Falasias

Falasias es razona cual pote sona lojical, ma no es tal. Cuando on regarda alga de la esemplos a su, on pote vide alga con concluis con cual on acorda, ma alga con cual on no acorda. Ma la veria, en la sensa empirical, no es la punto: Lo cual esta esemplos conserna es la razona lojical. Tota de esta esemplos es nonlojical e es fundida sur falasias. Un esemplo es nomida la jenerali scopinte. Algun pote razona "acel es la soreria la plu rica; Susana es un membro de acel soreria; donce Susana es un de la femes la plu rica en la universia." Lo es serta posible ce Susana es vera un de la plu rica, ma el pote ance es un de la plu povre. Lo no importa esce la conclui es vera o no en la sensa leteral. La razona es nonlojical. Lo sinifia tota no cosa per dise ce, si un grupo ave alga cualia, donce un membro de la grupo debe ave acel cualia ance.

Probable, tota person ia es colpable de usa un falasia sin intende. La plu persones es vitimes de falasias an si los sabe plu bon. E on ave alga persones (propagandistes, anunsiores, e multe politicistes) ci usa los sempre. Lo ta es saja per deveni familial con la falasias afin on pote proteje se de la persones nonmoral. Ma, per favore nota bon, esta lista no es intendeda per coraji ce algun usa los!

La afirma de la seguente

"A implica B; B es vera; donce A es vera". Esta es confusante, a veses, car lo pare tan multe como lojica bon: "A implica B: A es vera; donce B es vera" es conoseda como modus ponens o "afirma de la presedente", es un de la silojismos (esemplos de razona) la plu fundal valida. Ma la afirma de la seguente es un razona falsa cual sola pare como la afirma de la presedente:

"Si la suconsensa colieda cual Jung ia proposa es real, alora nos ta trova de la mitolojias de tota cultures de la mundo ave similes profonda; empirical, mitos ave serta multe similes; donce, la suconsensa colieda es real." - Ma no: on ave multe otra razonas per la similes entre mitos.

Esta es la conversa de nega de la presedente (vide a su).

Un varia peti de afirma la seguente es converti la dependente: "Si A, B; donce, si B, A". Esta razona falsa es simil a la afirma de la seguente, ma es espresada como un frase dependente.

"Cuando la normas de educa es basida, la cualia de programes a televide mali. Donce, si nos oserva ce televide deveni plu mal tra alga anios seguente, nos ta sabe ce la normas de educa es ancora cadente." No: la mali de televide pote ave otra causas.

"Si la medisines plu nova susede, nos va vide un boni grande en sania mental. Donce, si sania mental boni, nos ta sabe ce esta medisines es efetosa." No, denova: Sania mental pote boni per otra razonas ca esta medisines.

Nega de la presedente

"A implica B; A es falsa; donce B es falsa" Esta es la conversa de la falasia de afirma de la seguente. Lo ance pare como bon lojica: "A implica B; B es falsa; donce A es falsa," cual es nomida modus tollens o la nega de la seguente. Nega de la presedente, a la otra lado, es nonlojical:

"Si la Dio de la biblia ta apare a me mesma, cual ta demostra serta ce Cristiania es vera. Ma Dio ia apare nunca a me. Donce la biblia es no plu ca un nara falsa". No: Dio pote no apare a tu an si la biblia ia es vera. Posible el no gusta tu.

"Si la esiste de la invia de la penis cual Freud sujesta es un cosa real, nos ta espeta ce femes ta es plu jentil con sua fios ca con sua fias. Ma invia de la penis es, serta, no real. Donce, natural, femes no trata sua fios plu bon ca sua fias". No. Los pote ancora trata los plu bon, ma simple per otra razonas.

On ave ance un varia cual dise "si A, B; donce,si no A, no B". "Si tu ave un diploma dotoral, tu debe es multe sabe en psicolojia. Donce, si tu no ave un diploma dotoral, tu debe es spesial iniorante de psicolojia". No: Un PhD pote sinifia ce tu ave un grado de sabe, ma sabe no depende, serta, de la posese de un diploma.

Falasia de composa

La falasia de composa es la idea ce un cualia compartida par un cuantia de cosas individual, lo es ance compartida par un colie de acel cosas, o un cualia de la partes de un cosa debe ance es un cualia de la cosa completa.

