Nion (gramatica)

Per un introdui a la lingua, vade a Nion

Ordina de parolas

Jeneral, la ordina de parolas en nion es sujeto-ojeto-verbo. Ma, contrastante con la plu de linguas indoeuropean, la sola regula forte es ce la verbo debe es poneda a la fini de la frase (posible segueda par un particula fininte). Esta es car la elementos de un frase en nion es indicada par particulas cual identifia la roles de sua dependente.

Plu coreta, la strutur de frases en nion es tema-comenta. La tema es la parola cual indica la intende jeneral de la frase, cual pote difere de la sujeto. Per esemplo:

• zo wa hana ga nagai - leteral, "regardante elefante(s), (la) nas(es) (es) longa.

"Nas" es la sujeto, ma "elefante" es la tema. Nota ce nion no indica singular/plural, defininte/nondefininte. Ance, la usa de un parola per "es" con un ajetivo no es nesesada; la parola nagai sinifia ja "es longa".

En nion, la sujeto e la ojeto no nesesa es usada. pronomes spesial es cadeda. Per esemplo:

• ashiete moratta - leteral, "ia esplica", cual sinifia "(el/los) ia esplica (lo) a (me/nos). La parola moratta es un particula cual indica ce un person o grupo esterna (el/los) domina la frase.
• ashiete ageta ta sinifia ce un person o grupo interna (me/nos) domina, pd lo es usada per dise "me/nos esplica lo a el/los".

Verbos

Verbos en nion ave du tempos: pasada e nonpasada. Nonpasada es usada per presente e futur.

Aspeta continuante pote es indicada par ajunta -te iru pos la verbo. Si la verbo sinifia un cambia de state, la mesma indica un aspeta perfetida. Per esemplo:

• kite iru - el ia veni e es ancora asi; tabete iru - el es comente.

Demandas ave la mesma strutur como frases simple, ma con un alti de tono a la fini. En parla plu formal, on pote usa la particula de demandas, -ka. En casos plu casual, on pote usa -no per indica un interesa personal.

Negas es formida par infleta la verbo. Per esemplo:

• pan o taberu - Me va come pan - deveni pan o tebenai - Me no come pan.

La parolas da e desu (la forma cortes) es la copula. Lo es usada per "es", ma ance pote es un marca per tempo, par usa datta o deshita (cortes). Esta es usada car sola verbos e ajetivos cual fini en -i pote porta la sufisa de tempo. Du otra copulas indica esiste ("on ave") o en alga casos propria: aru (negativa: nai) e iru (negativa: inai), per nonanimada e animada, en ordina. Per esemplo:

• neko ga iru - on ave un gato
• ii kangae-ga nai - me no ave un bon idea

La verbos per "fa" - suru e shimasu (cortes) - es comun usada per crea verbos de nomes:

• ryori suru - coce
• benkyo suru - studia

Ajetivos

Nion ave tre tipos de ajetivos:

• los cual fini con -i pote ave conjugas como verbos, pd pote deveni pasada o negativa.
• los cual nesesa un forma de la copula, xef na:
  • hen na hito - "strana es person"
• "ajetivos vera", como ano (acel), un grupo peti.

La du formas prima a supra pote es usada como predicantes:

• gohan ga atsui - la ris es calda
• kare wa hen da - el es strana

La du formas pote ance es usada como averbos:

• hen ni naru - deveni strana (usante ni)
• atsuku naru - deveni calda (cambia -i a -ku)

Nomes

Nomes en nion no ave indicas de cuantia, seso, o aspeta de articles. La nom hon pote refere a un libro o alga libros. Cuando cuantia es importante, on pote indica lo con un parola de cuantia. En casos rara, on pote usa un sufisa o dupli la parola. Parolas per persones es tipal videda como singular. Parola referente a persones e animales pote ave la sufisa -tachi, cual sujesta "e acompaniores".

La rol de nomes es indicada par pospones, ance nomida particulas. Per esemplo

• wa (teme) - watashi wa sushi ga ii desu - per me, suxi es bon
• ga (sujeto) - kare ga yatta - el ia fa lo
• o (acusativa) - nani o tabemasu ka? - Cual tu va come?
• ni (dativa) - Tanaka-san ni agete kudasai - per favore dona lo a senior Tanaka
  • ance per la loca o dirije) - Nihon ni ikitai - me vole vade a Nion
• e (lativa) - pati e ikanai ka? - Tu vole vade a la selebra?
• no (jenetiva) - watashi no kamera - mea camera
  • ance per usa frases como nomes - suki-ni iku no ga suki desu - me gusta vade sci

Pronomes

Pronomes es, en la plu de casos, no indicada. La contesto tipal clari la intende. Ma un cuantia grande de pronomes esiste, con multe varias regardante cortesia, plu un otra cuantia grande de pronomes no plu usada oji, ma usada en leteratur antica. Enfantes tipal usa la formas la plu simple, ma cuando on deveni un adolese, on es espetada deveni familial con multe formas plu respetante.

La pronomes en nion es plu como nomes ca pronomes en elefen e linguas relatada. Los pote aseta ajetivos como cualce otra nom. Per esemplo:

• odoroita kare wa michi o hashitte itta - leteral "stonante el sujeto strada ojeto core ia-vade", pd "stonante, el ia core a basa de la strada".

La pronomes fundal:

• watashi - me
• anata - tu
• ano hito - el

Cuando on vole distingui mas e fema:

• kare - el (mas), ami cara mas
• kanojo- el (fema), ami cara fema

Plurales (tipal indicada con la singular con sufisas como -tachi o -ra):

• ware-ware - nos (formal)
• ware-ra - nos (nonformal)
• anata-tachi - vos (nonformal)
• anata-gata - vos (formal)
• kare-ra - los

Nion ave sola un pronom de refletante, usada en cualce caso:

• jibun - se (etc)

Per cosas, on usa formas de demostrantes:

• kore - lo, esta
• sore - lo, acel
• are - lo, distante

Cortesia

Nion ave un sistem grande per espresa cortesia e formalia. Esta refleta la natur ierarcial de sosia nion. Lo indica diferes en prestijia sosial, determinada par multe fatores, incluinte carera, eda, esperia, la demanda de favore, etc.

Formas umil es usada per parla sur se mesma o sur sua propre grupo, compania, o familia. Formas onorante es usada per parla a sua propre superiores. La forma cortes es ance usada per parla con persones ci on no conose bon. Si la relata deveni plu familial, on pote cambia a un forma plu casual.

La plu de nomes en nion pote es fada onorante par ajunta o- (o go- per nomes derivada de xines). On pote ance usa la sufisa -san, como en Tanaka-san, cual es simil a nosa "senior" e "seniora".