Meteoor
Dit artikel is gesjreve (of begós) in 't Sint-Joasters. Laes hie wie v'r mit de versjillende saorte Limburgs ómgaon.
'ne Meteoor of vallendje ster is e kórt leechspaor det wuuertj veroarzaak door klein stökskes stof en ies (meteoroïde) die mit enorm snelheje (inkel tièntal kilomaeters de sekónd) in d'n dampkrink van de aerd terechkómme en dao mit 'ne leechflitsj verbranje. E deilke mit de gruèdje van 'n ert guèf al 'ne biezunjer klaore leechstreep. 't Invalle van meteore gebeurtj de gansen daag door, meh de leecheffekte zeen meistes allein 's nachs te zeen en mit 't bloat oug allein wen 't hièl duuster is. Meteore kinne aafzunjerlik kómme, mer ouch in meteoorzwerme, wie de Leonide. Sómtieds is 'ne meteoor zoa groat det t'r neet gans verdamp in d'n dampkrink. Den vèltj e deil (in stökker) op de aerd, 'ne meteoriet. De brök van dees zeen hièl waerdevól veur de weitesjap, went me kan daomit óngerzeuk doon nao 't óntstaon van 't zónstèlsel.