"Esta camion nova es fabricada completa de composante aluminio lejera, e es donce multe lejera". No: un camion, an si composada de tan multe partes lejera, no debe es lejera se mesma.

"Un kilo de plumas debe pesa min ca un kilo de plomo". No. En fato, los pesa la mesma: un kilo. Serta, tu no ia fali esta!

"Car neurones es o stimulante o inibinte, la serebro mesma debe ave states stimulante o inibinte".

Falasia jenetical

Un varia de la falasia de composa es la falasia jenetical: Veninte a un conclui sur la bonia o malia de alga cosa sur la funda de la orijina de la cosa. (Esta no es la mesma como la falasia ad hominem - vide a su - ma es comun listada ala.)

"La medisin derivada de acel planta debe es venenosa, car la planta es venenosa".

"La labora umaniste cual nos fa probable veni de nosa nesesa per pare bon cuando fasante otra persones. Donce, labora umaniste es fundal egoiste!"

Falasia de divide

La oposa de la falasia de composa es la falasia de divide, pd suposante ce un cualia de alga cosa debe es aplicada a sua partes, o ce un cualia de un colie de cosas es compartida par cada de los.

"Umanas es consensa e es composada de selulas; donce, cada selula es consensa".

Tu studia a un universia rica; donce tu es rica".

Car la ecipo ia es capas de solve la problem tan fasil, me suposa ce cada membro de la ecipo ta pote fa tan bon solitar".

Falasia de la media nondistribuida

Sujesta cosas es en cualce modo simil, ma no indicante como. A es un tipo de C; B es un tipo de C; donce A es B.

"Gatos es un tipo de animal fundida sur la cimica de carbon; canes es ance un tipo de animal fundida sur la cimica de carbon; donce nos pote conclui ce canes e gatos es fundal identica".

"Ambos de los es studiantes, donce me pote espeta la mesma labora de ambos".

"Car tota de los es scizofrenicas, los pote tota ave la mesma reata a esta medisin nova".

Jenerali scopinte

Acc dicto simpliciter. La aplica de un regula jeneral a un caso spesial. Un regula jeneral es aplicada a un situa spesial, ma la cualias de la situa indica ce la regula no es aplicable.

"Jeneral, cristianes no gusta ateistes. Tu es un cristian, donce tu debe no gusta ateistes ance".

Jenerali scopinte inclui un malcomprende comun de la natur de statistica:

"La majoria de persones en esta nasion mori en ospitales; donce tu ta entra nunca un ospital!"

"Omes es, statistical, plu violente ca femes. Donce, me, un mas, debe es plu violente ca tu, un fema".

Jenerali fretante

Jenerali fretante es la conversa de jenerali scopinte: Un caso spesial es usada como la funda de un regula jeneral. Un regula jeneral es creada par esamina sola alga poca casos spesifada cual no representa tota casos posible.

"Me conose un representor de un sindicato e el es un person crimin. Me no ta fida cualce de los".

"Xavier ia es un cristian nonsinsera. Donce, tota cristianes es nonsinsera".

"Esta scizofrenica ave deludes paranoica. Lo es razonable ce tota de los ave deludes de acel tipo".

Jenerali fretante inclui un otra malcomprende comun de statistica, nomida la statistica de cuantias peti:

"Mea jenitores ia fuma en sua vives intera e los no ia developa canser...."

"La sinco sujetos en nosa esperimenta ia responde bon a nosa interveni. Nos pote, donce, recomenda la prosede a cadun".

Eleje de oservas

Un otra varia es nomida eleje de oservas: indicante situas favorente cuando iniorante la situas nonfavorente. Per esemplo, a cualce loca de aposta, tota atenta a los ci gania, en cuando los ci perde es cuieta corajida per sorti de la porte a ante. Esta modo, gania pare multe plu posible ca lo es. Recorda: La casino gania sempre!

"Tota de esta persones ci ia prea per un remedia ia survive sua maladia. Prea debe serta es recomendada!

E eleje de oservas inclui evidente de raconta:

"Sola la semana presedente, me ia leje sur un xica ci ia es morinte de canser. Sua tota familia ia vade a la eglesa e ia prea per el, e aora el no ave an un pico de canser. Cual demostra clar la potia de prea!"

