Josy Braun

Josy Braun
Josy Braun
Pseudonym	de fiischen, cactus, -cactus-, j.b., jb, Jeff, JoB, Monni Jéis, Nekel
Gebuer	14. Januar 1938; Lëtzebuerg
Gestuerwen	4. August 2012; Lëtzebuerg
Nationalitéit	Lëtzebuerg
Aktivitéit	Schrëftsteller, Iwwersetzer, Journalist, Gewerkschaftler, Dichter
Member vun	Conseil fir d'Lëtzebuerger Sprooch, Association luxembourgeoise des journalistes, Lëtzebuerger Schrëftstellerverband
Famill
Bestuet mat	Josée Klincker

De Josy Braun, gebuer de 14. Januar 1938 zu Lëtzebuerg, an do gestuerwen den 3. August 2012^[1]^,^[2], war e lëtzebuergesche, Journalist a Schrëftsteller.

No der Primärschoul zu Biwer huet e seng Humanités gréco-latines an der Belsch, an der École apostolique vu Clairefontaine gemaach. Duerno Diktioun an Art dramatique zu Lëtzebuerg. Vun 1960 bis 1972 war hie Gewerkschaftssekretär ^{[watereng Gewerkschaft]}, a vun 1972 bis 1991 Journalist. Duerno huet hien als fräie Schrëftsteller geschafft.

De Josy Braun huet Prosa, Lyrik, Theater, Cabaret, Radio-Spiller, Kannertheater a Kannerbicher op Lëtzebuergesch an och op Däitsch geschriwwen. En Deel vu senge Wierker goufen op Däitsch, Franséisch, Englesch, Italieenesch, Portugisesch a Russesch iwwersat.

De Josy Braun war:

Member vum Conseil permanent de la langue luxembourgeoise
Member vum Institut grand-ducal, Section arts et lettres
Matgrënner vum Lëtzebuerger Schrëftstellerverband
Grënner vun de Beetebuerger Amis de la Scène
Grënner vun de Cabarets-Ensembelen Huwwelbänk, Bëschzeck a Cabaret J.B., (spéider Cabarenert)
Member a verschiddene Komissioune fir Schoulbicher op Lëtzebuergesch.

Hie gouf e puermol am Kader vum Nationale Literaturconcours ausgezeechent, a krut d'Sëlwerplackett vun der Actioun Lëtzebuergesch.

Dem Josy Braun seng Bicher

Porto fir d'Affekoten

Deen éischte Kriminalroman a Lëtzebuerger Sprooch, deen 1997 bei den Éditions Phi erauskoum, war laang vergraff. 2006 ass e bei den Éditions Josy Braun nees nei erauskomm.

Bannent kuerzer Zäit stierwe sechs Leit u vergëftem Porto. Wann d'Sûreté mengt, et hätt een et op d'Affekoten ofgesinn, da gëtt déi Theorie doduerch op d'Kopp gehäit, datt et och ganz aner Persounen erwëscht.

Um porto para os advogados

Iwwersat vum Luis Gonçalves-Bandeira an iwwerschafft vum Forum Portugal-Lëtzebuerg zu Lissabon, gouf dës lëtzebuergesch-portugisesch Geschicht vum Verlag Campo das letras vu Porto am Abrëll 2007 erausbruecht. E gouf den 3. Abrëll 2007 an der Portoskellerei Ferreira zu Vila Nova de Gaia, an de 4. Abrëll 2007 am Grémio literario zu Lissabon virgestallt.

Zu Lëtzebuerg war déi offiziell Virstellung de 4. Juli, am Moment, wéi Portugal d'EU-Presidence iwwerholl huet.

Kréiwénkel

Dëse Roman spillt an engem klengen Duerf. D'Haaptpersoune sinn en ale Mann an e klenge Jong, déi sech eleng derduerch schloen. Mat engem Ziedel, deen dem Tolly aus engem vergiessene Buch entgéintfält, gëtt e vergaangent halleft Joerhonnert nees waakreg. "Kréiwénkel" ass e verdreemte Roman an zugläich eng Geschicht, déi een an Otem hält.
Éditions PHI

Rand-Los

Et si Kuerzgeschichten op Däitsch, iwwer Leit, déi op der Schietsäit vum Liewe stinn.
Éditions PHI

Abschied von dem Jungen am Synthesizer

Klenge Roman op Däitsch, op der Basis vun enger wouerer Geschicht. E jonke kriibskranke Museker huet en ausgefalene leschte Wonsch, a seng Kolleegen aus der Band verspriechen him, dee Wonsch z’erfëllen.
Eegeverlag

Vergraff:

Queesch derduerch, aus dem Joer 2000, Éditions PHI. Dëst ass eng Anthologie mat Kuerzgeschichten, Gedichter a Kabaretstexter aus méi wéi 30 Joer.

