pobo de Madrid. En 1909 foi detido ilegalmente durante a Semana Tráxica de Barcelona como forma de represión. En 1910 o PSOE conseguiu o seu primeiro deputado da historia no Parlamento Español, que ocupou Iglesias e en sucesivas eleccións foi incrementándose o número de representantes. En 1919 cesou parcialmente das súas obrigacións políticas por mor dunha pulmonía e unha saúde cada vez máis resentida.

Escisión ideolóxica do partido

En 1920 e 1921 o PSOE sufriu a escisión de dous grupos partidarios de adherirse á Internacional Comunista (III Internacional) convocada por Lenin. Estes grupos (Partido Comunista Español e o Partido Comunista Obreiro Español descontentos coa moderación do PSOE) acabaron fundando o Partido Comunista de España.

O 9 de decembro de 1925 produciuse o seu pasamento en Madrid e o seu cadáver foi embalsamado e exposto na Capela da Casa do Pobo de Madrid. 150.000 cidadáns acudiron ó seu funeral, que desembocou nunha manifestación lembrada por moito tempo.^{[Cómpre referencia]}

O seu pensamento

"O Partido Socialista é a enteira emancipación da clase traballadora: é dicir, a abolición de tódalas clases sociais e a súa conversión nunha soa de traballadores ceibes e iguais, honrados e intelixentes" - Pablo Iglesias.^{[Cómpre referencia]}

Véxase tamén

Bibliografía

• "Iglesias Posse, Paulo". Dicionario biográfico de Galicia 2. Ir Indo Edicións. 2010-2011. p. 202. 
• "Iglesias Posse, Paulo". Enciclopedia Galega Universal. Ir Indo. 1999-2002. ISBN 84-7680-288-9. 
• "Iglesias Posse, Pablo". Gran Enciclopedia Galega Silverio Cañada (DVD). El Progreso. 2005. ISBN 84-87804-88-8. 
• Couceiro Freijomil, Antonio (1951-53). Diccionario bio-bibliográfico de escritores (en castelán) II. Bibliófilos Gallegos. p. 244. 

Predecesor: Luis Zurdo	Presidente da UGT  1889 - 1925	Sucesor: Julián Besteiro
Predecesor: Ninguén (fundador)	Presidente do PSOE  1879 - 1925	Sucesor: Julián Besteiro