"Tio Josef ia cura se reumatica par bevi sua propre urina!"

Bon esemplos pote es trovada entre "mitos urban".

Dicotomia falsa

Acc negra o blanca, media escluida. La suposa de un distingui de "o esta o acel". Sujestante ce on ave sola du alternativas, cuando otra alternativas esiste o pote esiste. En loca de negra o blanca, nos pote ave tinjes de gris... o an arcos de sielo de colores!

"Nos debe eleje entre securia e libria. E lo es la natur de tota bon sitadanes per eleje la risca de libria!" Esce nos debe eleje? Nos no pote ave ambos? O un compromete?

"Un pasiente o deveni sana o lo no deveni sana".

"Dise a me: esce el es o no es bipolal?"

Un otra forma de dicotomia falsa es la considera sola la estremas:

"El es culpable o no culpable">

Suplica a la demanda

Acc petitio principii. Suposa como un premisa la conclui cual tu desira ateni. En loca de ofre un demostra real, on pote simple reespresa la conclui nos desira, e espera ce la escutor no nota lo.

"Posese par la governa de servis publica es perilosa, car los es sosialiste". Ma posese par la governa de servis publica es sosialisme. On ia dise a tu ce lo es perilosa car lo es cual lo es.

"Metodos cualial no ave cualce valua car los no inclui mesura o statistica". Vera: acel es cual metodos cualial sinifia, e donce lo no pote indica un valua par se mesma.

Razona sirculo

La forma la plu evidente de suplica la demanda es la razona sirculo (la sicle vil, circulus in demonstrando): Declara en sua demostra lo cual on debe demostra.

"Nos sabe ce Dio esiste, car la biblia dise lo; e nos sabe ce la biblia es vera car lo es la parola de Dio".

"Tua razona contra Freud es la resulta de tua desacorda suconsensa cual tu no ia solveda".

"Tua razona contra esistentialisme es la resulta de tua nonautentica".

Apela a fide

On ave ance la apela a fida: fida, par sua defini, depende de un crede cual no depende de lojica o evidentes. Fida depende de pensa nonlojical.

"Si tu ta aseta la Dio, tu ta comprende!"

"Si tu ta aseta Maslow , tu ta comprende sua ideas!" etc.

E la modo la plu comun per usa la suplica de la demanda es la usa de eticetas cargada cual mendica la demanda (parolas cargada, parla emosial), pd redise la conclui, ma usante parolas "calda":

"Esta criminor es cargada con la crimin la plu savaje conoseda par umanes". Esce esta demostra cualce cosa, o sola causa la sangue per flue?

Razona ad hoc

Frecuente difisil per identifia (e donce multe perilosa) es la razona ad hoc: Dona un esplica pos la fato cual no aplica a otra situas.

"Me vide ce la canser de Joan es remeteda."

"Si, nosa preas ia susede!"

"Ma esce tu no prea per Susana ance, e vide cual aveni a el."

"Me es serta ce Dio ia ave un razona spesial per permete ce el mori." - Esta punto final es la razona ad hoc.

"La persones ci no segue la model espetada de madre forte - padre debil conduinte a omosesalia es, sin duta, asconde sua orienta vera!"

Es vijilante cuando persones dise "tota ave un razona" o "Dio ave un intende per cadun" o "la veria es ascondeda."

Demanda complicada

Acc demanda cargada, demanda trucosa, falasia de interoga, falasia de presuposa. La forma demandante de mendica la demanda (a supra). Un demanda cual condui otras per crede ce un demanda a ante ia ave un responde ja en un modo spesifada.

"Responde si o no: Esce tu ia sesa tua condui mal?" Si tu dise "si", tu confesa ce tu ia ave conduis mal; si tu dise "no", tu confesa ce tu esta conduis mal ancora!

"Esca tu ia para tua sposa?"

"Dise a me: esce tu es ge, o simple negante? E cuando tu va esita la saleta?"

Un varia de la demanda complicada es la falasia de multe demandas (plurium interrogationum). Esta falasia aveni cuando algun demanda un responde simple a un demanda complicada:

"Si o no: Esce democratia es ultima la sistem la plu bon de governa?"