D'Kannerbicher

De Charly mat de groussen Oueren

An deem Buch geet et net nëmmen ëm dem Charly seng grouss Oueren, déi engem Puppelchen d'Liewe retten, mä och ëm den Tinnchen an säin Täschemesser, ëm de Patrick, deen nuets an engem Auto agespaart ass, ëm den Teddy, deen dem Papp Ieselsbrécke baut, ëm dräi Kazen, ëm e Papp dee mengt, hie wier eng Respektspersoun, ëm en onheemleche Strummert, ëm dem Professer Kueb seng Strofen, ëm e verréckte Sylvestermenü asw.
Éditions PHI

D'Monsterzwillinge vun Esch-am-Lach

A 75 Gedichter gëtt d'Geschicht vun den Zwillingen Zëss a John erzielt. De John ass kee ganz schéinen, mä schonn als klenge Bouf staark wéi en Uess. D'Zëss mat de rouden Hoer ass eng léif kleng Maus, mä heiansdo eng richteg Zatz, dat mat de Geeschter vun der Buerg, mat den Eilen a mat de Kuebe schwätzt an dat och zaubere kann.
Éditions PHI

Wee fir op Papperlapappagos

Déi Gedichter riichte sech u Kanner vu 5 bis 12 Joer. D'Buch huet, soubal wéi et eraus war, seng Prouf bei de Kanner bestanen. D'Léierpersonal schafft an de Schoulen domat, e puer vun de Gedichter stinn och am Schoulbuch fir d'3. an d'4. Schouljoer "Lies a fléi".
Éditions PHI

De klenge Prënz

Dës Iwwersetzung op Lëtzebuergesch vum Antoine de Saint-Exupéry sengem Buch «Le Petit Prince» koum 1994, 50 Joer nom Auteur sengem Doud, eraus.
Éditions PHI

Numia

D'Numia ass e Weesekand a kënnt aus engem Land, dat wäit ewech vu Lëtzebuerg läit: Fantamira. D'Kanner vu Juckebuerg hunn dat brongt krauselegt Meedchen immens gär, mä e puer grouss Leit fannen, datt d'Numia besser do wier, wou de Peffer wiisst... E Märchen, an deem et besonnesch ëm d'Léift zu alle Mënschen an ëm de Respekt virun der Ëmwelt geet.
Eegeverlag

Bibliographie, global

Däitsch

Gezählt, gewogen, geteilt, Novelle, 1962
Credo der Nebelkinder, Gedichte, 1963
Marias zweite Niederkunft, Kurzgeschichten und Gedichte, 1972
Rand-Los, Kurzgeschichten, 1982
Abschied von dem Jungen am Synthesizer, Kurzroman, 1988

Lëtzebuergesch

Loosst de Mound do, wou en ass, Gedichter a Lidder aus dem Kabaret, 1978
E Monument fir d'Kätti aus dem Breedewee, Geschichten, Balladen a Radiospiller, 1988
Zwee riets, zwee lénks, ee fale gelooss, Kabaret, 1988
Flantermais géint der Owend, Gedichter, 1992
Déi véier Kaze vun der Millen, Erzielung, 1993, 2. Oplo 2004
Fiisschen 1 – 100, Zäitgedichter, 1993
Fiisschen 101 – 200, Zäitgedichter, 1995
Porto fir d'Affekoten, Kriminalroman, 1997
Kréiwénkel, Roman, 1998
Queesch derduerch, Anthologie, 2000
Bommenteppech, Roman 2004
Meewäin, Roman, 2007
De franséischen Doud vum Oscar Messidor, Roman, 2007
D'Wëldanger Muer, eng Novell, Éditions Josy Braun, Mäerz 2009, 104 Säiten, Paperback
Pontelach. De Kinnek am „Petit Prince“. Pierre Lapôtre, 3 Erzielungen, Éditions Josy Braun, 2010, ISBN 978-99959-671-0-9
E Graf op Madeira, Roman 2010
Keen Däiwel méi, deen nach Hergotte keeft, Roman, 2012, ISBN 978-99959-671-4-7
Armagnac, Kriminalerzielung, Kremart Edition‎, 136 Säiten, 2013, ISBN 978-99959-830-5-5

Fir d'Kanner

Numia, Märchen, 1994, 2. Oplo 1995
De klenge Prënz, Iwwersetzung, 1994, zanterhier 4 Oploen
Um Wee fir op Papperlapappagos, Gedichter, 1996
D'Monsterzwillinge vun Esch-am-Lach, gereimte Geschicht, 2001
De Charly mat de groussen Oueren, Kuerzgeschichten, 2003
Déi gréng Piscine am Ruckelsbësch bei Klengliller, 2005

