Sep Marveli di la Mondo Antiqua
La Sep Marveli di la Mondo Antiqua esas listo pri sep notinda strukturi existinta en la mondo antiqua. La unesma tala listo quan ni havas kompilesis en la 2ma–1ma yarcento a.K.
La sep marveli esas:
- La Granda Piramido di Giza. Ol esas la maxim frua, e la unika de la Marveli qua ankore existas. Ol esas la maxim granda de la piramidi di Egiptia. Ol konstruktesis en la 27ma yarcento a.K, por la faraono Khufu, di la quaresma dinastio.
- La Pendanta Gardeni di Babilonia. Ol esas la unika Marvelo pri qua la loko ne esas klare establisaia. Ol ne esas mencionata en texti de antiqua Babilonia, e nula arkeologiala restaji esas trovata; ol forsan esis mitala. Deskriptesis en antiqua periodo ke ol esis alta strukturo montranta arbori, arbusti e viti en acensanta rangi.
- La Statuo di Zeus esis giganta sidanta figuro, alteso cirkume 12,4 metri, en la templo di Zeus ye Olimpia en Grekia. Ol facita, ye cirkume 435 a.K, de ivora plaki ed ora paneli; la trono esis de cedro, ornizita per ebeno, ivoro, oro e precoza stoni. Ol destruktesis en la 5ma yarcento.
- La Templo di Artemis. Ol esis Greka templo ye Ephesos, proxim nuntempa Selçuk en Turkia, qua longatempe esabis situeso di templo. La triesma strukturo, qua stacis dum plura yarcenti, esis un de la "Sep Marveli". En 268 ol domajesis o destruktesis dum invado di Goti.
- La Mauzoleo di Halikarnassos. Ol esis la lasta existinta de la sis destruktita Marveli, restinta til tertremi de la 12ma til 15ma yarcenti. Ol facesis ye cirkume 350 a.K. por Mausolos, ye Halikarnassos, nuntempa Bodrum en Turkia. Olua alteso esis cirkume 45 metri; skultita reliefi ornizis la quar lateri.
- La Koloso di Rhodos esis statuo di la deo Helios sur la Greka insulo Rhodos. Olua alteso esis cirkume 33 metri; ol konstruktesis en 280 a.K. por celebrar la sucesoza defenso di Rhodos kontre Demetrios la 1ma di Macedonia, pos siejo di un yaro. Ol destruktesis en la 7ma yarcento.
- La Faro di Alexandria, en Egiptia, konstruktesis dum la regno di Ptolemaios la 2ma, en la 3ma yarcento a.K. Olua alteso esis plu kam 100 metri: dum multa yarcenti ol esis la maxim alta strukturo facita da homi en la mondo. Ol domajesis da tri tertremi inter 956 e 1323; parti existis til 1480, kande la restanta stoni forprenesis.