Un otra varia de esta falasia es la demanda per un esplica de alga cosa cual es nonvera o no ancora demostrada: "Como tu ta esplica la esiste de estrateranes sur nosa planeta?"

Causa falsa

Acc non causa pro causa, non sequitur. Alga cosa es indicada como la causa de un aveni, ma lo no ia es vera demostrada como la causa. Per esemplo:

"Me ia prende un aspirina e ia prea a Dio, e mea dole de testa ia desapare! Dio ia remedia mea dole de testa!"

"Artistes sufri comun de depresa cuando adoleses. Donce, si tu vole ce tua enfante ta deveni un artiste grande, no dona Prozac a los!"

La forma la plu comun de causa falsa es nomida pos hoc ergo propter hoc: Un conclui cual no segue de premisas o evidentes demostrada. Suposa ce lias causal cual no ia es demostrada. La frase latina sinifia "pos esta, donce causada par esta".

"Tu debe vade a la Universia Harvard, car graduadas de Harvard reseta plu mone". O posible los ia ave plu mone an ante los vade a Harvard.

"El ia es malada pos visita Xina; donce alga cosa en Xina ia causa la maladia". O posible los ia ave la maladia ante parti per Xina, o durante sua vola de Xina.

"On ia ave un crese en la cuantia de nases en un luna plen. Donce, lunas plen causa un leva de la frecuentia de nases".

Un varia peti de esta es cum hoc ergo propter hoc: Dise ce, car du cosas aveni con lunlotra, los debe es relatada causal. Lo es un falasia car lo iniora la otra causas posible de la avenis.

"La cuantia de persones alfabetiste ia descrese pos la introdui de televide. Lo es clar ce la vide de televide impedi aprende."

"El ia comensa usa drogas a la mesma tempo cuando el ia comensa visita acel xica. Me ia sabe ce el ia es un influe mal!"

Confusa de corelata e causa

Un varia statistical comun de esta es la confusa de corelata e causa: corelata no pote dise cualce cosa sur la dirije de causa. Si X es potiosa corelata con Y, X pote es la causa de Y, o Y pote es la causa de X, o (la plu probable) alga otra cosa es la causa de ambos. E posible la relata es tota acaso.

"Plu juores de xace es omes; donce, omes es juores de xace plu bon ca femes".

"Multe plu femes sufri de depresa ca omes. Nos pote alora conclui ce alga cosa consernante la fisiolojia de femes causa depresa"

Esta es frecuente segueda par un ad hoc razona: "La juores mestre fema debe es lesbianes"; "La omes con depresa debe es femin".

La arenge roja

Acc tese nonrelatada, ignoratio elenchi, conclui nonrelatada, iniora la problem, neblinte la caso, diverje, punto mancada, etc): Demostra un punto otra ca lo su esamina, diverje de la tema par cambia lo. En England elizabethan, prisonidas ci ia evade de prison, ta frota se con arenge "roja" (vera, un brun-roja), pd putrida, per distrae la canes de la odor.

"Me no pote vide perce la xasa de animales como cruel, cuando lo dona multe plaser a multe persones, e emplea an plu". Donce nos pote sesa discute sur cruelia e comensa parla sur plaser e emplea?

"Cristiania es la sola relijio vera: Lo ia es clar de aida enorme a multe persones". No cuanto e bon el parla sur como multe lo ia aida persones, el no ia demostra si cristiania es la sola relijio vera.

"Lo es clar ce nos prescrive opioides a persones ci no nesesa los vera. Nos debe no permete esta drogas en cualce caso!"

Un esemplo de la arenge roja es la om de palia: Crea un sena falsa e alora ataca lo; malrepresenta la posa de un otra afin lo pote es plu fasil atacada.

"Evoluistes pensa ce tota cosas ia aveni par acaso. Como es esta posible?" La plu de evoluistes pensa de eleje natural, cual pote inclui multe elementos acaso, ma no depende tota sur avenis acaso. La depinta de tua oposor con colores falsa sola redirije la intende de la debate.

"Per soma Freud, el ia crede ce tota problemes es un refleta de problemes sesa. Permete ce me demostra perce Freud es plen de merda!"

Un otra esemplo es reali falsa: cuando un person trata un conseta astrata o un construi ipotesal como lo representa un aveni concreta o un cosa fisical. Un esemplo es la modo en cual esamina de intelijentia es comun presentada como mesuras real de intelijentia.