Theaterstécker

D'Kromm an der Heck, 1966
D'Rammelscheeder (Musek vum Jos. Kinzé),1967
Requiem fir e Lompekréimer, 1969
Mir si vum Viz (Musek vum Jos. Kinzé), 1971
D'Sakgaass (Coauteuren: Guy Rewenig a Guy Wagner), 1973
Wie bass de dann, Leo?, 1976
Hexejuegd, 1978
Den Här, 1978
Just 15, 1981
D'Monument oder d'Verbrieche vu Groussknautscheng, 1990
Eng Märel päift, 1992
Portombola, 1993
Geeschter, 1995
Spaghetti à la Mamma, 1996
De roude Soutien, 1997
D'Kierchenauer vu Knousperdeng, 1998
Leschte Konveniat, 1998

Theater fir Kanner

De Pierrot an d'Pierrette, 1993
De lëschtege Kasperl an den traurege Clown, 1994
Eis Spillplaz zu Makadammeldeng, 1995
D'Manuela an säi Monni Poppokattepättel, 1996
D'Kréckelfamill fiert an d'Vakanz, 1997
Wat ass lass am ale Schlass?, 1998
Brudder Sascha, grousse Clown, 1999
De klenge Prënz, Adaptatioun vum «Petit prince » vum A. de Saint-Exupéry, 1966

Kassetten, CD

De klenge Prënz, Cassette a Long play, 1981
De Bib, Cassette nom Wëllem Weis, 1986
Numia, Cassette, 1992
D'Huberts-Famill Radio-Serie, 1992, net am Handel
Lidder, queesch derduerch, CD, 2000

Saachbicher

z. B. Tom, Wäissbuch iwwer d'Drogeplaz Lëtzebuerg (Coauteur), 1981
Lëtzebuerg-Luxemburg-Luxembourg, Buch iwwer Lëtzebuerg exkl. fir d'BIL, 1989
Eis Sprooch richteg schreiwen, Léierbuch, 1996, 14. Oplo Hierscht 2007
Lies de bal, zesumme mat Cathy Clement, Lucien Blau, Henri Losch, Tullio Forgiarini, Pol Greisch, Jhemp Hoscheit, Nico Graf, Roger Manderscheid, Editions Saint-Paul , Editions Guy Binsfeld, 2014

Interviewen, Artikelen, asw.

Lëtzebuergesch - "Dem ADR den Terrain net iwwerloossen" ; Interview vun der Renée Wagener mam Josy Braun, in: woxx, Nr. 738, 26. Mäerz 2003; S. 2.
Josy Braun ou la langue luxembourgeoise dans la peau (fr) ; Interview vum Jean Portante mam Josy Braun, in: Le Jeudi, 15 Oktober 2010.

De Josy Braun als Schauspiller

Televisioun

Déi zwéi vum Bierg (1985) vum Menn Bodson, Gast Rollinger a Marc Olinger

Gielercher

Officier vum Ordre de Mérite du Grand-Duché de Luxembourg (Promotioun 2000)^[3]

Kuckt och

Lëscht vu lëtzebuergesche Schrëftsteller

Um Spaweck

Commons: Josy Braun – Biller, Videoen oder Audiodateien

Fallbeispiele Elise Schmit, Bespriechung vu Pontelach. De Kinnek am „Petit Prince“. Pierre Lapôtre. d'Lëtzebuerger Land, 12. November 2010
De Josy Braun am Autorenlexikon

Referenzen

↑ Josy Braun gestorben; Tageblatt Online, 4. August 2012.
↑ "Hien ass den 3. August 2012 am Alter vu 74 Joer zu Lëtzebuerg gestuerwen.", Doudesannonce am Luxemburger Wort Nr 184 vum 8. August 2012, S. 44
↑ Aktivitéitsrapport vum Staatsministère vum Joer 2000 wou op de Säite 77 ff déi Leit ernimmt sinn déi den 22. Juni 2000 eng Auszeechnung vum Premier iwwerreecht kritt hunn

[1] Josy Braun gestorben; Tageblatt Online, 4. August 2012.

[2] "Hien ass den 3. August 2012 am Alter vu 74 Joer zu Lëtzebuerg gestuerwen.", Doudesannonce am Luxemburger Wort Nr 184 vum 8. August 2012, S. 44

[3] Aktivitéitsrapport vum Staatsministère vum Joer 2000 wou op de Säite 77 ff déi Leit ernimmt sinn déi den 22. Juni 2000 eng Auszeechnung vum Premier iwwerreecht kritt hunn

[1]

[2]

[3]