თეთრი სქელშუბლა, ჩვეულებრივი სქელშუბლა (ლათ.Hypophthalmichthys molitrix) — მტკარი წყლის თევზი კობრისებრთა ოჯახისა. მისი სხეულის საშუალო სიგრძეა 60–100 სმ, მაქსიმალური სიგრძე 140 სმ,[1] ხოლო წონა 50 კგ.[2] ბინადრობს მდინარე ამურის აუზში, სადაც მისი წონა 16 კგ აღწევს.[3] გვხვდება მდინარეებში, ტბებსა და ტბორებში. სხეული დაფარულია წვრილი ქერცლით, ზურგი რუხი-მომწვანო ფერისაა, გვერდები მოვერცხლისფრო. დიდი, სწრაფმზარდი ჯოგური პელაგიური თევზია. იკვებება ფიტოპლანქტონით, მცირე ზომის ბენთოსური ორგანიზმებითა და დიატომური წყალმცენარეებით. სქესობრივ სიმწიფეს კლიმატური პირობების შესაბამისად, აღწევს სხვადასხვა ასაკში: მდინარე ამურში 6–8 წლისა, ჩრდილოეთის რეგიონებში 6–9 წლისა, სამხრეთში 4–5 წლისა, წყალსატევებში 3–4 წლისა. ნაყოფიერება 1 მლნ. ქვირითი და მეტი. ქვირითი პელაგიურია. იზამთრებს ღრმა ორმოებში ღრმა ძილის მდგომარეობაში. 1950-იანი წლებიდან მოყოლებული განხორციელდა თეთრი და ჭრელი სქელშუბლის მასიური განსახლება. თეთრი სქელშუბლა ინტროდუცირებულია და გავრცელებულია მსოფლიოს მრავალ ქვეყანაში. საქართველოში 1962 წლიდან არის აკლიმატიზებული.[4]