"Cual es consensa? Tu no pote trova lo en cualce loca en la serebro umana, donce nos debe rejeta la conseta". Esta es un falasia multe comun entre materialistes.

Un otra esemplo es la demanda sin sinifia:

"Como alta es supra?" Nota ce "supra" es un dirije, no en cosa mesurable..

"Esce cualce cosa esiste vera?"

"Como nos pote esperia la suconsensa colieda direta?"

Apela a lojica

Un varia multe astuta de la arenge roja es un apela a lojica (argumentum ad logicam): Esta es la "falasia falasia" de sujesta ce un proposa es falsa car lo ia es presentada como la conclui de un razona falsa. On debe nota ce un razona falasiosa pote ariva a un conclui vera!

"Regarda la frati 16/64. Aora, sutrae la ses a la alta e la ses a la fonda, nos ave 16/64 = 1/4."

"Para un momento! Tu no pote simple sutrae la du seses! Tua matematica es noncoreta. 16/64 no egal 1/4." Ma on debe nota ce, an ce la matematica es noncoreta, 16/64 egal vera 1/4!

Multe comun es evidentes supresada: Un declara comun usada per engana cual no inclui alga de la fatos nesesada per un esplica esata.

"Esta persones ia crusi la borda sin permete. Donce los es criminores".

Analojia falsa

En de la varias la plu mal de arenge roja es la analojia falsa: Un analojia o metafor mostra un paralel per esplica plu; lo no demostra cualce cosa:

"La americanes orijinal ia debe abri la via per sivilia ueste; cadun comprende ce on no pote prepara un omeleta sin rompe alga ovos". Ma es la vives e cultures de miliones de persones comparable a ovos? E como es la prepara de omeletas relevante a istoria e moralia?

"Car la mente es esensal un computador mol, nosa taxe es la descovre de como nos ta programi los la plu efetosa".

Apela spesial

On ave multe falasias cual inclui la malusa de parolas: Un esemplo comun es nomida apela spesial, cual es la usa de parolas spesial per un ca un otra:

"La taticas sin compatia de la enemi, sua atacas savaje e suisidal, ia es parada par la desides difisil de nosa comandores e la autosacrifia corajosa de nosa soldatos". Es taticas sin compatia multe diferente, en realia, de desides difisil? Es atacas savaje suisidal multe diferente de autosacrifia corajosa? Esta es un falasia usada multe par jornalistes, politicistes, e jenerales.

"La forma de terapia sujestada par Ellis es autoritariste e combatosa!"

"La forma de terapia sujestada par Rogers es laissez faire, e an pigra!"

Esta no es tan distante de la falasia de vasila, o la usa de parolas ambigua. Un parola clavin es usada con du o plu sinifias diferente en la mesma razona - la desloca de sinifias.

"Cual ta es plu barata ca programes libre per tua computador? Ma per serti ce los resta libre, ce usores pote usa la programes como los desira, nos debe pone un lisensa sur los per serti ce los ta es sempre libre redistribuable!" Un metodo per evita esta falasia es per eleje termas con cura ante comensa la razona, e evita parolas como "libre" cual ave multe sinifias.

No un om vera scotes

Un falasia con un nom divertinte es la falasia de no un om vera scotes: Suposa ce me ta sujesta ce no om scotes usa zucar sur sua gaxa. Tu responde par indica ce tua ami Angus gusta zucar sur sua gaxa. Alora me dise "A, si, ma no om vera scotes usa zucar sur sua gaxa!" Par sujesta ce Angus no es un om scotes con documentos ofisial, me ia limita la sinifia de la espresa "om scotes".

"Como el pote fa lo a sua sposa si el ama el?"

"A, ma acel no es ama vera, vide?

"No terapiste compatiosa ta usa metodos como acel!"

"No siensiste bon educada ta ariva a acel concluis!"

"Cristianes ofre la otra jena cuando atacada".

"Me me ia vide alga cristianes responde a viole con viole".

"Serta, ma los no es bon cristianes. Los no es cristianes real en cualce modo!"

Esta falasias comun inclui la usa de asentua, la cambia de vose en un frase per cambia la sinifia. En engles, per esemplo, la parola "men" pote sinifia o omes o persones:

“All men are created equal...” sujesta ce femes no es creada egal.

