Foramine nigre
.jpg)
Un foramine nigre o cavo nigre[1] es un region del spatiotempore de quem nihil, ni le lumine, pote fugir. Le theoria de relativitate general predice que un massa que es bastante compacte pote deformar le spatiotempore pro crear un foramine nigre. Per le superfacie del foramine nigre il ha un superfacie, definite mathematicamente, appellate le horizonte de eventos que marca le puncto post que nihil pote revenir. Illo se denomina "nigre" proque le foramine absorbe tote le lumine continite in le horizonte e refulge nihil, como un superfacie de nigre perfecte in thermodynamica. Mechanica quantic predice que foramines nigre emitte radiationes como un corpore nigre con un temperatura finite. Iste temperatura es inversemente proportional al massa del foramine nigre; pro isto, il es difficile observar le radiation de foramines nigre del massa stellar o plus.
Objectos cuje campo de gravitate es troppo forte pro lassar le lumine escappar esseva considerate pro le prime vice in le seculo 18 per John Michell e Pierre-Simon Laplace. Le prime solution moderne de relativitate general con un foramine nigre esseva discoperite per Karl Schwarzschild in 1916, ben que su interpretation como un region del spatio de que nihil pote escappar non esseva appreciate completemente durante quatro decennios plus. Considerate un curiositate mathematic pro decennios, in le annos 1960 obras theoretic demonstrava que foramines nigre esseva un prediction generic del relativitate general. Le discoperta del stellas neutronic dava credentia al idea que objectos collabite per gravitation esseva un realitate astrophysic.
Il es expectate que le foramines nigre de massa stellar forma quando stellas gigante se collabe al forma de un supernova al fin de lor cyclo de vita. Post le formation de un foramine nigre, illo pote crescer per absorber massa ambiente. Per absorber altere stellas e funder se con altere foramines nigre, foramines nigre supermassive pote formar se, ab milliones de massas solar.
In despecto de su interior invisibile, on pote determinar le presentia de un foramine nigre per su interactiones con altere materia. Astronomos ha identificate numerose candidatos pro foramines nigre stellar in systemas binari, gratias a su interactiones con lor stellas ligate. Il ha un consenso crescente que plure galaxias ha foramines nigre supermassive in lor centro; principalmente, basate in evidentia forte de un foramine nigre de plus de quatro milliones de massas solar in le centro de nostre Via Lactee.
Referentias
[modificar fonte]- ↑ Derivation: Entitates: 1. (it) Buco nero || 2. (es) Agujero negro || (pt) Buraco negro || 3. (fr) Trou noir || 4. (en) Black hole || Controlo: (de) Schwarzes Loch || (ru) Чёрная дыра || - (Extra): (la) Foramen nigrum
