Lup
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
De luppe (Letien: labia oris) zeen de geveulige en vleisjige butelste deiler vanne móndj of de bek.
Ze zeen ane binnekantj middels luppebendjes (of luppereemkes of frenula) verbónje mit 't tandjvleis vanne kake. Sómtieds is 't bäövelste luppebendje te lank en reik 't toet tösse de veurtenj. Hiedoor óntsteit e frontaal diasteem (spleet tösse de tenj). In det val mót 't luppebendje waeren ingekortj. Dezen ingreep neump me frenulectomie.
De luppe spelen 'n wichtige rol bie 't spraeke, mer ouch bieje oetdrökking van 't gezich (wie lache). Ouch bie 't kösse spele de luppe 'n wichtige rol. De luppe zeen den ouch hieël geveulig, doordet de hoed hieël dón is. Det haet ouch es gevolg det 't blood zichbaar is dore luppe, wodoor de luppe 'n roeaj kluuer höbbe. Bie druueg of sjraal luppe kan me luppebalsem broeke.
Bie 't spele van e meziekinstrument wie 'n träöt wuuertj de toean gevörmp dore luppespanning, ouch waal de ammezjuur geneump.
Väöl vrólje broeke luppestif, 'n saort aan cosmetica veur kluuerstof aan te bringe oppe luppe.