“All men are created equal...” sujesta ce los es creada tal, ma no fini egal.

(Nota ance ce la parola "equal" (egal) es multe ambigua. La intende ia es ce tota persones es egal en la lege, e no en ricia, belia, intelijentia, etc.

Un otra forma de malusa de parolas es amfibolia - la usa de frases ambigui:

"Du pizas per un custa spesial". Esce los intende du per un? o ambos a la mesma custa "spesial"?

Ataca personal

Acc argumentum ad hominem. Ataca la person en loca de la razona. En la ataca personal, nos demanda de la escutor per no considera la razona, ma en loca considera la person de cual lo veni:

"Esta teoria sur un remedia nova per canser ia es introduida par un om con simpatias marxiste. Me no vide perce nos debe estende a el la cortesia de nosa atende".

"Tu no pote fida Freud - el ia usa cocaina!"

"Tu no pote fida Adler - el ia es un sosialiste!"

"Tu no pote fida Horney - el ia sufri de depresa!"

Ma marxistes, usores de cocaina, sosialiste, persones depresada, an stupidas, pote es coreta!

Alora on ave la forma maltratante de la ataca personal:

"Tu sujesta ce ateistes pote es moral - ma me conose ce tu ia abandona tua sposa e enfantes".

"Tu no acorda con esperimentas? Me ia leje ce tu no ia es capas de publici tua propre rexerca!"

Un poca plu astuta es la forma situada de ataca personal:

"Lo es tota asetable per mata animales per come. Car tu porta sapatos cuoro, me es serta ce tu no desacorda".

"Tu no acorda con Rogers - ma me nota ce tu usa sua tecnica de refleta en tua propre pratica".

Veneni la poso

Multe danante es veneni la poso: La ataca personal pote es usada como un escusa per rejeta un conclui spesifada, como cuando tu alega ce algun es esplicante un conclui per razonas egoiste. Tu ia "veneni la poso" car, de aora, persones ta tende duta sua razona.

"Natural tu ta sujesta ce ata afirmante es un idea mal: tu es blanca!" Ma persones blanca pote aproba cosas cual no benefica se.

Nota ce si algun es un mentinte conoseda, acel fato ta redui cuanto fida el reseta como un atestor. Ma lo no ta demostra ce sua atesta es falsa en esta caso. Mentintes pote dise la vera!

"No atende a sua criticas de esistentialisme - el es un materialiste!

Tu quoque

Cada adolesente es familial con la razona nomida tu quoque, latina per "tu ance!' o "vide ci parla!"

"Si tu crede ce vive en un cibuts es tan bon un idea, perce tu no vive en un cibuts?"

"Si psicolojia es tan grande, perce tu ave tan multe problemes mental?"

"Si fuma es tan mal, perce tu fuma ancora?" - ma an un fumor pote sabe ce lo no es bon per sua pulmones!

Suplica a la fola

Acc argumentum ad populum. Esta envolve suplicas teatral a nosa instintos la plu basa, como egoisme, avaria, jelosia, vania, en loca de usa fatos e razona:

"Car vos es escutores de la universia, me sabe ce me pote parla seria a vos sur casos difisil". - O, alora, grasias multe, per favore continua!

Un esemplo de suplica a la fola es la falasia de la efeto de moda (consensus gentium, argumentum ad numerum): conclui ce un idea ave merita sola car multe persones crede lo o pratica lo.

"La plu de persones crede en Dio; donce, lo debe es vera".

"Me dise sola ce miliones de persones crede en astrolojia, donce lo debe ave alga realia, no?"

"La popularia enorme de libros sur la analise de sonias sujesta sua validia!"

La razona de omnisiente: un varia de la presedente cual dise, esensal, ce "tota persones" acorda:

"Tota persones sabe ce omes e femes es la mesma en sua psicolojia!"

"Cadun es interesada en intelijentia artifis - lo debe ave alga realia!"

Garda se contra parolas como "tota", "cadun", "cada cosa", etc.

Suplica a autoria

Acc argumentum ad verecundiam. Esta es cuando nos introdui persones famosa, grupos autoriosa, siensa, tradision, relijio, universales...

"Me profesor ia dise ce la psicolojia de condui es stupida". Sola car un figur de autoria dise alga cosa no sinifia nesesada ce lo es coreta (estra, natural, si acel autoria es me mesma).

La filosofiste grande Santayana ia dise "Los ce resta iniorante de istoria es destinada per repete lo". Ma Henry Ford ia dise "Istoria es merda!" Alora, ci es coreta?

"Freud ia dise... - e ci es nos per debate con un jenio de sua calibre?"

Esta inclui la tecnica famosa de mercatistes nomida suplica a clasistes:

"Jinas de Laboretas. Los no es per cadun!"

"Chez Merderia - la vino per la conosente!"

"Tota de los ci pote sufisinte rica prefere terapia freudian!"

Varias inclui un suplica a tradision (argumentum a antiquitatem): Esta es la falasia de dise ce alga cosa es bon o coreta sola car lo es vea, o car "esta es como lo ia es sempre". Ma an si persones ave un tradision, lo dise nunca sur si lo es vera (o bon). Vide, per esemplo, razonas per astrolojia, sclavia, superstisio, sacrifia de umanas....

"Psicolojiste ia acorda sempre ce...."

Simil es un suplica a novia (argumentum ad novitatem): La falasia de declara ce alga cosa es plu bon o coreta sola car lo es nova, o plu nova ca alga otra cosa.

"Lo es la idea la plu resente!" Ma la studias la plu resente es ance los ci ave la min posible de es demostrada como erante!

"Windows 387 es multe plu bon ca la varia plu vea de Windows OS. Serta lo debe es plu bon, arivante pos tan multe anios de susede!"

La suplica a ricia (argumentum ad crumenam): La falasia ce crede ce mone es un criterio de coretia; ce los ci ave plu mone es plu probable coreta; o ce alga cosa cual custa plu es donce plu bon.

"Produidas de Microsoft es sin duta superior; perce tu pensa ce Bill Gates ia deveni tan rica?"

"Lo custa du veses plu - lo debe es du veses tan bon!"

"Tu reseta cual tu paia!" Vera?

"Me fida psiciatristes plu ca psicolojistes: Los custa plu!"

E, natural, on ave la suplica de povria (argumentum ad lazarum): La falasia de suposa ce algun povre es plu virtuosa e fidable ca algun ci es plu rica, o ce alga cosa plu barata o simple es plu bon ca alga cosa plu cara o complicada. Per esemplo:

"Monces posese plu probable un intui per la sinifia de vive, car los ia rejeta la distraes de ricia".

"Un pan simple, preparada par mano - cual ta es plu bon?"

"Car Joan fa tan multe de sua labora pro bono (sin custa), el debe es un terapiste plu onesta".

Suplica a natur

Un falasia comun, e multe perilosa, es la suplica a natur (o la falasia de lege natural): Razona ce, car umanas es produidas de la mundo natural, nos debe imita la condui videda en la mundo natural, e per fa diferente es "nonatural". On pote trova esta spesial frecuente en politica e relijio, e en produis de autoremedia.

"La mundo natural es conoseda per compete; animales luta contra lunlotra per posese de recursos limitada. Capitalisme, la luta per posese de capital, es simple un parte nonevitable de natur umana. Esta es la modo en cual la mundo natural opera".

"Sin duta, omosesalia es nonatural. Cuando tu ia vide du animales de la mesma seso copula?" En realia, acel es plu comun ca on pensa: Plu ca 500 spesies ia mostra acel condui! Ma nota bon: Cual es vera per otra animales no nesesa es vera per nos!

"Nos atrae a persones bela es paralel a la instintos de avias e mamales. Ama, donce, es no plu ca un instinto!"

suplica a compati

Acc argumentum ad misericordiam. Esta es un suplica a tua emosias amin, tua simpatia. Escuta, si tu pote, a cualce suplica per donadas per enfantes malada. O escuta anunsias cual atenta vende computadores cara a jenitores.

"Tu no ta vole ce tua enfantes es nonvantaje par sua nonsabe de computadores , si? Cual tipo de parente tu ta es en acel caso?"

"Me no ia mata mea madre e padre con un axa! Per favore no dise ce me es culpable! Me ia sufri sufisinte par es un orfan".

"Metodos cualial es usada par un grupo peti de rexercores dedicada laborante en un ambiente enemin de esperimentores".

Suplica a nonsabe

Un otra falasia multe comun es la suplica a nonsabe (argumentum ad ignorantiam o argumentum de silentio): Razona ce alga cosa debe es vera, simple car lo no ia es demostrada como falsa. O razona ce alga cosa es falsa car lo no ia es demostrada como vera. Per dise, mea ideas es coreta car on no ave cualce evidente contra los. O tua ideas es falsa car on ave no evidente per lo.

"Nos no ave evidentes ce Dio no esiste. Donce, el debe esiste".

"On ave viventes intelijente sur otra planetas, car nun ia es capas de demostra ce los no esiste".

Vera, tu no pote demostra la nonesiste de alga cosa. Si tu ia xerca multe bon, me pote dise sempre ce tu no ia xerca sufisinte. Atenta: demostra a me ce unicornos no esiste! La carga de demostra es sempre sur el ci razona ce cualce cosa esiste vera!

"Nos no sabe si medisines oliste pote vera aida maladias psicolojia, donce nos debe usa los asta cuando la rexerca ta es fada." Esta es comun segueda par un suplica a compati:

"Tu ta preveni persones la posible de remedia, sola car tu no ave evidentes? Tu es un monstro!"

Desloca de carga de demostra

Un acompaniante comun a la suplica a nonsabe es la desloca de carga de demostra: La carga de demostra es sempre sur la person ci declara alga. Desloca la carga de demostra es la falasia de pone la carga sur la person ci nega o no fida la declara. Donce, cuando un debator no furni la evidentes nesesada per sua declaras, el ta defia sua oposor per demostra ce el ia era.

"Demostra ce Dio no esiste, si tu es tan serta!"

"Demostra ce OVNes no es real, alora!"

"Me crede ce omosesalia es fundida sur diferes biolojial - me osa tu per demostra ce me era!"

Suplica a teme

Acc argumentum a baculum. No debate con me - lo es perilosa!

"Si tu no condena esta mator, un de vosa pote es sua vitim seguente".

"No usa esta desodorinte e tu no va ave cualce amis".

"Si tu no crede en Dio, tu va arde en enferno!"

"Tu debe aprende tua statisticas, o tu ta ateni nunca sua diploma dotoral".

Poca plu sutil es la razona de seguente negativa:

"La person acusada debe es enviada a prison o otras ta atenta crimines simil".

Inclina lisca

E un varia comun es la inclina lisca (la efeto de dominos, la bal de neva) : Sujestante ce un cambia en prosede, lege, o otra ata ta resulta en seguente negativa:

"Dona a los un dito e los va fura tua braso."

La espresa arabi: "Si la camel entra tua tenda con sua nas, sua corpo intera va entre pronto!"

"Suporta diretos egal per femes e, pronto pos, nos debe usa banios unisesal!"

"Si nos legali canaba, alora plu persones ta comensa usa eroina e cocaina, e nos ta debe legali los ance. No multe plu tarda nos ta ave un nasion plen de drogamanicas suportada par la governa. Lo es clar ce nos debe legali canaba."

"Si on dona Prozac a persones depresada, los va deveni dependente de lo, e alora de drogas jeneral, e los pote trata nunca con sua problemes par se mesma!"

Nota ce lo no nesesa segue ce, sola car nos cambias cosas, ce un inclina lisca ta aveni! Esta falasia es usada comun par los ce no gusta suiside aidada o la rejistra de armas.

Argumentum ad nauseam

E la falasia la plu usada par anunsiores e politicistes: la argumentum ad nauseam, pd "repete asta ce los vomita". Esta es la crede noncoreta ce un declara es plu probable vera (e plu probable aseta como vera) la plu frecuente lo es oiada, donce repete lo constante. Vide cualce anunsia, o vide la pratica de forsa ce enfantes memori sua lesones o sitas de la biblia.

"La condisiona clasica debe es a la radis de tota aprende - lo ia es martelida en me testa a universia!

"Tota me vive, persones ia dise a me ce un om debe nunca mostra debilia!"

La esemplo final: en la eda de televide temprana, la suportores de programes ia repete sua anunsias cade poca minutos: :"bevi Coca Cola... bevi Coca Cola... bevi Coca Cola...."